Kamasannanganna to todilaꞌparanmo jio mai dosana
32
Kelongna Raja Daud. Kelong pangpangngajah.Masannang to todiaddampangan,
to Nataꞌdeimo Puang Allataala dosana.
2 aMasannang to toteꞌdamo Naingaranni Puang Allataala kasalanna,
masannang to toteꞌda namangnguraga.
3 Ia tonna teꞌdapa kuakui dosakuꞌ, malamma kalekuꞌ,
sabaꞌ sumarronaꞌ pamula makaleꞌ ratu lako karuen.
4 Allo-bonginaꞌ mapaꞌdik,
susi to natemmeꞌ liman-Taꞌ,
teꞌdamo pakullekuꞌ
susi to bunga malaju nakanna lussunna allo.
5 bKuakuimo to dosakuꞌ,
nateꞌda kubuni kasalankuꞌ jio olo-Taꞌ.
Kumangkada kukua,
“La kuakui ngasan to kasalankuꞌ lako Kitaꞌ,”
Taaddampanganmoꞌ
na teꞌdamo Taingaranni to dosakuꞌ.
6 Iamo joo, sininna to matappaꞌ
sipatoꞌ la massambajang lako Kitaꞌ ke masussai,
na ia ke naratuii kamasussan laꞌdaꞌ
susi to natallanan wai,
teꞌda napumacilakai.
7 Kitaꞌmo susi ngenan kunii membuni,
Talendungnginaꞌ jio mai kamasussan.
Iamo kumeoli-oli mario,
sabaꞌ Tapasalamaꞌmoꞌ.
8 Nakua Puang Allataala,
“Kupatujuko lako lalan to nang la muola.
Kuajahhiko to apa nang la mupugauk.
Kupakaingaꞌko,
Kuparinawako.
9 Danggiꞌ bangoꞌ susi nyarang baꞌtu bagalc teꞌda akkalanna,
to dikalangpi namaneꞌ menturuꞌ.”
10 Ia to togajaꞌ, mperasai mangrupa-rupa kamasussan.
Apa ia to tomatappaꞌ, tattaꞌ Napakamojaꞌ Puang Allataala
Najagai tarruhhi.
11 Ee kamuꞌ tomakassing, mario kamuꞌ mimasannang,
sabaꞌ apa to mangka Napugauk Puang Allataala.
Ee kamuꞌ to tomaruruh, simeoli-olian kamuꞌ.