Passambajang metaꞌda tulung
28
Kelongna Raja Daud.Oo Puang Allataala, matiꞌ kale-Taꞌ kunii metaꞌda tulung,
Kitaꞌmo to kunii mentilendung susi tau mentilendung jio buntu batu.
Pesaꞌdingngii petaꞌdangkuꞌ, sabaꞌ ia ke teꞌda Taparinawanaꞌ susi tomatemoꞌ.
2 Pesaꞌdingngii ke metambanaꞌ metaꞌda tulung,
ke nnangkaꞌnaꞌ limangkuꞌ massambajang mennolo lako Bola malaꞌbih-Taꞌ.
3 Danggiꞌ Tasessanaꞌ ke Tasessai to togajaꞌ,
to mpugauk bang kagajatan.
Melo bang jio timunna,
apa gajaꞌ llan penawanna.
4 aSessai situruꞌ panggaukanna,
sabaꞌ panggaukan gajaꞌ manda to napugauk.
Pabalahhii sitinaja panggaukanna,
naampaꞌi to asseleꞌ panggaukanna.
5 Ia to tosusi joo teꞌda naanggaꞌi to apa Napugauk Puang Allataala,
teꞌda too naanggaꞌi to panggaraga liman-Na.
Iamo joo Nalassessai Puang Allataala,
Nalanynyaꞌii nateꞌdamo dikita.
6 Dipakalaꞌbih to Puang Allataala,
sabaꞌ Napesaꞌdingngimi to petaꞌda tulungkuꞌ.
7 Puang Allataala mpamawatangnaꞌ,
Nalendungnginaꞌ susi perisai,
kumatappaꞌ lako kale-Na.
Masannang penawangkuꞌ,
makkelong mangsukkuruꞌ lako Puang Allataala,
sabaꞌ Natulungnaꞌ.
8 Puang Allataala mbenni kamawatangan to ummaꞌ-Na,
Ia mpangngewanni sola mpasalamaꞌi to raja mangka Napilei.
9 Oo Puang Allataala, pasalamaꞌi to ummaꞌ-Taꞌ,
Tabarakkaꞌii to sininna taun-Taꞌ.
Tarewaii,
Tajagai tarruhhi teꞌda anggena.