2 Timote 1

Pɔli é sɛ́wɛ fyáaɲɔn mín nátaa

Timote

mán

Twaali o

A fáanan Pɔli la, mín ŋe Ɛnza Ngílisi yɛ céladhye ne, Ala sao o lɔ, kɛ kéeɲan ni ɲáanmanɲan o láheli o le, o ɲáanmanɲan míin sɔ́ɔla Ɛnza Ngílisi la. 2 Kɛ dí Timote mán, nyénjɛ mín ŋan dí ɲɛ́n, ké Fa Ala óni Ɛnza Ngílisi, o míin án ɲɛn Mantii o le, o yɛ nɛ́nmɛn óni hínnɛn óni láha o á kɛ í fɛ́.

Kɛ Ala kóɲwaan lɔ

3 Ní ngɛ́ kɛ Ala dɛ́lila sú ni tée, né yáakii é í lɔ́ wáati bɛ́. Ní bálika bhɔ́la Ala yɛ í yɛ, ní bháalakɛla Ala mín ɲɛ́n ní ɲósogbɛnin ne, óyoo né bhyɛ́man ólu a kɛ ɲán mín man. 4 Í yélɔɔ é nán gbútuukɛ, í tɛ́ɛ kásila ɲán mín man, óo ngɔ́ɔnnɔn, ní fɛ kɛ í yé ké ní fá nísɔdhyaa o la.

Gbɛya ó sanmankanmɛɛ o kósɔn

5 Í sɛ́wɛ é lánanya o mán tɛ́nmɛn ne, né hákii é o lɔ, o lánanya mín ndɛ́ɛ í mwáan Loyisi lɔ óni í wóobhaa Enisi. Né lánin ŋé a la, óo o lánanya o íle lɔ íkwɔ. 6 O le kósɔn, nín móo o la í ká kɛ Ala dɛ́li í yɛ mínngɛ, Ala é mín ndí í man, ní o ko bhyáala í kɔ́ɔnnɔn, ké íi o láfyɛ óyoo tá. 7 Kɛ mansɔɔ Ala é Ní mín ndí án man, o tɛ́ án ngɛla sháanmaatɔ le, wáa aa sébhaaya o le díla án man, óni dhyáaɲɔɔnya, óni kɛ án ɲɛ́ɛ lɔ́myaan. 8 O le kósɔn í kɛ́nan maloya kɛ án ɲɛn Mantii o sɛ́ɛya ládi, í kɛ́nan maloya né tá kó o lɔ, né míin a yɛ kásoladhye ne. Tɔ́lɔya myáan ni né lé Sanmankanmɛɛ o kósɔn, kɛ kéeɲan ni Ala yɛ sébhaaya o le. 9 Ala lée án ngísi, ale lée án ngíi ké án ni kɛ ale gbú yɛ mɔɔn sɛ́nnɛnyanin ŋólu le. O mán kɛ án ɲɛn kóbhɛɛ ólu kósɔn, Ala é o kɛ́ a gbú yɛ kó látɛɛnin ŋóni a yɛ nɛ́nmɛn o le kósɔn, Ala é nɛ́nmɛn o dí án man, án nee mínnu é ní Ɛnza Ngílisi le, ké dínɲan mán i lámyaan bhá. 10 Kwáalenin án Ngísibhaa Ɛnza Ngílisi é nan o nɛ́nmɛn o le yáa án nan, Ɛnza mín ŋwɛ́ɛn saya o fáan o cáan, kɛ nan ɲáanmanɲan wɛ́ɛbhɛɛ o bhyaa gbɛlɔ Sanmankanmɛɛ o sɔ́ɔbu la. 11 O sanmankanmɛɛ o láse o le yɛ́ɛ kósɔn Ala é ne kɛ céladhye ne, óni kaamɔɔn le. 12 O le yɛ́ɛ kósɔn tɔ́lɔya míin bɛ́ɛ né ka, waa maloya tɛ ne la, kɛ mansɔɔ ne lánin ŋé mɔɔn mínnan ne á o lɔ, ne lo ŋán lɔ ŋóo Ala wɛɛ fé mín ngɛ́ɛfa né mán, sé é a yɛ kɛ o lamala kɛ táa se fɔ́ dinɲan labha ŋo man. 13 Ní í kala kóman sɛ́nnɛnyanin mínnu la, táamankɛ kɛ kéeɲan ní olu le, ni lánanya le óni dhyáaɲɔɔnya le, mín ŋe sɔɔla Ɛnza Ngílisi la. 14 Fémɛɛ mín ŋé kɛ́ɛfa í mán, o lamala cɛ́ɛne, Ní Sɛ́nnɛnyanin ŋó bháaka lɔ o mín ŋé án nɔn.

Onesifɔni yɛ́ lɔ́jali o

15 Íle gbú lo ŋán a lɔ ŋóo mɔɔn mínnuu Azi bhóo o kɔɔ olu wɛɛ í bá né lɔ, Fijɛli ni Elimɔjɛli é o sɛɛ o lɔ. 16 Ké Mantii o á kóbhɛɛ kɛ́ Onesifɔni yɛ bhónanbhaa olu bɛ́ yɛ, kɛ mansɔɔ kɛ né tó kasola aa ne yóso swáanya kó shɛ́ɛman ngɛ, a mán maloya né man. 17 Wáa, aa sé Lɔmu mínngɛ, aa ne ywáaɲiin fɔ́ kɛ táa né ywáa yé. 18 Aa bháalabhɛɛ súu óo súu kɛ né yɛ Efɛzi, íle gbú o á o lɔ kɛ tinmin mɔɔn bɛ́ ka. Ké án Mantii o á sɔ́n, ké Mantii o á hínnɛn a la kítitɛɛ ló ŋo la.