Passambajang metaꞌda tulung
39
Dipatuju lako tomangpalunna tomakkelong. Kelongna Raja Daud. Dipatuju lako Yedutun.2 Kukua llan penawangkuꞌ, “La njagainaꞌ kalekuꞌ,
danggiꞌ na lilakuꞌ ntumangnaꞌ mpugauk dosa.
La kammaꞌ bangnaꞌ
ke denpi togajaꞌ.”
3 Kammaꞌ bangnaꞌ tangmangkada,
apa teꞌda buaꞌna lako kalekuꞌ
kannori samabandaꞌ-bandaꞌna to kamasussankuꞌ.
4 Tangrapaꞌ penawangkuꞌ.
Sakupikkiriꞌ-kiriꞌna samasussa-sussangkuꞌ
kuarannai mangkada kukua,
5 “Oo Puang Allataala, pauannaꞌ pirapara masainna tee katuoankuꞌ,
kutuli mangngingaran kumua, teꞌda kulatuo tarruh.”
6 Cinggaꞌtuꞌra to katuoan Tabennaꞌ,
sangkappidian matara na teꞌda buaꞌna lako Kitaꞌ.
Tongan! Ia to katuoanna tolino
susi mandari to penawa dipessuean.
7 Susiri bajo-bajo.
Ia to apa naparri-parri napugauk, teꞌda ngasan buaꞌna,
na rrempun kasugiran,
apa teꞌda naissenni inda mpenyamannii.
8 Oo Puang Allataala, apara to la kurannuan?
Kitaꞌ mandara to kunii mangrannuan.
9 Laꞌparannaꞌ jio mai sininna dosakuꞌ,
danggiꞌ eloranni to tobangoꞌ ncapaꞌnaꞌ.
10 Kammaꞌ bangmoꞌ tangmangkada,
sabaꞌ Kitaꞌmo to ssessanaꞌ.
11 Tapajaimi pangsessa-Taꞌ lako akuꞌ,
sabaꞌ susi to la matemoꞌ.
12 Tasessa to tolino, sabaꞌ kasalanna.
Taancuruꞌ to apa keanggaꞌ lako kalena
susi balesuꞌ nggajaꞌ-gajaꞌ apa melo.
Tongan! Ia to katuoanna tolino susi mandari to penawa dipessuean.
13 Oo Puang Allataala metaꞌdanaꞌ Tapesaꞌdingngii passambajangkuꞌ,
parinawai tee petaꞌda tulungkuꞌ.
Danggiꞌ kita-kitanaꞌ kumarrak,
sabaꞌ cinggaꞌtuꞌraꞌ mentoratu lako Kitaꞌ llan lino,
susi tojolokuꞌ.
14 Danggiꞌ sussainaꞌ! Maꞌnamo kumasannang cinggaꞌtuꞌ,
kumaneꞌ ssalaii tee lino.