Passambajangna tomasaki
38
Kelongna Raja Daud tonna passompan karoba kumua na danggiꞌ Nakalupaii Puang Allataala.2 Oo Puang Allataala, danggiꞌ pandasanaꞌ ke mabirih-Kiꞌ,
danggiꞌ too Tasessanaꞌ ke magalli-Kiꞌ.
3 Ia to paꞌdikkuꞌ susi pana-Taꞌ ntarruh kalekuꞌ,
namabandaꞌ kusaꞌding susi to natemmeꞌnaꞌ liman-Taꞌ.
4 Malaꞌdaꞌ sakingkuꞌ, sabaꞌ kamabirisan-Taꞌ,
sipaꞌdikan ngasan kalekuꞌ, sabaꞌ dosakuꞌ.
5 Gaja budamo to kasalankuꞌ, susi wai ngkabuhnaꞌ,
na ia to dosakuꞌ mabandaꞌmi susi pamawa tangkukulle mpassanni.
6 Mangnana to kojongkuꞌ na gaja bau,
natumang kabangosankuꞌ.
7 Malaꞌdaꞌ sakingkuꞌ na tangkukullemi keꞌdeh,
pamula makaleꞌ ratu lako karuen masussanaꞌ na masse penawangkuꞌ.
8 Gaja kulaꞌ kalekuꞌ,
nasipaꞌdikan too.
9 Malamma kalekuꞌ kutangpakulle,
kusumarro sabaꞌ tangrapaꞌ penawangkuꞌ.
10 Oo Puang Allataala, Taissen ngasan to kukadoangngi,
na Tasaꞌding too to sarrokuꞌ.
11 Mangdebe-debe babaraꞌkuꞌ, teꞌdamo kamawatangankuꞌ,
natangmacero toomi pengkitangkuꞌ.
12 Napessalaimoꞌ sobaꞌkuꞌ, sabaꞌ sakingkuꞌ,
moi sileꞌtokuꞌ ciaꞌmi ssolannaꞌ.
13 Ia to tomadoang ngkaꞌtu sungaꞌkuꞌ natananannaꞌ poja,
namangngatta too ncilakainaꞌ nasipangkadai umbo susi kuancuruꞌ,
natuli mesaꞌ kada la ngkalasinaꞌ.
14 Apa kuanggaiꞌ bang susi tomataru tangmangpesaꞌding
baꞌtu susi tomamang tangmangkada.
15 Nang susi tongannaꞌ tomataru kukammaꞌ bang
na teꞌda kupangkadan kalekuꞌ.
16 Oo Puang Allataala, Kitaꞌ kunii mangrannuan.
Oo Puang Allataala to kusompa, Kitaꞌmo to la mpebalinaꞌ.
17 Danggiꞌ taeloran ewakuꞌ mpetawa-tawainaꞌ llan kamasussankuꞌ,
danggiꞌ napumatampoi ke tangpakullenaꞌ.
18 Tibaꞌjun-baꞌjunnaꞌ susi tolasongka,
sabaꞌ mapaꞌdik tarruhnaꞌ.
19 Kuakui kumua madosamoꞌ,
na tangrapaꞌ penawangkuꞌ mpikkiriꞌ kasalankuꞌ.
20 Gaja buda na mawatang to ewakuꞌ.
Nakabaꞌcinaꞌ na teꞌda salakuꞌ.
21 Ia to kameloan kupugauk lako kalena napabalahhi kagajatan.
Naewanaꞌ, sabaꞌ melo panggaukankuꞌ.
22 Oo Puang Allataala to kusompa, danggiꞌ Tasalainaꞌ,
danggiꞌ pamabela kale-Taꞌ jio mai akuꞌ.
23 Oo Puang Allataala Tomangpasalamaꞌkuꞌ,
madoiꞌmi-Kiꞌ ntulungnaꞌ.