Passambajang mangpakalaꞌbih
27
Kelongna Raja Daud.Puang Allataala to mpasalamaꞌnaꞌ na butung arrang llan katuoankuꞌ,
iamo nateꞌda kumalajaꞌ.
Iamo benteng pentilendungankuꞌ
na teꞌda to la mpambeꞌbehnaꞌ.
2 Ia ke nararinaꞌ tomangpanggaukan gajaꞌ to madoang mpateinaꞌ,
kannora ia titodo namelontin.
3 Moi nagaja buda tentara ntalimbungnaꞌ,
teꞌda kulamalajaꞌ.
Moi naden kasirarian,
tattaꞌnaꞌ rrannuan Puang Allataala.
4 Mesaꞌra to kupetaꞌda lako Puang Allataala,
ia mandara to madoangnaꞌ:
mariꞌpih tarruh angge tuokuꞌ llan Bola Puang Allataala
mperasai kameloan penawan-Na Puang Allataala,
kumasannang massompa llan Bola-Na.
5 Puang Allataala llendungnginaꞌ ke masussanaꞌ.
Nabuninaꞌ llan Bola-Na,
Napajaonaꞌ ngenan to kunii manyaman.
6 Na ia too kutaloimi to ewakuꞌ to ntalimbungnaꞌ,
kumearrak,
kumangkaroba llan Bola Puang Allataala,
kumangsukkuruꞌ makkelong mpakalaꞌbih-Hi.
7 Oo Puang Allataala, pesaꞌdingngii tee petaꞌdangkuꞌ,
kamaseinaꞌ Tapebalinaꞌ.
8 Takua mangkada llan penawangkuꞌ,
“Maleko mai musompa-Naꞌ.”
Mebalinaꞌ kukua,
“Ieꞌ Puang Allataala, ratunaꞌ ssompa-Kiꞌ.”
9 Danggiꞌ Takabirihnaꞌ,
danggiꞌ nateꞌda Tatarimanaꞌ tee akuꞌ tompangjaman-Kiꞌ,
sabaꞌ Kitaꞌmo to ntulungnaꞌ.
Oo Puang Allataala Tomangpasalamaꞌkuꞌ,
parinawanaꞌ, danggiꞌ Tasalainaꞌ.
10 Moi nasalainaꞌ indo-ambeꞌkuꞌ,
Puang Allataala mparakainaꞌ.
11 Oo Puang Allataala, ajahhinaꞌ pakkaeloran-Taꞌ,
patujunaꞌ lako lalan katonganan,
kuwaꞌding nnoloi ewakuꞌ.
12 Danggiꞌ Taeloranni to ewakuꞌ mpasau akkatta gajaꞌna lako akuꞌ,
sabaꞌ maparrang to tosaꞌbi tangtongan nnanggarannaꞌ kada.
13 Matappaꞌnaꞌ kumua la mperasainaꞌ kameloan penawan-Na Puang Allataala llan katuoankuꞌ.
14 Rannuanni to Puang Allataala,
pemawatangngii mipamasumangaꞌ penawammi.
Tongan, rannuanni to Puang Allataala.