Lánanbhaa olu ɲɛnmɔɔn olu
3
Kóman míin ŋe tínɲan le le: Ní mɔɔn lɔ kɛ fɔ ko a lée fɛ kɛ kɛ lánanbhaa olu ɲɛ́nmɔɔn le Egilizi o la, o tii o fɛ kɛ bháalabhɛɛ le kɛ o le. 2 O le kósɔn, lánanbhaa olu yɛ ɲɛ́nmɔɔn o kákan ne kɛ mɔɔn lɔ le, mɔɔn sí mánngan kɛ sɔ ɲóo nzɔ́ɔ mɔɔn mínnan, ké muso kée né á kɛ a kunman, ké a kɛ́nan kɛ mɔɔn lánganndiminnin ne, ké áa se a yɛ́ɛlɔmyaanla, áa kɛ mɔɔn sɛwɛman ne, ké áa kɛ mɔɔn lɔmyaan bháa le, óni áa se kɛ mɔɔn olu kala. 3 A kɛ́nan kɛ dɔ́lɔminmaaba le wáman mɔɔn ɲínmanfɛɛyanin ne, wáa a kɛ mɔɔn yóso sɔ́ɔnyanin ne, a kɛ́nan kɛ mɔɔn láɲiinbhaa le, a lo ngɛnan kɛ́ wɛ́ɛ yɛ mɔɔn le. 4 Ké aa se a yɛ bhónan bháa olu myaanla cɛ́ɛne, óni a dhyé ŋolu á kɛ́ í mányiila a yɛ, óni kɛ a bwóɲan kó o bɛ́ lɔ. 5 Kɛ mansɔɔ, ní mɔɔn mín man sé a yɛ́ɛ la bhónanbhaa olu la, o tíi oo se kɛ i yáakii tó Ala yɛ yaman o lɔ díle? 6 A kɛ́nan kɛ lánanbhaa kwaa le, ɲɔ́ɔntɛ yɛ́ɛlɔbwoɲan o sé kɛ lo a lɔ, ké kíti kée ŋó a bé ile ni Sɔtaannan ka. 7 Fɔ́ lánanbhɛɛ olu á kɛ a bwóɲanla, o bhóo o mán lɔɔyaman táa sé a mán, óni ké Sɔtaannan yɛ gée ŋo kɛ́nan sé a la.Egilizi bháalakɛbhaa olu
8 Bháalakɛbhaa mínnu Egilizi o kɔ́ɔnnɔn olu kákan né kɛ kɛ́ mɔɔn sɛwɛman nú le, i kɛ́nan kɛ kan nvyáa fɔ́bhaa lu le, i lo ngɛnan kɛ dɔ́lɔminmaaba lu le, wáman mɔɔn mínnuu wɛ́ɛ o ɲíinnan ɲán o bɛ́ man. 9 Ké sanmankanmɛɛ oo lánanya o gbondoya mín bhyáa gbɛ́ lɔ, ké ii tó o lɔ ní i yóso gbɛ́nin ŋó le. 10 Sánnin ii bháala o lamyaan aa olu mánfɛɛ otun, ni sɔ ngóo nɔ man táa kɛ i la, íi se kɛ bháala o lamyaan.
11 O ɲán kée ŋo man, muso olu á kɛ́ muso sɛwɛman nu le, i kɛ́nan kɛ mɔɔn tɔ́ɔ cáanmaa lu le, ké muso olu kɛ́nan kɛ muso lánganndiminnin nu le, ké muso olu á kɛ́ lákanngeendii lu lé kó o bɛ́ lɔ. 12 Egilizi bháalakɛbhaa o, ké muso kée ne á kɛ́ o kunman, aa sé a dhyé ŋolu lámwɔn séɲan o la, óni kɛ sé a yɛ bhó ŋó myaanla cɛ́ɛne. 13 Kɛ mansɔɔ mɔɔn mínnu wɛɛ i yɛ bháala o kɛ cɛ́ɛne i yáa olu bwóɲan, óni o tii olu yáa se kómanla ni tɛ́ɛnga ne lánanya o lɔ, lánanya míin án ngɛla kéene ní Ɛnza Ngílisi le.
Gbondoya míin yáala án nan lánanya o lɔ
14 Ní sɛ́wɛ míin nátaala i man wáa ne yíi e a man oo a táa myɛ́n bhée ɲáan se i fɛ́ yé. 15 Wáa ni ngɛ myɛ́n ké mán ngwɔ́sɛɛ yénɔn bha, i kaa táamankɛ ɲán mín mán Ala yɛ́ bhó ŋo la i yáa o lɔ, o míin Ala ɲáanman ŋo yɛ Egilizi o le, tínɲan o sɛnmɛnnin ŋé Egilizi mín nan. 16 Tínɲan in ne án ngákan kɛ a lɔ ŋóo gbondoya míin yáala án nan lánanya o lɔ, o á bwó:
Aa a yɛ́ɛ kɛ mɔɔn le kɛ i yɛ́ɛ yáa án nán,
Ní Sɛ́nnɛnyanin ŋoo yáa kó a teenin ɲe,
malɛɛka olu a yé,
a ko e láse síya gbɛ́ɛ olu man,
mɔɔn olu lo ŋé la a lá dinɲan ywáa bɛ́ lɔ,
Ala é a kɔɔta a yɛ nɔ́lɔya o lɔ.