Passambajangna toteꞌda salana
26
Kelongna Raja Daud.Oo Puang Allataala, pattantumi kumua teꞌda kukasalan,
sabaꞌ melo panggaukankuꞌ na teꞌda caccakuꞌ.
Puang Allataala manda kurannuan,
na lantuk penawangkuꞌ matappaꞌ na teꞌda kubata.
2 Oo Puang Allataala, paressai penawangkuꞌ Taujinaꞌ,
kitai to penawangkuꞌ sola to kupikkiriꞌna.
3 Tuli kuingaran kumua tattaꞌ-Kiꞌ mpakamojaꞌnaꞌ,
kutattaꞌ mpugauk pakkaeloran-Taꞌ.
4 Ciaꞌnaꞌ sirau pangnguraga,
baꞌtu siamaꞌ to tomelo jio timunna apa gajaꞌ llan penawanna.
5 Kukabaꞌci to kasirempunanna to tompugauk kagajatan,
kupamabela kalekuꞌ jio mai togajaꞌ.
6 Oo Puang Allataala, mbaseinaꞌ limangkuꞌ tandana kumua teꞌda kukasalan,
kumaneꞌ lumingka ngguririkki ngenan pangkaroban lako Kitaꞌ,
7 kumukkun mpukelong, kelong kurru sumangaꞌ
sola mpangpeissenan panggaukan-Taꞌ to mejangngaran.
8 Oo Puang Allataala, liwaꞌ kukamaliꞌ to Bola-Taꞌ,
to nanii kamalaꞌbiran-Taꞌ.
9 Danggiꞌ pateinaꞌ ke Tapateii to tokasalan,
danggiꞌ kaꞌtui sungaꞌkuꞌ ke Takaꞌtuii sungaꞌna to topapatean,
10 to teꞌda pajana mpugauk kagajatan,
na nakabudai ntarima sogoꞌ.
11 Apa ia tee akuꞌ, melo panggaukankuꞌ na teꞌda caccakuꞌ,
kamaseinaꞌ Tapasalamaꞌnaꞌ.
12 Kusalamaꞌ jio mai sininna abalaꞌ,
kupakalaꞌbih-Kiꞌ llan kasirempunan ummaꞌ-Taꞌ.