Kelong pangpujian
33
Ee sininna tomakassing,mario kamuꞌ mimasannang,
sabaꞌ ia to apa mangka Napugauk Puang Allataala.
Sipatoꞌ to tomaruruh penawanna mpakalaꞌbih Puang Allataala.
2 Mangsukkuruꞌ kamuꞌ lako Puang Allataala.
Pakkelongan-Ni mpake cuꞌbekan sola gambus sangpulo ritinna.a
3 Pakkelongan-Ni Puang Allataala,
mpukelong kelong baru,
pannonian melo-I cuꞌbekan,
mimangmaroah-roah.
4 Tongan ngasan to kadan-Na Puang Allataala.
Sininna to Napugauk dikatappaꞌi.
5 Nakabudai Puang Allataala to kamakassingan sola kamarurusan,
sininna to Napaden Puang Allataala nanii pajan kumua tattaꞌ-I mangpakamojaꞌ.
6 Mangkada-I Puang Allataala naden to langiꞌ,
allo, bulan sola bintuin.
7 Narempunni to wai tasik susi to ditampo.
Napajioi mesaꞌ ngenan joo tasik maluah.
8 Maꞌnamo na ia to sininna issinna lino ngkalajaꞌ-ngkasiriꞌ Puang Allataala,
naanggaꞌ too-I sininna tolino.
9 Nasabaꞌ mangkada manda-I najaji ngasan to sininna.
Mangparenta manda-I naden ngasan to sininna apa.
10 Puang Allataala tangmpajajii to akkattana sininna bangsa.
Na teꞌda najaji to pattujunna.
11 Apa ia to akkatta-Na Puang Allataala, teꞌda anggena.
Ia to Napattantu nang la Napugauk tarruh ratu lako batiꞌtaꞌ.
12 Liwaꞌ masannang to bangsa nnakui Puang Allataala kumua Iamo Puang Allataala to nasompa.
Maupaꞌ to tau to Napilei menjaji ummaꞌ-Na.
13 Mengkita-I Puang Allataala jao mai suruga,
ngkita-I sininna tolino.
14 Jao mai kadera malaꞌbih-Na
nanii Puang Allataala ngkita simesaꞌ-mesaꞌ tau.
15 Ia mpadenni to penawanna tolino,
na Naissen apa to napugauk tolino.
16 Ia to napupatalo raja llan kapararian tangngia kabudanna tentara,
na ia to napusalamaꞌ tentara tangngia kamawatanganna.
17 Tangngia nyarang la mben kapataloan llan kapararian,
moi naliwaꞌ mawatang teꞌda nakullei mpasalamaꞌ tossakeii.
18 Puang Allataala njagaii to sininna tongkalajaꞌ-ngkasiriꞌ-I,
to tattaꞌ rrannuan pangpakamojaꞌ-Na,
19 Natulungngi nateꞌda namate,
natattaꞌ mparakaii ke wattu masussai diampa' to kande.
20 Mangrannuan lakokiꞌ Puang Allataala,
sabaꞌ Ia ntulungkiꞌ Nalendungngikiꞌ susi perisai.
21 Mariokiꞌ sabaꞌ sininna to Napugauk Puang Allataala.
Takatappaꞌ-I, sabaꞌ malaꞌbih-Hi.
22 Oo Puang Allataala, dennaa upaꞌ natattaꞌ to pangpakamojaꞌ-Taꞌ lako kamiꞌ,
susi to kirannuan lako Kitaꞌ.