Passambajang metaꞌda tulung
35
Kelongna Raja Daud.Oo Puang Allataala, ewai to tonnewanaꞌ,
rarii to torrariinaꞌ.
2 Tatulungmoꞌ
mpake parewa perisai llendungngi kalekuꞌ.
3 Angkaꞌi to doke-Taꞌ sola nonokki paꞌdang-Taꞌ
nnewa tonnulaꞌnaꞌ.
Tapamanassami lako akuꞌ kumua,
Kitaꞌmo Tomangpasalamaꞌkuꞌ.
4 Akeꞌ natalo sola masiriꞌ
to tolampateinaꞌ.
Akeꞌ nasumpalingan pole bokoꞌ
to mesaꞌ penawa nnewanaꞌ.
5 Akeꞌ nasisarambuan susi sowok nairiꞌ angin,
naturrun malaekaꞌ-Na Puang Allataala.
6 Akeꞌ na ia to lalan naola malillin na malucuꞌ,
naulaꞌ malaekaꞌ-Na Puang Allataala.
7 Teꞌda sabaꞌna natananannaꞌ poja,
teꞌda sabaꞌna nakaliannaꞌ garuang, la nanii njokkonaꞌ.
8 Akeꞌ nakannai abalaꞌ
to teꞌda nakalannaii.
Ia to poja natanan, akeꞌ na ia naatta,
akeꞌ namelontin nalanynyaꞌ.
9 Apa mario masannangnaꞌ, sabaꞌ Puang Allataala.
Kupumario to Napasalamaꞌnaꞌ.
10 Lantuk tongan penawangkuꞌ mangkada kukua,
“Oo Puang Allataala, teꞌda to ssusian-Kiꞌ.
Kitaꞌ llaꞌparan tomasussa jio mai tomaparrang.
Kitaꞌ llaꞌparan tomasussa sola tokaasi-asi jio mai tonaalaii to napunnai.”
11 Maparrang to tosaꞌbi tangtongan,
natandahnaꞌ mpugauk to teꞌda kupugaukki.
12 Ia to kameloan kupugauk napabalahhi kagajatan,
mesa-mesanaꞌ llan kapussakan.
13 Ia tonna masaki, masse penawangkuꞌ kutangkumande,
kucukku mpassambajanganni,
14 butung to mpassambajangan sileꞌtokuꞌ
baꞌtu sobaꞌkuꞌ.
Masse penawangkuꞌ kukumarrak,
butung to mbatingnginaꞌ indokuꞌ.
15 Apa ia tongkumasussa,
masannangngi sirempun nnewanaꞌ,
na teꞌda pajana mpelleꞌnaꞌ susi to teꞌda kisiissen.
16 Nacapaꞌ-capaꞌ tarruhnaꞌ,
nagaja baꞌci ngkitanaꞌ.
17 Oo Puang Allataala, pirapara masainna,
Tanii ngkita-kitanaꞌ?
Laꞌparannaꞌ jio mai kagajatanna,
sabaꞌ susii singa la ssammangnaꞌ.
18 Iamo joo kulamangsukkuruꞌ lako Kitaꞌ llan tangngana ummaꞌ-Taꞌ,
kupakalaꞌbih sangan-Taꞌ llan kasirempunan tobuda.
19 aDanggiꞌ eloranni ewakuꞌ mpetawa-tawainaꞌ
naewanaꞌ na teꞌda sabaꞌna,
danggiꞌ eloranni to tongkabaꞌcinaꞌ nnarreinaꞌ
na teꞌda passalanna.
20 Tangngia kada mepasikalino napau,
mangngatta bangri mpasiroso tosikalino llan kampong.
21 Napetamba-tambannaꞌ, namangkada kumua,
“Pissikko, pissikko, kikitamo to buanna panggaukanmu.”
22 Oo Puang Allataala, Takitamo, danggiꞌ Takammaꞌ bang,
danggiꞌ Tamabela jio mai akuꞌ.
23 Oo Puang Allataala to kusompa, Tatulungmoꞌ,
Tapangkadannaꞌ ke dikara-karanaꞌ.
24 Oo Puang Allataala to kusompa, raꞌtahhi to kara-karakuꞌ, sabaꞌ maruruh-Kiꞌ,
danggiꞌ eloranni to ewakuꞌ mpetawa-tawainaꞌ.
25 Danggiꞌ eloranni ewakuꞌ mangkada llan penawanna kumua,
“Pissikki, masolang tonganmi,
jajimi to akkattataꞌ.”
26 Akeꞌ na ia to masannang ngkita kamasussankuꞌ,
pussak na masiriꞌ.
Akeꞌ na ia tomatampo lako akuꞌ,
teꞌda nadianggaꞌ na dipakasiriꞌ.
27 Dennaa upaꞌ na ia to tomadoang ngkitanaꞌ ditonganan,
masannang na mario,
nadaduꞌ-daduꞌi mangkada kumua,
“Malaꞌbih tongan to Puang Allataala.
Madoang-Ngi ke manyamanni katuoanna to taun-Na.”
28 Jaji, la kupangpeissenan to kamarurusan-Taꞌ,
la kupakalaꞌbih-Kiꞌ pamula makaleꞌ ratu lako karuen.