Jurumu nizhiimɛ wu keree
3
Tɛhɛnɛ Baa Kilɛ bi sige yaŋmuyɔ yemu bɛɛri yàa ge, wɔ* wu bi shiige yisaya bɛɛri na. A wɔ wu ba cee wu pye: «Can na, Kilɛ wʼa jo na yee ganha ba tiire kɛrɛyɛ yi tiye yi bɛɛri nagoo li-i ya?» 2 A cee wu wu ɲɔ shɔ na: «Wèe na já da tiire kɛrɛyɛ yi bɛɛri nagoo li. 3 Ga tige ke ki wa tiire kɛrɛyɛ yi niŋɛ ki ni ge, Kilɛ ya jo na: ‹Wù ganha da kee pya li wɛ, wù ganha da gbɔn bɛ wu na wɛ. Lee ga bye, wèe na xhuu.› » 4 A wɔ wu cee wu pye: «Yee da xhuu wɛ dɛ! 5 Ga Kilɛ ya li cɛ na caŋa kemu yʼa da kee tige ke pya wa li ge, yee ɲìi na mugi, yi na bye ba Kilɛ ɲɛ wɛ: yi na kasaaŋaa ni kakuuŋɔɔ bɛɛri cɛ.»6 A cee wu tige pya wu ta wʼa ɲɔ ɲɛwiinɛ ni, na wu na daan talige ni, na wu na já fungɔngɔ fɛɛrɛ kan sipya mu, na ma pye keree bɛɛri cɛvɔɔ, bani fungɔngɔ fɛɛrɛ wa wu ni. A wu tige pya wa lɔ li, na wa kan wu poo wu bɛ mu wuyɛ tàan. A wee bɛ di wee li. 7 Wee tuun wu ni a pu bɛshuun ɲìi di mugi. A pʼi li cɛ na pee ceepilegee wuu pu ɲɛ. A pʼi nitoroŋɔ wɛyɛ jooli nɔrɔ yiyɛ na na pye pu fàya.
8 Ba yakoŋɔ kʼa pa nɔ wɛ, a pʼi Tɛhɛnɛ Baa Kilɛ mujuu logo tiire kɛrɛyɛ yi ni wu na ɲaari. A ná wu ni wu shɔ wu baa shɛ ŋmɔhɔ Tɛhɛnɛ Baa Kilɛ ɲaha na, kɛrɛyɛ yi tiire ti tɛ ni. 9 A Tɛhɛnɛ Baa Kilɛ di ná wu yiri na wu pye: «Mii mʼa wa wɛ?» 10 A wu wu ɲɔ shɔ na: «Nɛ mu mujuu logo tiire kɛrɛyɛ yi ni na fya, na nayɛ ŋmɔhɔ, bani nɛ ceepile wo wu ɲɛ.» 11 A Tɛhɛnɛ Baa Kilɛ di jo: «Jɔgɔ wʼa mu pye na mu ceepile wo wu wa wɛ? Tige kemu nagoo na nɛ mu sige tiire kɛrɛyɛ yi ni ge, wee pya wa mʼa li gɛ?» 12 A ná wu wu ɲɔ shɔ na: «Cee we mʼa kan nɛ mu wu bye na tàan ge, wee wʼa tige pya wa kan nɛ mu nɛ li.» 13 A Tɛhɛnɛ Baa Kilɛ di cee wu pye: «Ɲaha na mʼa lee pye wɛ?» A cee wu wu ɲɔ shɔ na: «Wɔ wʼa nɛ faanna, a nɛ wu li.»a 14 A Tɛhɛnɛ Baa Kilɛ di yi jo wɔ wu mu na:
«Le mʼa pye ge,
lee wuu na ma na ba laŋi yapɔrɔyɔ
ni sige xaara ti bɛɛri tɛ ni.
Ma na ba fuulo ma yacɛrɛ na.
Puuro na ba bye ma yalige
ma shi caŋa ɲɛhɛɛ ki bɛɛri ni.
15 Nɛ na tobɛɛnrɛ le ma ni cee tɛ ni.
Tee na bye mu ni wu nagoo bɛ tɛ ni.
Wa ba ma ta wu na ma ɲuŋɔ tɔnhɔnɔ.
Ma bɛ ba wa ta ma na wu nɔ wu ɲidavenɛ na.»b
16 A Kilɛ di cee wu pye:
«Nɛ na ba la fara ma lahaa kanhama na.
Ma na ba gana lahaa taseŋɛ ni.
Ma ɲidaan na ba ma ɲaha ɲɛri ma poo yíri,
wʼa bye ma ɲuŋɔfɔɔ.»
17 A Kilɛ di ná wu pye: «Nɛ ya ma pye ma ganha bu tige kemu pya li wɛ ge, mʼa ma shɔ wu ɲɔmɛɛ co na wee li. Lee wuu na:
‹Ɲiŋɛ ya laŋi mu wuu na.
Ma na ba fɛnhɛ ganha xuuni
mʼa na ma ɲɔlige ta na foro ɲiŋɛ ki ni,
ma shi caŋa ɲɛhɛɛ bɛɛri funŋɔ ni.
18 Ki na ba xhuyo ni ɲakuuŋɔ yeege ma mu.c
Faa yaŋmuyɔ na ba bye ma yalige.
19 Ma na ba ma ɲɔlige taa ma fun fun lɔhɔ ni,
fo na shɛ ma pye mʼa kuri ɲiŋɛ ki ni tuun wemu ni,
bani kee ni mʼa foro.
Mu ɲɛ puuro,
ma na ba guri puuro ni.› »
20 A Adama di wu shɔ wu mɛgɛ le na Awa, (lee kɔ́ri ɲɛ ɲiifɛɛrɛ), bani ɲiifɛɛrɛ sipyii bɛɛri nu wu ɲɛ wii. 21 A Tɛhɛnɛ Baa Kilɛ di sɛɛgɛ fàya yàa Adama ni Awa mu pu faleye. 22 A Tɛhɛnɛ Baa Kilɛ di jo: «Sipya ya pye ba wèe ɲɛ wɛ, bani wʼa kakuunɔ ni kasaana cɛ. Wù wu ɲaha kɔn nimɛ wu ganha da wu keŋɛ yeege wu Ɲiifɛɛrɛ Tige pya wa lɔ li, wu diin ɲiifɛɛrɛ ni xubaa wɛ.»d 23 A Tɛhɛnɛ Baa Kilɛ di wu kɔri yeege Edɛni fiige ki tiire kɛrɛyɛ yi ni. Ɲiŋɛ kemu ni wʼa foro ge, kɔnhɔ wu shɛ faa pyi kee na. 24 Lee na wʼa Adama kɔri yeege wà. Mɛlɛkɛɛ pii bye wà, pee mɛgɛ ɲɛ na serubɛɛn, a wu pee yaha Edɛni tiire kɛrɛyɛ yi Kilɛ-nɔhɔ ki na ni na ŋmɔpara ni, lee na figi na Ɲiifɛɛrɛ Tige ki kasɛɛgɛ pyi.