2 Timote 3

Gbɛ́ya mínnu káa kɛ wáati lábha ŋó lɔ

Timote, kóman míin ŋan tó í hákii la, dinɲan lábha wáati ó yáa gbɛ́ya. 2 Adamandhye ŋólu káa kɛ í milila a yɛ́ɛ le man, óni i yáa wɛ́ɛ o kɛ́ i twáanva le, óni i yáa wáso í yɛ́ɛ la, óni i yáa i yɛ́ɛ lɔ́bwoɲan, óni i yáa Ala tɔ́ɔ o cáan, óni i yáa múluti i wóobhaa lu mán, óni i yáa kɛ kóɲwaanlɔmɛɛ lu le, óni i yáa kɛ mɔɔn lu le mínnu tɛ fé nzɛ́nnɛnyanin ŋolu yacesiila. 3 I yáa kɛ mɔɔn yósonda nu le, mɔɔn kólɔgbɛɛ nu le, mɔɔn tɔ́ɔcaanmaa lu le, yɛɛlɔmyaanbhɛɛ lu le, mɔɔn fɛ́ɛyanin nu le, kóbhɛɛ o mán dí i yɛ, 4 mɔɔn yánvabhaa lu le, mɔɔn lánganndiminnin nu le, óni mɔɔn mín ɲɛn yɛ́ɛlɔbwoɲan o wɛɛ a kɛ fyóo ne. I dhyáaɲɛnngo ólu yáa dhyaa i yɛ kɛ tinmin Ala tá o ka. 5 I yáa kɛ óyoo mɔɔn mínnu sháannan Ala ɲɛn, wáa faan mín ŋé o kwɔ́man, i yáa í bá o man. Í manbhɔ o mɔɔn ólu la. 6 O mɔɔn lɔ́luu lónan bhó ŋólu kɔ́ɔnnɔn lóonɔn, bháaka tɛ muso mínnu lɔ kɛ o lɔ́lu lánɛɛn, muso mínnu yɛ yúumu e í kúnman, óni muso mínnu nɛ́li yóo mbɛ́ súu kwɔ. 7 O muso ólu fɛ kɛ kó shɛ́ɛman nɔ́, wáa i tɛ séla kɛ tínɲan o lɔ́ninya o sɔ́ɔ kɛ a lɔ́. 8 Zanɛsi ní Zabɛlɛsi é céla Musa sɔ́sɔ o ɲán o lé mán, o mɔɔn ólu tínɲan o sɔ́sɔla o ɲan o le mán. O mɔɔn ólu yɛ hákiitiiya o mánɲin, i yɛ lánanya o mán fóyi ɲán i man. 9 Wáa i táa sé sɔ́ɔ kɛ táa ɲɛ́n, kɛ mansɔɔ a lábha ŋó la bɛ́ yáa a lɔ́ kó hákiinda née ile, óo Zanɛsi ní Zabɛlɛsi tá o kɛ ɲán mín man.

Timote wɛ́ɛ fé mín nálee

10 Wáa íle, íi né yɛ kaa ŋó lɔ́ cɛ́ɛne, óni né táamankɛseɲan o, íi ɲɛ́n kó látɛɛnin ŋólu lɔ́, óni ɲɛ́n lánanya o, óni né yɛ yósoswaanya o, óni né yɛ dhyáaɲɔɔnya o, óni né yɛ lɔ́jali o, 11 óni né yɛ tɔ́lɔya o, óni ní sɛɛ mín myaan Antiyɔsi, óni Ikoniyɔmu, óni Lisitili. Tɔ́lɔya mínnɛɛn lée yé, tó né mán o lɔ́myaan bha? Wáa Mantii o wɛ́ɛ né kísi kɛ né bhɔ́ o bɛ́ lɔ. 12 Mɔɔn óo mɔɔn é fɛ́ kɛ dínɲanlɔtɛɛ o kɛ óyoo aa dí Ala yɛ ɲán mín man ní Ɛnza Ngílisi le, mɔɔn olu yáa olu tɔ́lɔ. 13 Wáa mɔɔnyoo ŋólu ní nánmaanmɔɔn ólu yáa táa ɲɛ́n ló ŋóo ló koyoongɛ o lɔ, kɛ mɔɔn tɔ́ ólu láfii óni kɛ i gbúlu láfii. 14 Íle kwɛ́nnin, í wɛ́ɛ kaa mín nálee, óni í wɛ́ɛ o mín nzɔ́ɔ ni lánanya le, íi tó o lɔ. Íi lɔ́ ŋóo íi o sɔ́ɔ kaamɔɔn mín nan. 15 Kabiini í dhyémuu tɔ o, íi sɛ́wɛ sɛ́nnɛnyanin ŋólu kóman ólu lɔ́; olu sé kɛ hákiitiiya dí í mán, hákiitiiya mín ŋe se kɛ í dhyɛman kɛ kísili o sɔɔ, kísili mín ŋe sɔ́ɔla lánanya míin Ɛnza Ngílisi la o bháaka lɔ. 16 Kɛ mansɔɔ sɛ́wɛ Sɛ́nnɛnyanin ŋó kóman o bhɔ́ Ala le lɔ, tɔɔn é a lá kɛ mɔɔn ólu kála, nafa é a la, kɛ mɔɔn ólu látee, kɛ mɔɔn ólu kolo ke ii bhyaa sháa téenin ŋo ka. 17 Sɛ́wɛ sɛ́nnɛnyanin ŋo bháaka lɔ, Ala yɛ bháalakɛdhye ŋó lɔ́bhyɛnin ɲáan kɛ ní a yɛ bháalakɛ fé ŋo bɛ́ le, kɛ bháalabhɛɛ o bɛ́ súu kɛ.