Passambajang mangsukkuruꞌ
30
Kelongna Raja Daud. Kelong dipukelong tonna dicerak to Bola Puang Allataala.2 Oo Puang Allataala, kupalaꞌbih-Kiꞌ,
sabaꞌ mangkami-Kiꞌ mpasalamaꞌnaꞌ,
nateꞌda Taeloranni to ewakuꞌ mpelleꞌnaꞌ.
3 Oo Puang Allataala to kusompa, metambanaꞌ metaꞌda tulung,
na Tapamalagahmoꞌ.
4 Talaꞌparannaꞌ jiong mai lino tomate,
Tapatuonaꞌ llan mai allaꞌna tomendoꞌmo llamunan.
5 Ee to totattaꞌ mpugauk pakkaeloran-Na Puang Allataala,
pakkelongan-Ni pangpujian to Puang Allataala,
mimangsukkuruꞌ lako Tomalaꞌbih.
6 Nasabaꞌ cinggaꞌtuꞌra mabirih to Puang Allataala,
apa ia to kamamasean-Na diperasai angge tuotaꞌ.
Moi siupuh bonginaꞌ kumarrak,
apa ianna mariwangmo mariomoꞌ.
7 Ia ke teꞌdai kumasussa, kukua mangkada,
“La melo bang to katuoankuꞌ!”
8 Oo Puang Allataala, kamamasean-Taꞌra,
Tabennaꞌ kamawatangan susi buntu batu.
Apa ia ton-Tasalainaꞌ,
memmalajaꞌnaꞌ.
9 Oo Puang Allataala, lako Kitaꞌ kunii metaꞌda tulung,
lako Kitaꞌ Puang Allataala to kusompa kunii sumarro kukua,
10 “Teꞌda buaꞌna lako Kitaꞌ ke matenaꞌ
kudipadoꞌ lamunan.
Teꞌdamo kulamangsukkuruꞌ lako Kitaꞌ ke matemoꞌ,
na teꞌdamo kulampangpeissenanni to pangpakamojaꞌ-Taꞌ ke mellitakmoꞌ.
11 Oo Puang Allataala, pesaꞌdingngii to passambajangkuꞌ.
Takamaseinaꞌ, Tatulungnaꞌ.”
12 Ia to batingkuꞌ,
Tasulleimi kamarioan kumanggelluꞌ-gelluꞌ,
na ia to kamassean penawangkuꞌ,
Tasulleimi kamasannangan.
13 Iamo joo teꞌda kulampajaii makkelong mpakalaꞌbih-Kiꞌ.
Oo Puang Allataala to kusompa,
la mangsukkuruꞌ tarruhnaꞌ lako Kitaꞌ.