Adama wo tirige shɛɛn pee
(1 Caŋa Ɲɛhɛɛ Jomɔ 1:1-4)
5
Ayiwa, Adama wo tirige shɛɛn pu wo sɛmɛ wu we. Caŋa kemu Kilɛ ya sipya yàa ge, a wu wu yàa wuyɛ pyaa jaa ni. 2 A wu pu yàa ná ni cee, na baraga le pu ni. Pu cayaaga ke, a wu pu mɛgɛ le na «sipya.»a3 Ba Adama ya yee xhuu nigin ni kɛlɛɛ taanri (130) ta wɛ, a wu ja wa se wuyɛ jaa ni, ba wuyɛ pyaa ki ɲɛ wɛ. A wu wee mɛgɛ le na Sɛti. 4 Sɛti na se xɔ, a Adama di yee xhuu gbarataanri (800) ta. A wu jalaa ni pushaa pii se. 5 Adama ya shi wemu ta ge, a wee di bye yee xhuu gbarashɛɛrɛ ni kɛlɛɛ taanri (930). A wu na xu.
6 Ba Sɛti ya yee xhuu nigin ni kaguro (105) ta wɛ, na Enɔsi se. 7 Enɔsi na se xɔ, a Sɛti di yee xhuu gbarataanri ni gbarashuun (807) ta. A wu jalaa ni pushaa pii se. 8 Sɛti ya shi wemu ta ge, a wee di bye yee xhuu gbarashɛɛrɛ ni kɛ ni shuun (912). A wu na xu.
9 Ba Enɔsi ya yee kɛlɛɛ gbarashɛɛrɛ (90) ta wɛ, na Kena se. 10 Kena na se xɔ, a Enɔsi di yee xhuu gbarataanri ni kɛ ni kaguro (815) ta. A wu jalaa ni pushaa pii se. 11 Enɔsi ya shi wemu ta ge, a wee di bye yee xhuu gbarashɛɛrɛ ni kaguro (905). A wu na xu.
12 Ba Kena ya yee kɛlɛɛ gbarashuun (70) ta wɛ, na Malalɛli se. 13 Malalɛli na se xɔ, a Kena di yee xhuu gbarataanri ni kɛlɛɛ shishɛɛrɛ (840) ta. A wu jalaa ni pushaa pii se. 14 Kena ya shi wemu ta ge, a wee di bye yee xhuu gbarashɛɛrɛ ni kɛ (910). A wu na xu.
15 Ba Malalɛli ya yee kɛlɛɛ gbaara ni kaguro (65) ta wɛ, na Zhɛrɛdi se. 16 Zhɛrɛdi na se xɔ, a Malalɛli di yee xhuu gbarataanri ni kɛlɛɛ taanri (830) ta. A wu jalaa ni pushaa pii se. 17 Malalɛli ya shi wemu ta ge, a wee di bye yee xhuu gbarataanri ni kɛlɛɛ gbarashɛɛrɛ ni kaguro (895). A wu na xu.
18 Ba Zhɛrɛdi ya yee xhuu nigin ni kɛlɛɛ gbaara ni shuun (162) ta wɛ, na Henɔki se. 19 Henɔki na se xɔ, a Zhɛrɛdi di yee xhuu gbarataanri (800) ta. A wu jalaa ni pushaa pii se. 20 Zhɛrɛdi ya shi wemu ta ge, a wee di bye yee xhuu gbarashɛɛrɛ ni kɛlɛɛ gbaara ni shuun (962). A wu na xu.
21 Ba Henɔki ya yee kɛlɛɛ gbaara ni kaguro (65) ta wɛ, na Mɛtusela se. 22 Henɔki bi ɲaari ni Kilɛ ni. Mɛtusela na se xɔ, a Henɔki di yee xhuu taanri ta (300). A wu jalaa ni pushaa pii se. 23 Henɔki ya shi wemu ta ge, a wee di bye yee xhuu taanri ni kɛlɛɛ gbaara ni kaguro (365). 24 Henɔki bi ɲaari na sahaŋi ni Kilɛ ɲidaan ni. A wu ba bye wu ɲɛ wɛ, bani Kilɛ ya wu lɔ.b
25 Ba Mɛtusela ya yee xhuu nigin ni kɛlɛɛ gbarataanri ni gbarashuun (187) ta wɛ, na Lɛmɛki se. 26 Lɛmɛki na se xɔ, a Mɛtusela di yee xhuu gbarashuun ni kɛlɛɛ gbarataanri ni shuun (782) ta. A wu jalaa ni pushaa pii se. 27 Mɛtusela ya shi wemu ta ge, a wee di bye yee xhuu gbarashɛɛrɛ ni kɛlɛɛ gbaara ni gbarashɛɛrɛ (969). A wu na xu.
28 Ba Lɛmɛki ya yee xhuu nigin ni kɛlɛɛ gbarataanri ni shuun (182) ta wɛ, na ja se. 29 A wu wee mɛgɛ le na Nuxhun.c A wu jo: «We na ba wèe logoo ɲiŋɛ wù keŋɛ labye wu bɛɛri, ni wù kanhama pu bɛɛri ni ke ɲiŋɛ ke na, kee kemu Tɛhɛnɛ Baa Kilɛ ya laŋi ge.» 30 Nuxhun na se xɔ, a Lɛmɛki di yee xhuu kaguro ni kɛlɛɛ gbarashɛɛrɛ ni kaguro (595) ta. A wu jalaa ni pushaa pii se. 31 Lɛmɛki ya shi wemu ta ge, a wee di bye yee xhuu gbarashuun ni kɛlɛɛ gbarashuun ni gbarashuun (777). A wu na xu. 32 Ba Nuxhun ya yee xhuu kaguro (500) ta wɛ, na jalaa taanri se: Sɛmu ni Kamu ni Zhafɛti.