Passambajang sola mangsukkuruꞌ
Mangsukkuruꞌ
40
Dipatuju lako tomangpalunna tomakkelong. Kelongna Raja Daud.2 Sabbaraꞌnaꞌ ntajan pangtulung-Na Puang Allataala,
Naparinawanaꞌ sola Napesaꞌdingngi to petaꞌdangkuꞌ.
3 Nalaꞌparannaꞌ jio mai abalaꞌ,
susi to naruiꞌ jiong mai garuang
baꞌtu susi to naangkaꞌnaꞌ jiong mai buka.
Napajionaꞌ buntu batu
kuwaꞌding mawatang keꞌdeh.
4 Naajahhinaꞌ mpukelong kelong baru,
kelong pangpujian mpakalaꞌbih Puang Allataala to tasompa.
Buda tau ngkitai joo apa Napugauk Puang Allataala namemmalajaꞌ,
namatappaꞌ lako Puang Allataala.
5 Masannang to tomatappaꞌ lako Puang Allataala,
to teꞌda nakaturuꞌ-turuꞌ ssompa dewata,
iarika metaꞌda tulung lako tomatampo.
6 Oo Puang Allataala to kusompa, liwaꞌ buda to apa melo Tapugauk lako kamiꞌ,
teꞌda lalo Tasusian.
Liwaꞌ buda to akkatta-Taꞌ mejangngaran lako kamiꞌ,
na la kupangpeissenan sola la kucurita,
apa liwaꞌ budanna, na tangdipura ncuritai.
7 aTeꞌda Takabudaii to karoba panggereꞌ iarika kande dipangngolo.
Teꞌda Taangahhi to karoba ditunu puꞌpuh baꞌtu karoba dipassompan la ndampangan tau.
Apa Tabenmoꞌ talinga,
la kupake mangpesaꞌding kuturuꞌi to parenta-Taꞌ.
8 Iamo joo kumangkada kukua, “Akuꞌmo tee
to diukiꞌ llan suraꞌ tilulun to mangkada kumua,
9 ‘Oo Puang Allataala to kusompa, kukabudai mpugauk pakkaeloran-Taꞌ,
kuparinawai to atoran-Taꞌ.’ ”
10 Kupangpeissenan llan kasirempunan ummaꞌ-Taꞌ,
kumua mangkami-Kiꞌ mpasalamaꞌkan,
na teꞌda kaꞌtunna kupangpeissenan.
Oo Puang Allataala, Taissen ngasan joo kupugauk.
11 Ia joo kareba kasalamatan, teꞌda kukammatanni llan penawangkuꞌ,
tuli kupangpeissenan kumua tattaꞌ-Kiꞌ mangtulung sola mpugauk janjin-Taꞌ.
Teꞌda kukammaꞌ bang jio kasirempunan ummaꞌ-Taꞌ,
natuli kupangpeissenan to pangpakamojaꞌ-Taꞌ sola katonganan-Taꞌ.
12 Oo Puang Allataala, danggiꞌ Tapaja ngkamaseinaꞌ,
lendungngi tarruhnaꞌ pangpakamojaꞌ-Taꞌ
Tatattaꞌ mpugaukki to janjin-Taꞌ.
Passambajang metaꞌda tulung
13 Natalimbungnaꞌ abalaꞌ liwaꞌ buda,
teꞌdamo na dikulle rrekenni.
Gaja buda to dosakuꞌ susi to nasamboinaꞌ,
na teꞌdamo kupakita.
Laꞌbi buda ia na ia to beluak jao ulungkuꞌ,
kuarannai kaꞌtu rannu.
14 Oo Puang Allataala, metaꞌdanaꞌ Tatulungnaꞌ,
madoiꞌmi-Kiꞌ mpasalamaꞌnaꞌ.
15 Akeꞌ na ia to tomadoang mpateinaꞌ
ditalo nasumpalingan palai kinjaraꞌ.
Akeꞌ na ia to tompetawa-tawai kamacilakangkuꞌ,
sorong bokoꞌ namasiriꞌ.
16 Akeꞌ namasiriꞌ to tompakapisinaꞌ to mangkada kumua,
“Pissikko, pissikko.”
17 Dennaa upaꞌ na sininna to tossompa-Kiꞌ
masannang na mario,
na sininna to tongkamaliꞌ kasalamatan jio mai Kitaꞌ
tuli mangkada kumua, “Makuasa to Puang Allataala.”
18 Ia tee akuꞌ tomaparriꞌnaꞌ kukaasi-asi,
apa Naparinawanaꞌ Puang Allataala.
Oo Puang Allataala to kusompa, Kitaꞌmo Tomangpasalamaꞌkuꞌ,
danggiꞌ Tamelaꞌ ntulungnaꞌ.