Pangpujian mpakalaꞌbih kameloan penawan-Na Puang Allataala
34
1 a Kelongna Raja Daud, tonna anggaiꞌ-gaiꞌi mame jio olona Abimelekh. Iamo joo naulaꞌii Abimelekh arannai palai.2 La tattaꞌnaꞌ mangsukkuruꞌ lako Puang Allataala,
na teꞌda kupaja mpakalaꞌbih-Hi.
3 Kupuji to Puang Allataala sabaꞌ sininna to Napugauk.
Dennaa upaꞌ nasaꞌdingngi todipandasa napumasannangngi.
4 Tapakalaꞌbih-Hi to Puang Allataala sola ngasan,
tapujii to sangan-Na.
5 Metaꞌda tulungnaꞌ lako Puang Allataala, Napebalinaꞌ,
Nalaꞌparannaꞌ jio mai kamalajarankuꞌ.
6 Ia to tomangrannuan lako Puang Allataala matana bang penawanna,
na teꞌda nalakacelean.
7 Ia tee akuꞌ todipandasa metaꞌda tulung lako Puang Allataala Napebalinaꞌ,
Napasalamaꞌnaꞌ jio mai kamasussankuꞌ.
8 Malaekaꞌ-Na Puang Allataala njagaii to tongkalajaꞌ-ngkasiriꞌ-I,
nalaꞌparanni jio mai abalaꞌ.
9 bLa muperasai kalena matumba to kameloan penawan-Na Puang Allataala,
kumua masannang to tomentilendung lako kale-Na.
10 Ee kamuꞌ ummaꞌ-Na Puang Allataala, kalajaꞌ-kasiriꞌ-I to Puang Allataala,
sabaꞌ ia ke mikalajaꞌ-mikasiriꞌ-I teꞌda milakakurangan.
11 Tangbarahhi to singa malolleꞌ,
sabaꞌ kakurangan kandei,
apa ia to tometaꞌda tulung lako Puang Allataala,
teꞌda nakakurangan to la napumelona.
12 Ee anakkuꞌ sola ngasan,
la kuajahhi kamuꞌ ngkalajaꞌ-ngkasiriꞌ Puang Allataala.
13 Madoangra kamuꞌka malambeh sungaꞌ
mimperasai kameloan?
14 Ia ke madoang kamuꞌ, jagaii to timummi danggiꞌ napau kada gajaꞌ,
na danggiꞌ too mimangnguraga.
15 Pajaimi to kagajatan, mipugaukki to kameloan,
pengkulleii sikalino padammi rupa tau.
16 Naparakai Puang Allataala to tomakassing,
Napesaꞌdingngi ke metaꞌda tulungngi.
17 c Apa Naewa Puang Allataala to tompugauk kagajatan,
na ia ke matemi teꞌda lalomo tonningaranni.
18 Ia ke metaꞌda tulungngi to tomakassing, Napesaꞌdingngi Puang Allataala
Nalaꞌparanni jio mai sininna kamasussan.
19 Teꞌda Nasalaii Puang Allataala to tokaꞌtu rannu,
Nalaꞌparan jio mai kapussakanna to toteꞌdamo rannunna.
20 Moi nabuda kamaparrisanna to tomakassing,
apa Puang Allataala llaꞌparanni jio mai sininna joo kamaparrisanna.
21 d Tattaꞌ Najagai Puang Allataala,
moi mesaꞌ bukunna teꞌda dileꞌtoan.
22 Ia to togajaꞌ la mate sabaꞌ panggaukan gajaꞌna,
na ia to tongkabaꞌci tomakassing la disessa.
23 Puang Allataala mpasalamaꞌ ummaꞌ-Na,
na ia to tomentilendung lako kale-Na, teꞌda Nasessai.