2 Timote 2

Kílisi yɛ bháalakɛdhye ŋó

Íle, nyénjɛ, nɛ́nmɛn míin sɔ́ɔla ní Ɛnza Ngílisi le, í yɛ́ bháaka o ɲíin o nɛ́nmɛn o lɔ. 2 Í wɛ́ɛ kaa mín nzɔ́ɔ né fɛ sɛ́ɛya shɛ́ɛman ɲánla, o láse lánanmɔɔn olu mán mínnu sé kɛ mɔɔn gbɛ́ɛlu kála o la. 3 Tɔ́lɔya myaan ni né le óo Ɛnza Ngílisi yɛ kɛɛkɛdhyemɛɛ. 4 Kɛɛkɛdhye nzí tɛ́ swaasiya o lɔ, míin sɔ́n kɛ dínɲanlɔtɛɛ kó olu lo a yóso o lɔ, ní aa fɛ ké a yɛ kó á dhyáa a kúnndii o yɛ. 5 Bweetabhaa o tɛ́ yáa sɔɔla ní a mán bwée o tá kɛ bhyɛ sɛliya o mán. 6 Sɛɛnkɛbhaa mín ŋé a yɛ́ɛ díla bháala o mán, o lé kákan kɛ kɛ́ mɔɔn jónan le kɛ a nin ŋó sɔ́ɔ. 7 Ní mín nvɔla i yɛ, o á tó í kɔ́ɔnnɔn; Mantii o yáa hákii dí í mán kɛ bhɔ́ o bɛ́ ɲan le.

Ɛnza Ngílisi kúun ŋo

8 Í hákii tó Ɛnza Ngílisi lɔ, o mín ŋwɛ́ɛn kúun kɛ bhɔ́ saya o lɔ, aa bhɔ́ Laula bhɔ́nzɔ ŋó le lɔ, óyoo ní fɔla ɲán mín man sanmankanmɛɛ o lɔ. 9 O sanmankanmɛɛ o kósɔn ní tɔ́lɔya lɔ, fɔ́ kɛ né síli nɛɛnyɔlɔkɔ o lá óyoo kóyoongɛbhaa. Wáa Ala yɛ kóman o kwɛ́nnin mán síli 10 O le kósɔn né sɔ́nnin ŋé kɛ tɔ́lɔya myaan Ala yɛ mɔɔn bhɔ́nin ŋólu kósɔn, ké ólu á kísi Ɛnza Ngílisi sɔ́ɔbu la, kɛ bwóɲan wɛ́ɛbhɛɛ o sɔ́ɔ. 11 Kóman míin ŋé tínɲan le lé kó:

Ní án ŋwɛ́ɛn sayakɛ ni Ɛnza Ngílisi le,

án ɲáan ɲáanmanɲan ní ale ikwɔ.

12 Ní án ngɛ́ án nɔ́ja,

án ɲáan kɛ ni ale a yɛ mansaya o lɔ.

Ní án ngɛ́ táa án mbá a lɔ,

ale yáa i bá án nɔn.

13 Ní án mán kɛ kánngeendii le,

álee kánngeendii le lé wáati bɛ́,

kɛ mansɔɔ a tɛ́ sé kɛ i bá a yɛ́ɛ lɔ.

