Mangrannuan lako Puang Allataala
31
Dipatuju lako tomangpalunna tomakkelong. Kelongna Raja Daud.2 aOo Puang Allataala, lako Kitaꞌ kunii mentilendung,
danggiꞌ lalo Taelorannaꞌ dipakasiriꞌ.
Pasalamaꞌnaꞌ, sabaꞌ maruruh-Kiꞌ.
3 Pesaꞌdinginaꞌ, Talaꞌparannaꞌ madoiꞌ.
Butung buntu batu llendungnginaꞌ,
butung benteng mawatang
kunii mentilendung kusalamaꞌ.
4 Ieꞌ, Kitaꞌmo kupubuntu batu,
kupubenteng mawatang kunii mentilendung.
Patujunaꞌ, dikua nadipakalaꞌbih to sangan-Taꞌ.
5 Laꞌparannaꞌ jio mai poja to natanan ewakuꞌ,
sabaꞌ Kitaꞌ kunii mentilendung.
6 bKusorong matiꞌ kale-Taꞌ to katuoankuꞌ.
Oo Puang Allataala to dikatappaꞌi,
Kitaꞌmo mpasalamaꞌnaꞌ.
7 Takabaꞌci to tossompa dewata teꞌda buaꞌna,
apa ia tee akuꞌ Kitaꞌ kukatappaꞌi.
8 La marionaꞌ kumasannang,
sabaꞌ tattaꞌ-Kiꞌ mpakamojaꞌnaꞌ.
Kitaꞌ mparinawai to kamaparrisankuꞌ
Taissenni to kamasussankuꞌ.
9 Teꞌda Taelorannaꞌ najokko ewakuꞌ,
apa Tapasalamaꞌnaꞌ jio mai abalaꞌ.
10 Oo Puang Allataala, kamaseinaꞌ,
sabaꞌ mperasainaꞌ kamasussan,
kambangmi matangkuꞌ kumarrak,
sabaꞌ masse penawangkuꞌ,
namapaꞌdik tongan penawangkuꞌ sola batang kalekuꞌ.
11 Kamaparrisan mandara kuperasai llan katuoankuꞌ,
allo-allo sumarro manda kupugauk.
Samoroꞌ-moroꞌnami kamaukuankuꞌ napubuaꞌ kasalankuꞌ,
nasimarapoanmo to bukungkuꞌ.
12 Napetawa-tawainaꞌ sininna ewakuꞌ,
laꞌbi-laꞌbipa bali bolakuꞌ.
Na sininna sobaꞌkuꞌ malajaꞌ ngkitanaꞌ,
moi tokusitammuan lako lalan napessalai toonaꞌ.
13 Susinaꞌ to tomatemo teꞌdamo naingarannaꞌ tau,
susimoraꞌ kurin poka teꞌdamo buaꞌna.
14 Umbo-umbo nanii disaꞌding to kareba mekaꞌbaran bulu,
nasibisik-bisik to ewakuꞌ.
Mesaꞌ penawai la nnewanaꞌ,
naakkattai la mpateinaꞌ.
15 Oo Puang Allataala, ia tee akuꞌ mangrannuan matiꞌnaꞌ kale-Taꞌ,
sabaꞌ Kitaꞌmo Puang Allataala to kusompa.
16 Ia to katuoankuꞌ Kitaꞌ ngkuasaii.
Pasalamaꞌnaꞌ jio mai ewakuꞌ
to nnulaꞌnaꞌ la ncilakainaꞌ.
17 Dennaa upaꞌ Tapakitannaꞌ kameloan penawan-Taꞌ tee akuꞌ kaunan-Taꞌ,
Tapasalamaꞌnaꞌ, sabaꞌ Tapakamojaꞌnaꞌ.
18 Oo Puang Allataala, matiꞌ manda kale-Taꞌ kunii metaꞌda tulung
danggiꞌ elorannaꞌ dipakasiriꞌ.
Akeꞌ na ia to togajaꞌ Tapakasiriꞌ,
padoꞌmi lino tomate na danggiꞌmo nasumu.
19 Pamamangngi to pangnguraga
to liwaꞌ matampo ncapaꞌ tomakassing.
20 Liwaꞌ buda kameloan
Tapasadianni to tongkalajaꞌ-ngkasiriꞌ-Kiꞌ.
Nakita ngasan tau to kameloan Tapugauk
lako to mpentilendungngi-Kiꞌ.
21 Kitaꞌ mbunii jio to Tanii namanyaman,
Taongannii jio mai akkattana tomangpanggaukan gajaꞌ.
Kitaꞌ llendungngii,
danggiꞌ napasalai ewana.
22 Dipakalaꞌbih to Puang Allataala!
Liwaꞌ mejangngaran to pangpakamojaꞌ-Na lako akuꞌ
tongkuditalimbung kudirarii.
23 Ia tongkupussakmo,
kusangai Nasalaimoꞌ Puang Allataala.
Apa Napesaꞌdingngi to petaꞌdangkuꞌ
tongkumetaꞌda tulung lako kale-Na.
24 Ee, sininna ummaꞌ-Na Puang Allataala, pakamojaꞌi to Puang Allataala,
Puang Allataala llendungngi to totattaꞌ mpugauk pakkaeloran-Na,
apa liwaꞌ Nasessa to tomatampo.
25 Ee kamuꞌ to rrannuan Puang Allataala,
pamawatangngi penawammi mitattaꞌ masumangaꞌ.