1 Timote i

Pɔli é sɛ́wɛ jónan mín nje

Timote

mán

Sɛ́wɛ o kɔ́ɔnnɔnlaa o ɲánfɔ o

Pɔli ni Timote é ɲɔ́ɔn ɲé Lisitili lé, Pɔli yɛ táaman fyáaɲɔn o lɔ Lisitili sanmankanmɛɛ o láse o la. Timote é kɛ Pɔli yɛ kaamɔɔndhye né, óni Timote é táa táaman la ni Pɔli le kɛ sanmankanmɛɛ o láse. Pɔli é Timote kíila ko a dhyénjɛ (1.2; 1.18). Pɔli ko a bháalakɛɲɔɔn gbɛ́ɛ lɔ tɛ́ yé mín ni Timote a kée (Filipika olu 2.19-23). Pɔli yɛ sɛ́wɛ wɔ́ɔlɔ é Laheli Kwáa o kɔ́ɔnnɔn, Timote lée a dhyɛman kɛ olu sɛ́wɛ (2 Kolɛntika olu; Filipika olu; Kolosika olu; 1 Tesalonikika olu; 2 Tesalonikika olu; Filemɔn).

Pɔli ko Timote yɛ ko aa to Efɛzi, Egilizi mín ndɛ́ɛ yénɔn kɛ gbáamyaan o la (1.3). Pɔli é sɛ́wɛ míin nzɛ́wɛ la le, kɛ lánanbhaa olu ládhye sɛ́ɛ o ta fán nvɛ (2.1-7) óni i yóo o ká (2.8-15), ɲɛ́nmɔɔn olu mán (3), óni Timote gbú mán (4). Pɔli é ladhyeli kɛ́la fínɲaanmuso olu ta fán nvɛ́ (5.3-16), kúnndii olu ta fán nvɛ́ (5.17-25), yɔ ŋólu ni i tíi olu ta fán nvɛ́ (6.1-2) óni wɛɛ bá tíi olu ta fán nvɛ (6.17-19). Ko mínnu kákan kɛ kɛ́ Egilizi o kɔ́ɔnnɔn sɛ́wɛ míin née o ɲánfɔla án ɲɛ́n cɛ́ɛne: ɲɛ́nmɔɔnya shɛ́ɛman ŋé Egilizi o kɔ́ɔnnɔn, óni i ta ɲan lée a la, kɛ o bháala olu kɛ.

Pɔli é sɛ́wɛ kɛla i kwɔ́ kaa ngóo ŋólu kánman:

Kɛ tó ni Nvá Musa yɛ tɔ ŋólu lé (1.3-7)

Ala wɛɛ fé mɛ́ɛ mínnu la, kɛ i bá olu lɔ, mín ŋé nán kɛ fúuko o lé, óni lɔ́min fé ŋó lɔ́lu (4.1-5)

Kɛ i mili a mán óo mɔɔn sé tíminnan lánanya ó mán kɛ kɛ́ wɛɛ tíi lé (6.3-5)

Kɛ sé kɛ sháa tɛɛ kaa mínnu wé olu ɲɛ́n, Timote é káa mín nzɔ́ɔ Pɔli la, Kílisi yɛ kaamɔɔndhye ŋó, a kákan né kɛ o lamala, kɛ kɛɛbhɛɛ kɛ, ni lánanya o le óni yáakiisii o le (1.18-19).