Bháalakɛdhye mín ndɛ́ maloyala

14 Í kákan né kɛ mɔɔn ólu hákii láyii o kóman o bɛ́ lá. A fɔ i yɛ kɛ a mángbɛya cɛ́ɛne Ala ɲánla kó: I kɛ́nan tó kɛ ɲɔ́ɔn nálɔkan ŋó sɔ́sɔ, o tɛ́ fóyi ɲánla, mínnuu o lálɔsɔɔn ŋólu lɔ́myɛnnan, aa o léelu manko sala. 15 Í lɔ́ja kɛ í yɛ́ɛ yáa Ala ɲankɔɔ óyoo mɔɔn mín ŋwɛ́ɛn ko o bɛ́ lafa, bháalakɛdhye mín ndáa maloya, mín ŋé Ala yɛ kóman ó lásela ni téenin le óni tínɲan le. 16 Í manbhɔ kóman kóo ŋólu la, kóman mínnu tɛ́ bhyɛnan ni lánanya o le. Mɔɔn mínnuu i yɛ́ɛ díla o kóman ólu man olu i manbhɔla Ala lá le ló ŋóo ló. 17 I yɛ kóman ólu kínnin le kɛ́la óyoo lá míin mɔɔn fasi o cáannan. Himene ní Filɛti lée o mɔɔn lɔ́lu le. 18 Ólu wɛ́ɛ i cɛ́bhɔ kɛ tínɲan o sháa o bhyaa, kɛ fɔ kó su ólu wɛ́ɛ kúun kɛ bhá. I wɛɛ lɔ́lu yɛ lánanya o cáan o kóman ólu kósɔn.

Ala é zúbaakaman mín nzíi

19 Wáa Ala gbú é zúbaakaman mín nzíi, o tɛ́ yɛ́ɛmanla; Ala yɛ sɛ́ɛya oo a man: «Mɔɔn mínnu é Mantii o tá le, Mantii ó á olu lɔ́.» Kó: «Mɔɔn óo mɔɔn é Mantii o tá le, o tii ó á i sé mɔ́ kó kóo ŋó lɔ.» 20 Bhómba ólu kɔ́ɔnnɔn, minnan míin a kɔ́ɔnnɔn ó tɛ́ sɛ́ɛn ŋóni wɛ́ɛgbɛ le dɔ́lɔun, wáa yíilaman ŋé lɔ, óni bhɔɔlaman ŋé lɔ íkwɔ. Minnan ŋó lɔ́lu wɛɛ bhyaa kóba olu kanman, lɔ́lu wɛɛ bhyaa kó nɔ́ɔnnin ŋolu kanman. 21 Ní mɔɔn mín ngɛ́ a yɛ́ɛ lásɛnnɛnya kɛ bhɔ kó nɔ́ɔnnin ŋólu lɔ, o tíi ó yáa kɛ minnan kúugbɛɛ né, kɛ a bhyaa i láman, kɛ a kúnndii ó manko ɲán, kɛ í lɔ́bhyɛ bháalabhɛɛ ó bɛ́ kanman.

Mantii o yɛ́ bháalakɛdhye ŋó

22 Timote, bwée káweeɲan o nɛ́li ó ɲɛ́n, í lɔ́ja kɛ téeɲan o, lánanya o, dhyáaɲɔɔnya ó, óni láha ó ɲíin, ni mínnuu Mantii ó tɔ́ɔ o kíila ni yóso gbɛ́nin né, olu le. 23 Í kɛ́nan í lá ló hákiindaɲan kóman ólu lɔ, óni kóman lɔ́koo ŋólu, kɛ mansɔɔ o lábha ŋó nánla ni kɛɛ léelu le. 24 Kɛ mansɔɔ Mantii o yɛ bháalakɛdhye ŋó mánngan kɛ kɛɛ kɛ. A kákan né kɛ kɛ́ mɔɔnbhɛɛ le mɔɔn bɛ́ mán. Kɛ sé kɛ mɔɔn ólu kala, óni kɛ gbɛ́ya o lɔ́myaan. 25 Mɔɔn mínnuu á yɛ́ kóman o sɔ́sɔla, a kákan né kɛ ólu ládhye ní yósoswaanya le, kɛ mansɔɔ aa sé kɛ lá, Ala yáa sɔ́n ké ii dínmisa, kɛ tínɲan o lɔ́, 26 kɛ hákiibhɛɛ sɔ́ɔ, kɛ i yɛ́ɛ bhɔ́ Sɔtaannan yɛ yɔɲan ó lɔ; kɛ mansɔɔ Sɔtaannan oo mɔɔn ólu myaanla a yɛ yɔɲan o lɔ, ké ii ale sao o le kɛ.