Caŋa gbarashuun wogo ke
2
Lee yaagana li na fugba, ni ɲiŋɛ, ni ki yaŋmuyɔ bɛɛri wʼa yàa. 2 Ba Kilɛ ya wu labye wu xɔ wá caŋa gbarashuun wogo ki na wɛ, na ŋmɔ caŋa gbarashuun wogo ki na wu labye wu bɛɛri na.* 3 A Kilɛ di duba caŋa gbarashuun wogo ki mu; na ki yaha wuyɛ yahama ni, na li kaɲuŋɔ pye wʼa wu labye wu bɛɛri xɔ, na ŋmɔ kee caŋa ke.4 Kee ki wa fugba we ni ɲiŋɛ ki wo keree, yi niyaaxhɔgɔ na.
Kilɛ ya Adama ni Awa yàa
Tuun wemu ni Tɛhɛnɛ Baa Kilɛ ya fugba ni ɲiŋɛ ki yàa ge, 5 tire nigin bɛ bye ɲiŋɛ ki na wɛ. Ɲà kana nigin bɛ bi sanha fin ɲiŋɛ ki na wɛ, bani Tɛhɛnɛ Baa Kilɛ bi sanha zanha shan ɲiŋɛ ki na wɛ, sipya bɛ di bye ɲiŋɛ ki na wemu na da faa pyi wɛ. 6 Kafugo ki bi ma fòro ɲiŋɛ ki ni, na mɛŋɛ kpɔɔn, kee di ɲiŋɛ ki fugba wu bɛɛri ɲiŋɛɛ. 7 A Tɛhɛnɛ Baa Kilɛ di ɲiŋɛ puuro lɔ, na ti yàa sipya, na ɲiifɛɛrɛ kafɛɛgɛ le wu munawegee ni ni wuyɛ pyaa ɲɔ kafɛɛgɛ ni. A sipya wu bye ɲiifɛɛrɛ na*.
8 Lee kadugo na a Tɛhɛnɛ Baa Kilɛ di tiire kɛrɛyɛ yàa Edɛni fiige ki Kilɛ-nɔhɔ ki na. Ná we wʼa yàa ge, na wee yaha wà. 9 Tige tige kʼa ɲɔ ɲɛwiinɛ ni, na daan talige ni ge, a Tɛhɛnɛ Baa Kilɛ di yee bɛɛri tuuyo pye yʼa fin foro ɲiŋɛ ki ni. Ɲìi sicuumɔ tige, ni kasaaŋaa ni kakuuŋɔɔ bɛɛri cɛmɛ tige* kʼi ɲɛ tiire kɛrɛyɛ yi niŋɛ ki ni.
10 Gba lɔhɔ ka bi fúu na yìri Edɛni koomɔ pu ni, na lɔhɔ kaan naxhoo wu tiire ti mu. A gba wu daa wee xuu wu ni na pye gba keye shishɛɛrɛ. 11 Keŋɛ nizhiimɛ ki mɛgɛ bye na Pishɔn, kee bi Xhavila koomɔ pu bɛɛri maha, sanni wu bye wee xuu wu ni. 12 Sanni nijemɛ wu bye pee koomɔ pu wo sanni we. Tige kuro nudanga wuuro ta mɛgɛ ki ɲɛ na bideliyɔn, tee kuro te ni onikisi kagereye bɛ ya daa wà. 13 Gba keŋɛ shuun wogo ki mɛgɛ ki bye na Giyɔn, kee bi Kushi fiige ki bɛɛri maha. 14 Gba keŋɛ taanri wogo ki mɛgɛ bye na Tigire. Kee bi fúu Asiri fiige ki Kilɛ-nɔhɔ ki na. Gba keŋɛ shishɛɛrɛ wogo ki mɛgɛ bye na Efirate.
15 A Tɛhɛnɛ Baa Kilɛ di ná wu yaha Edɛni tiire kɛrɛyɛ yi ni, na wʼa yi faani wu da yi kasɛri. 16 A Tɛhɛnɛ Baa Kilɛ di le ɲɔmɛɛ le jo ná wu mu na: «Ma na já da tiire kɛrɛyɛ yi tiye yi bɛɛri nagoo li, 17 ga tige kemu ki wa kasaaŋaa ni kakuuŋɔɔ bɛɛri cɛmɛ tige ki ge, ma ganha kee li wɛ, bani ma ga kee li caŋa kemu mʼa xu!»
Cee yaagana
18 A Tɛhɛnɛ Baa Kilɛ di jo: «Li ya ɲɔ ná wu pye wuyɛ nigin wɛ. Nɛ na wu tuugo tɛgɛvɔɔ yàa wu mu.» 19 A Tɛhɛnɛ Baa Kilɛ di sige xaara ni fugba shazhɛɛrɛ bɛɛri yàa na yeege ɲiŋɛ ki ni. Na ba ni ti ni ná yíri, na wu wii yirigana lemu na wu da da ti yiri ge. Ná wʼa mɛgɛ kemu le kemu na ge, a kee di bye kee wo mɛgɛ. 20 A ná wu yapɔrɔyɔ ye, ni fugba shazhɛɛrɛ, ni sige xaara ti bɛɛri mɛyɛ le.
Ga tɛgɛvɔɔ ya ta ná wu mu wemu wu ɲɛ ba wu ɲɛ wɛ. 21 A Tɛhɛnɛ Baa Kilɛ di ŋmunugbɔ wá ná wu na. Na wu yaha pee ŋmunumɔ pu na, a Kilɛ di ná wu gbodipile nigin lɔ, na wu ceexaara ta yaha lee talɔgɔ ki ni na taga kee wege ki tɔ. 22 Gbodipile le Tɛhɛnɛ Baa Kilɛ ya lɔ ná wu ni ge, na lee taga cee yàa, na ba ni wu ni ná yíri. 23 Ba ná wʼa cee wu ɲa wɛ, na jo:
«Wii mɛ, nɛ kaciige ka ki ɲɛ ke.
Nɛ ceepuuro ta ti ɲɛ te.
We mɛgɛ na bye ‹Ceea›,
bani wʼa foro ná ni.»
24 Lee lʼa li pye ná na ba wu to ni wu nu yaha, na nɔrɔ wu shɔ na. Pu na ba bye ceepuuro nigin.* 25 Ná ni wu shɔ wu ni, pu shuun wu bɛɛri ceepilegee wuu pu bye, pu bi ta shiige cɛ wɛ.