Kagajatanna tolino na kameloan penawan-Na Puang Allataala
36
Dipatuju lako tomangpalunna tomakkelong. Kelongna Raja Daud, tompangjaman Puang Allataala.2 a Ia to dosa llan penawanna togajaꞌ mpatuju salai,
na teꞌda nangkalajaꞌ-ngkasiriꞌ Puang Allataala.
3 Nnanggaꞌ gaja kalena laꞌbi macca na tau laen,
arannai teꞌda naissenni to kasalanna,
na teꞌda too nakabaꞌcii.
4 Sininna kadanna liwaꞌ gajaꞌ, na ponno kamajekkongan,
teꞌda lalomo napugauk kameloan sola kamarurusan.
5 Jao ngenan mammaꞌna nanii nnawa-nawa kagajatan,
teꞌda ia to kameloan napugauk,
na teꞌda nakabaꞌcii to kagajatan.
6 Oo Puang Allataala, ia to pangpakamojaꞌ-Taꞌ laꞌbi matande na langiꞌ,
natattaꞌ Tapugauk to janjin-Taꞌ.
7 Ia to kamarurusan penawan-Taꞌ matande susi buntu gaja matande,
na ia to atoran-Taꞌ mandalan susi tasik.
Oo Puang Allataala, ia to tolino sola olok-olok Taparakai.
8 Oo Puang Allataala, ia to pangpakamojaꞌ-Taꞌ, liwaꞌ makeanggaꞌna,
ia to tolino mentilendung naonganni paniꞌ-Taꞌ.
9 Mpesannangngii kande melo llan bola-Taꞌ,
na mperasai tarruh kameloan penawan-Taꞌ susi wai saꞌdan lolong tarruh.
10 Kitaꞌmo garontoꞌna katuoankiꞌ,
naarrangngikan arrang-Taꞌ.
11 Dennaa upaꞌ Tatattaꞌ mpakamojaꞌi to tonnissen-Kiꞌ.
Dennaa upaꞌ Tatattaꞌ maruruh lako tompugauk kameloan.
12 Danggiꞌ Taeloranni to tomatampo mpandasanaꞌ,
danggiꞌ eloranni to togajaꞌ nnulaꞌinaꞌ.
13 Kitai, dilolinanmi to tompugauk kagajatan,
dipessambakanni na tangnakullemi keꞌdeh.