Passambajang metaꞌda diaddampangan sola dilendungngi
25
Kelongna Raja Daud.Oo Puang Allataala, massambajangnaꞌ lako Kitaꞌ.
2 Oo Puang Allataala to kusompa, matappaꞌnaꞌ lako Kitaꞌ.
Danggiꞌ Taelorannaꞌ dipakasiriꞌ,
danggiꞌ naarreinaꞌ sininna ewakuꞌ.
3 Ia to tomangrannuan lako Kitaꞌ teꞌda naladipakasiriꞌ,
apa ia to tomangngewa la dipakasiriꞌ.
4 Oo Puang Allataala, paissenninaꞌ to pakkaeloran-Taꞌ,
patujunaꞌ apa to sipatoꞌ la kupugauk.
5 Ajahhinaꞌ sola patujunaꞌ
tuo situruꞌ pakkaeloran-Taꞌ,
sabaꞌ Kitaꞌmo Puang Allataala to mpasalamaꞌnaꞌ
natuli mangrannuannaꞌ lako Kitaꞌ.
6 Oo Puang Allataala, ingaranni to kameloan penawan-Taꞌ sola pangpakamojaꞌ-Taꞌ
to Tapangpekitanmo mellao jiona mai.
7 Danggiꞌmo Taingaranni to dosakuꞌ sola kasalankuꞌ tongkumalolleꞌ unapa,
apa ingarannaꞌ situruꞌ pangpakamojaꞌ-Taꞌ sola kameloan penawan-Taꞌ.
8 Makassing na maruruh to Puang Allataala.
Iamo Napakitanni lalan katonganan to tolao sala.
9 Napatujui atoran-Na to tompamajiong penawanna,
Naajahhii pakkaeloran-Na.
10 Tongan to Napugauk Puang Allataala,
Natattaꞌ mpakamojaꞌ to tonturuꞌ janji sola atoran-Na.
11 Oo Puang Allataala, budamo kasalankuꞌ,
addampangannaꞌ dikua nadipakalaꞌbih to sangan-Taꞌ.
12 Puang Allataala mpatujui to tongkalajaꞌ-ngkasiriꞌ-I
lako lalan to nang la naola.
13 Ia joo tau, la tattaꞌ masannang to katuoanna,
na ia to batiꞌna la tattaꞌ ntorroi tana manah.
14 Napusobaꞌ Puang Allataala tongkalajaꞌ-ngkasiriꞌ-I,
Napamanassanni janjin-Na.
15 Tattaꞌnaꞌ rrannuan pangtulung-Na Puang Allataala,
sabaꞌ Ia mpasalamaꞌnaꞌ jio mai abalaꞌ.
16 Oo Puang Allataala, parinawanaꞌ Takamaseinaꞌ,
sabaꞌ mesa-mesaraꞌ na masussa toonaꞌ.
17 Talaꞌparannaꞌ jio mai kamaparrisankuꞌ,
sabaꞌ samabandaꞌ-bandaꞌnami to paꞌdik penawangkuꞌ.
18 Taparinawai to kamaparrisankuꞌ sola kamasussankuꞌ,
addampanganni to sininna dosakuꞌ.
19 Takitai, liwaꞌ budanna ewakuꞌ,
na gaja nakabaꞌcinaꞌ.
20 Jagainaꞌ sola pasalamaꞌnaꞌ
na danggiꞌ napakasiriꞌnaꞌ ewakuꞌ,
sabaꞌ Kitaꞌ kupentilendungngi.
21 Dennaa upaꞌ kupugauk katonganan sola kamarurusan penawa,
sabaꞌ Kitaꞌ kunii mangrannuan.
22 Oo Puang Allataala, laꞌparanni ummaꞌ-Taꞌ to-Israel
jio mai sininna kamasussanna.