Kamakuasan-Na Puang Allataala pajan susi angin baraꞌ
29
Kelongna Raja Daud.Ee totorro llan suruga, pakalaꞌbih-Hi Puang Allataala!
Pakalaꞌbih-Hi to kamalaꞌbiran-Na na kamakuasan-Na.
2 a Pakalaꞌbih-Hi to sangan-Na Puang Allataala,
sompa-I mpake pakean maballo.
3 Ia to gamaran-Na Puang Allataala to malaꞌbih gumalugu susi galugu jao tasik,
ia to gamaran-Na nnongngoh jao tasik maluah.
4 Ia to gamaran-Na Puang Allataala,
liwaꞌ mawatang na makuasa.
5 Ia to gamaran-Na Puang Allataala ssongkan kaju aras,
mpatibuak baranaꞌ aras Libanon.
6 Ia to buntunna Libanon
Napupellaꞌbu-laꞌbu susi anak sapin,
na ia to buntunna Siryon
mellaꞌbu-laꞌbu susi anak tedong.
7 Ia to gamaran-Na Puang Allataala
mpupacullepaꞌ kilaꞌ,
8 mpatiroge padang pallawangan,
mpatiroge padang pallawangan Kades.
9 Ia to gamaran-Na Puang Allataala mpusabaꞌi nakeanak to jonga,
nasilolloran to daun kaju llan pangngalah.
Napada simetamban to sininna tau llan Bola Puang Allataala kumua,
“Pakalaꞌbih-Hi Puang Allataala!”
10 Puang Allataala cumadokko jao wai jaona liu langiꞌb.
Raja-I Namangparenta teꞌda anggena.
11 Dennaa upaꞌ Napamawatangngi Puang Allataala to ummaꞌ-Na,
Nabarakkaꞌii namasannang.