<<    <     2 Tesalonikika olu     3     >    >> 
Pɔli yɛ́ sɛ́ɛ kún ŋó
3
O lɔ, mádhye ŋolu, áa i sɛ́ɛ án ɲɛn, ké Ala saaninkan ŋó á táa ɲɛnnvɛ jónan óni bwóɲan o á lá a ka, óo aa á fɛ́ yénɔn ɲán mín man. 2 Áa Ala dɛ́li án ɲɛn ké aa án mbwási mɔɔnyoo ŋólu ní mɔɔn súucɛyoo ŋólu mán. Kɛ mansɔɔ lánanya tɛ́ bɛ́ bhóo.
3 Wáa Mantii ó kánngeendii le le, a yáa bháaka ló á lɔ óni kɛ á látaan Sɔtaannan mán. 4 Án ŋwɛ́ɛn lá a la Mantii ó kósɔn, kó án ni mín nvɔ á yɛ́, áa o le kɛ́la óni á yáa tó o la.
5 Ké Mantii ó á á yóso o bhyáa Ala yɛ dhyáaɲɔɔnya o lɔ, óni Kílisi yɛ lɔ́jali o lɔ.
Bháala o nánfa o
6 Mádhye ŋólu, án ni fɔla á yɛ́ Mantii Ɛnza Ngílisi tɔ́ɔ o la, mɔɔn mínnu ye tó i lakɛbhɛɛ le, i bánin ŋe kɛ táaman kɛ kéeɲan ní án ɲɛn káa ŋó le, áa i cɛ́bhɔ ólu la. 7 Á kákan kɛ án manɲaan ɲán mín man, á gbúlu á o lɔ, kɛ mansɔɔ án ndɛ́ɛ á fɛ́ yénɔn wáati mín nɔn, án mán kɛ lakɛbhɛɛ le. 8 Án mán lɔ́minkɛ mɔɔn lɔ fɛ́ yé gbɛ́ɛgbɛɛ, wáa án ni tɔ́lɔya myaan, kɛ bháala kɛ, kɛ sɛɛ sú ni tee, ké án ngɛ́nan kɛ mɔɔn sí yɛ́ lwee ne 9 A tɛ óyoo a laanin ndɛ́ án ɲɛn kɛ lɔ́minkɛ á fɛ́ lɛ, wáa án ni bháala le kɛ́, kɛ yáa á lá, ké áa kɛ óo án nee kɛ́la ɲán mín man. 10 Kɛ mansɔɔ án ndɛ́ɛ á fɛ́ yénɔn wáati mín nɔn, án ndɛ́ wɛ́ɛ o kóman o fɔ́ á yɛ́ kó: «Ní mɔɔn mín ndɛ́ fɛ́ kɛ bháalakɛ, o tíi o mánngan kɛ lɔ́minkɛ.»
11 Wáa án ŋwɛ́ɛn myɛ́n kó mɔɔn lɔ́luu á cɛ́man, lakɛbhɛɛ lée olu le: Olu tɛ bháalakɛla, olu i bhyáala mɔɔn olu yɛ kó o le lɔ. 12 Án ni fɔla o mɔɔn ólu yɛ kɛ a mángbɛya Mantii Ɛnza Ngílisi kósɔn, kó ii bháala kɛ́ láha o lɔ, kɛ i bhálo o sɔ́ɔ i yɛ́ɛ yɛ.
13 Álee lu, mádhye ŋólu, á kɛ́nan í gbɔɔnɔnfaa kóbhɛɛkɛ o mán. 14 Án ŋwɛ́ɛn kóman mínnu fɔ́ sɛ́wɛ míin ngɔ́ɔnnɔn, ní mɔɔn mín ngɛ́ i bá o kóman o mán, áa o lákɔɔsi, á kɛ́nan kó ládhyɛ ni a le, ké aa maloya. 15 A kɛ́nan a yace á yúu le, wáa áa i sɛ́ɛmanla a yɛ óo á bhádhye.
Lwaau óni twaali o
16 Mantii ó míin láha o díla, ké a gbú á láha o dí á mán wáati bɛ́, óni ɲán bɛ́ mán. Ké Mantii o á tó á bɛ́ fɛ́.
17 Twaalikan míin nín, né Pɔli gbú bhóo lée o sɛ́wɛ. Né gbú bhóo nɔn lée nín, ɲɛ́n sɛ́wɛ o bɛ́ kɔ́ɔnnɔn.
18 Ké án Mantii Ɛnza Ngílisi yɛ́ nɛ́nmɛn o á tó á bɛ́ fɛ́.