Kayɛn ya wu cuun Abɛli gbo
4
A Adama ni wu shɔ Awa di binnɛ, a wee di yere yacɛrɛ na, na Kayɛn se, na jo: «Nɛ ná se Tɛhɛnɛ Baa Kilɛ fanha ni.» 2 Lee kadugo na a wu Kayɛn cuun Abɛli se. A Abɛli di bye yatɔɔnahama, a Kayɛn di bye faapye. 3 Ba tuun wa ya toro wɛ, a Kayɛn di wu faa yaŋmuyɔ ya wolo kan Tɛhɛnɛ Baa Kilɛ mu saraga wu kasaaŋaa wuu na. 4 A Abɛli bɛ di wu wo dubyapiye nizhiiye nijeye ya co gbo, na yee wo sìnmɛ xaara ti kan saraga Kilɛ mu wu kasaaŋaa wuu na. A Tɛhɛnɛ Baa Kilɛ di sɔɔ Abɛli ni wu saraga ki na.* 5 Ga wu ya ta sɔɔ Kayɛn wo saraga ki na wɛ. A Kayɛn luu di yìri xuuni, a wu ɲaha di danha. 6 A Tɛhɛnɛ Baa Kilɛ di jo: «Ɲaha kʼa ma luu yirige wɛ? 7 Ma ba kasaaŋaa pyi, ma na ba fundanga ta. Ga ma ba kakuuyo pyi, kuumɔ na daha ma fɛni tuun bɛɛri ni, na giin di se ta ma na. Ga mu wʼa yaa na se ta kuumɔ pu na!»8 Lee bɛ na a Kayɛn di wu cuun Abɛli pye: «Wù shɛ kɛrɛyɛ yi ni.» A pʼi gari wà. Ga na pu yaha kɛrɛyɛ yi ni, a Kayɛn di yìri wu cuun wu fɛni na wu gbo.*
9 A Tɛhɛnɛ Baa Kilɛ di Kayɛn pye: «Mii ma cuun Abɛli di ɲɛ wɛ?» A wu wu ɲɔ shɔ na: «Nɛ cɛ wɛ. Ta nɛ wu wa na cuun wu kasɛɛgɛ pyevɔɔ?» 10 A Kilɛ di jo: «Ɲaha mʼa pye wɛ? Ma cuun wu shishan pu mʼa wo ge, pu wa ba sɛɛri ɲɛ wɛ, na sipyaa suu na nɛ wu yogo jo wu kaa na.* 11 Nimɛ, ɲiŋɛ ke kʼa ki ɲɔ mugi na mu cuun wu shishan pu gba ge, mu ya laŋi kee na. 12 Ma ba faa pye ɲiŋɛ ki na, ma da kuduun ta wɛ. Ma na ba bye sipyiɲaraga ni sipyitaŋa ɲiŋɛ ke na.» 13 A Kayɛn di Tɛhɛnɛ Baa Kilɛ pye: «Nɛ jaagi kanhama pʼa pɛlɛ. Nʼa da já pe bɛɛri ku wɛ. 14 Li wii, mʼa na kɔri niɲaa ke ɲiŋɛ ke na. Nɛ na ba ŋmɔhɔ ma na, di bye sipyiɲaraga ni sipyitaŋa ɲiŋɛ ke na. Wa bɛɛri bu na ta wu na gbo.» 15 A Tɛhɛnɛ Baa Kilɛ di wu pye: «Sipyaa sipya wʼa Kayɛn gbo ge, Kayɛn gbuuro ti foo na dɔ ma na tɔɔɲii gbarashuun.» A Tɛhɛnɛ Baa Kilɛ di fɛ kpɔn Kayɛn na, kɔnhɔ sipyaa sipya wʼa wu ɲa ge, wu ganha da wu gbo wɛ. 16 Lee kadugo na a Kayɛn di laha Tɛhɛnɛ Baa Kilɛ tàan, na shɛ diin Nɔdia fiige ki ni, kee ɲɛ Edɛni fiige ki Kilɛ-nɔhɔ ki na.
17 A Kayɛn ni wu shɔ wu binnɛ, a wee di Xhenɔki se. A Kayɛn di kulo sin, na li mɛgɛ le wu ja Xhenɔki na. 18 A Xhenɔki di Iradi se, a Iradi di Mexhujayɛli se, a Mexhujayɛli di Metushayɛli se, a Metushayɛli di Lemɛki se. 19 A Lemɛki di cèe shuun leŋɛ, nigin wa mɛgɛ bye na Ada, shuun wo wu mɛgɛ di ɲɛ na Zila. 20 A Ada di pya ta na wu mɛgɛ le na Jabali. Piimu pʼa yapɔrɔyɔ maraa, na shuun na ɲaari fàya piyɛyɛ ni ge, Jabali wʼa pye pee wo tolɛ. 21 Jabali wo ceborona mɛgɛ ki bye na Jubali. Piimu bɛɛri pʼa konɔyɔ kpuun, na maya wi ge, Jubali wʼa pye pee bɛɛri wo tolɛ. 22 A Zila bɛ di pya wa se, na wu mɛgɛ le na Tubali-Kayɛn. A wee di bye tudun, na ganha na daɲaa ni tɔɔrɔ yagboyo yi yari. Tubali-Kayɛn wo ceboroshɔ wu bye Nama.
23 Caŋa ka, a Lemɛki di ba wu cèe pu pye:
«Ada ni Zila, yi ɲuwegee shan!
Lemɛki cèe, yi logo na ɲɔ na!
Nɛ sipya gbo na wo tabanaga ki footɔnɔ.
Nɛ nɔhɔcɛrɛɛ gbo na wo kpɔɔnrɔ ti footɔnɔ.
24 Ni Kayɛn wo gbuuro ti foo li wʼa dɔni tɔɔɲii gbarashuun,
Lemɛki wuu li na ba dɔ fo tɔɔɲii kɛlɛɛ gbarashuun ni gbarashuun (77).»
25 Lee kadugo na a Adama ni wu shɔ wu binnɛ sanha, a wu ja nigin wa bɛ ta, na wee mɛgɛ le na Sɛti, na jo: «Kayɛn ya Abɛli wemu gbo ge, Kilɛ ya ja watii kan nɛ mu wu tɛgɛ.» 26 A Sɛti bɛ di ba ja wa se, na wee mɛgɛ le na Enɔsi. Wee tuun wu ni, a sipyii di ɲɔ kɔn na Kilɛ pɛlɛ, na wu mɛgɛ yiri na Tɛhɛnɛ Baa Kilɛ.