Katuoanna togajaꞌ na tomelo
37
Kelongna Raja Daud.Danggiꞌ mumapaꞌdik penawa lako tomangpanggaukan gajaꞌ,
danggiꞌ too mangngimburu lako tompugauk kasalan.
2 Nasabaꞌ ia to katuoanna cinggaꞌtuꞌra nataꞌde susi reu cinggaꞌtuꞌra namate,
cinggaꞌtuꞌra natangpakulle susi tananan macikkiꞌ cinggaꞌtuꞌra namalaju.
3 Matappaꞌko lako Puang Allataala,
mutattaꞌ mpugauk kameloan,
mutorro llan tana mangka dibenko,
mutattaꞌ menturuꞌ lako Puang Allataala.
4 Pamasannangngi penawammu nturuꞌ pakkaeloran-Na Puang Allataala,
Nabenko to nakadoangngi penawammu.
5 Maꞌnamo na Puang Allataala mpuissenni to katuoanmu,
murannuanni na Ia ntulungko.
6 Ia la mpamanassai to katongananmu susi arrang,
na kamarurusanmu susi allo.
7 Pamatanai penawammu jio olo-Na Puang Allataala,
sabbaraꞌko ntajan pangtulung-Na.
Danggiꞌ magalli ngkita tokalasi keasseleꞌ.
8 Pajaii mabirih, danggiꞌ magalli,
sabaꞌ ia to susi joo mpadenri kagajatan.
9 Nasabaꞌ ia to tompugauk kagajatan, la dilanynyaꞌi,
apa ia to torrannuan Puang Allataala, la mpumanah tana to dijanjianni.
10 Cinggaꞌtuꞌmora nalanynyaꞌ to togajaꞌ,
ia ke diangahhi taꞌdemi.
11 a Ia to tompamajiong penawanna,
la mpumanah tana to dijanjianni.
Masannang sabaꞌ melo katuoanna
to Nabenni Puang Allataala.
12 Ia to togajaꞌ mangngatta bang mpugauk kagajatan lako tomakassing,
nasunggarigiꞌ-rigiꞌ too ngkitai.
13 Apa Napetawa-tawai Puang Allataala to togajaꞌ,
sabaꞌ Naissen Ia kumua cinggaꞌtuꞌmora naladisessa.
14 Ia to togajaꞌ nnonok paꞌdangna na mpempatteran panana,
la mpatei tokaasi-asi sola tomapaꞌdik,
na tompugauk kamarurusan.
15 Apa kannora ia poleꞌ nagajang paꞌdangna,
na dileꞌtoan to panana.
16 Moi na ciꞌdiꞌra to napunnai tomakassing,
laꞌbi makeanggaꞌ na ia to kasugiran napunnai togajaꞌ.
17 Nasabaꞌ ia to kuasanna togajaꞌ, la Naancuruꞌ Puang Allataala,
apa ia to tomakassing la Nalendungngi.
18 Puang Allataala mpuissen katuoanna to toteꞌda caccana,
na ia to tana Nabenni Puang Allataala napumanah tarruh teꞌda anggena.
19 Ia ke wattu kamasussanni, teꞌda ia nalamapaꞌdik,
na ia ke pebarranganni namasussa diampa' to kande, te'da nalatangkumande.
20 Apa ia to togajaꞌ la lanynyaꞌ,
na ia to tonnewa Puang Allataala
cinggaꞌtuꞌra nataꞌde susi bunga jio padang,
susi rambu teꞌda dikita malena.
21 Ia to togajaꞌ ciaꞌ mbajah indanna,
apa ia to tomakassing mamase na malaboh.
22 Ia to to-Nabarakkaꞌi Puang Allataala,
la mpumanah tana to dijanjianni,
apa ia to to-Natampakki ropu Puang Allataala,
la Nalanynyaꞌi.
23 Ia to to-Nakabudai Puang Allataala,
Napattantuanni lalan kameloan.
24 Moi natitodo, teꞌda natipalumbang,
sabaꞌ natoei Puang Allataala to limanna.
25 Sipamula malolleꞌkuꞌ, ratu lako matuangkuꞌ,
teꞌdapa kukita to tomakassing Nasalai Puang Allataala,
iarika batiꞌna menjaji tokataꞌda-taꞌda.
26 Tuli mangpeindan sola mangpangbengan,
na ia to batiꞌna menjaji barakkaꞌ lako kalena.
27 Pajaimi to kagajatan, mupugaukki to kameloan,
mutattaꞌ mariꞌpih sola batiꞌmu jio tana Naben kamuꞌ Puang Allataala.
28 Nasabaꞌ Nakabudai Puang Allataala to tomaruruh penawanna,
teꞌda Nasalaii to to-Napakamojaꞌ,
Nalendungngi tarruh teꞌda anggena.
Apa ia to batiꞌna to togajaꞌ la Nalanynyaꞌi.
29 Na ia to tomakassing, la mpumanahhi joo tana to dijanjianni,
nanii torro tarruh.
30 Ia to napau tomakassing kada kamaccan,
na ia to messun jio timunna kada maruruh.
31 Napallan penawa tongan to atoran-Na Puang Allataala to nasompa,
na teꞌda nasala tengka.
32 Ia to tomakassing namata-matai bang togajaꞌ,
namangngatta mpateii,
33 apa teꞌda Naeloranni Puang Allataala najokko togajaꞌ,
na teꞌda Naeloranni dipasala ke diraꞌtahhi kara-karana.
34 Mangrannuanko lako Puang Allataala,
mutattaꞌ mpugaukki to parenta-Na.
Napupenjajiko tompumanahhi joo tana to dijanjianko,
na la mukita to togajaꞌ dilanynyaꞌi.
35 Denmo kukita mesaꞌ togajaꞌ, liwaꞌ maparrang na matampo,
susi garontoꞌ kaju matonggob.
36 Ia tongkuliu lalan poleꞌ jio, taꞌdemi,
kuangahhi apa teꞌdamo kuampaꞌi.
37 Kitai to tomelo sipaꞌna, parinawai to tomaruruh penawanna,
sabaꞌ ia to tongkabudai kasikalinoan, la melo to katuoanna to la naoloi lako.
38 Apa ia to togajaꞌ la dilanynyaꞌi,
naanggemi to katuoanna.
39 Napasalamaꞌ Puang Allataala to tomakassing,
Nalendungngii ke masussai.
40 Natulungngi Puang Allataala Napasalamaꞌi,
Nalaꞌparanni jio mai togajaꞌ,
sabaꞌ mentilendungngi lako kale-Na.