Nabi Amos mbatingngi to-Israel disessa
5:1-3
5
Ee umma' Israel, pesa'dingii! La mpukelong-Na' kelong bating, nasaba' kamasussanmi:2 Ia to to-Israel susi ana'dara,
to masolang dibuno
na dipupangngelohna tipandan bang jiong tanana,
na te'da tompake'dehhi.
3 Mangkada-I PUANG Allataala Nakua, “Ia to tau lan kota, sangsa'bu male parari, saratuhmora pole. Na ia to tau saratuh male parari, sangpulomora pole.”
Natambaii Puang Allataala to to-Israel nabalik lako kale-Na
5:4-15
4 Mangkada-I PUANG Allataala lako to-Israel Nakua, “Balik kamu' lako Aku' misalama' jio mai pangsessa-Ku'. 5 Danggi' male massompa lako kota Bersyeba. Danggi' too miangah-Na' inde' kota Betel nasaba' la dilanynya'i. Danggi' too mimale lako kota Gilgal, nasaba' ia to to-Gilgal nang la male dipali'.”
6 Ee, kamu' to-Israel, balik kamu' lako PUANG Allataala misalama' jio mai pangsessa-Na. Ia ke te'da mibalik la Naparatuan kamu' pangsessa susi api, ncappu'i kamu'. Moi mesa' tau te'da ngkullei mbosianni joo api kumua nasalama' to kota Betel. 7 Macilaka kamu' nasaba' te'da mimaruruh rra'tah kara-kara, mibalikanni to katonganan.
8 Puang Allataala to mpaden bintuin jao langi',
susinna bintuin Belantik na bintuin Kartika.
Na Puang Allataala too nnatoro'i mpasisullei allo na bongi.
Ia too to mparatu wai saba' jiong mai tasik Nabolloanni de' gantanan.
Sininna joo PUANG Allataala to mpugaukki.a
9 Iamo ssessai to tomawatang nalanynya' sola bentengna.
10 Mikaba'ci to tompau katonganan ba'tu tomaruruh rra'tah kara-kara. 11 Mipakario-rio to tokaasi-asi mirampa too to gandumna. Iamo joo moi ngkabua' kamu' bola ballo, te'da milantorroii. Moi mitanannii anggoro' to bara'bahmi, te'da too milapebuaii to assele'na. 12 Kuissen kumua, liwa' buda kagajatan sola dosa mipugauk. Mpasala kamu' to maruruh penawanna, mimadoang too disede doi', arannai te'da mimaruruh rra'tah kara-karana to tokaasi-asi. 13 Ia joo wattu, kagajatan mandamo napugauk tau, iamo na la'biranni to tomacca na kainawa kamma' bang ngkita kagajatanmi.
14 Pangngukuii mpugauk kameloan, danggi' mipugauk kagajatan misalama' jio mai pangsessa-Na Puang Allataala. Na PUANG Allataala Tomakuasa la tatta' ssolan kamu', susi to biasa mipau. 15 Danggi' mikabudaii mpugauk kagajatan, apa kameloanra mipugauk, mimaruruh rra'tah kara-kara. Dennaa upa' Nakamaseii PUANG Allataala Tomakuasa to to-Israel to tuo unapa.
La mbatingngi to to-Israel
5:16-17
16 Mangkada-I PUANG Allataala Tomakuasa Nakua, “La mbating to tau jio pasa', sumarro sikumillakan to tau jio lalan, sanga massei. Na ditambai to pangdusung sola tomacca mbating, mbatingngi kamu'. 17 Na sininna to tau jio bara'bah anggoro' la mbating too, nasaba' ratu-Na' ssessa kamu'.” Susimi joo kadan-Na PUANG Allataala.
La ratu-I Puang Allataala rra'tah kara-karana umma'-Na
5:18-20
18 Macilaka kamu' to tontajan allo karatuan-Na PUANG Allataala rra'tah kara-karana tolino, sanga te'da bua'na lako kalemi. Ia joo wattu menjajiri pangsessa lako kamu', tangngia allo kamasannangan. 19 Susi to tompessalai singa, apa kannori sitammu beruang. Ba'tu susi to topole lako bola, sissare lako rinding mpasau bo'jo'na, apa kannori natitto ulah. 20 Ia joo allo karatuan-Na PUANG Allataala, mparaturi kamaparrisan lako kamu', tangngia kamasannangan.
Nakaba'ci Puang Allataala to passompanna to-Israel
5:21-27
21 Mangkada-I Puang Allataala Nakua, “Kukaba'ci na te'da bua'na to pangmaroasan agamami, na ia to kasirempunanmi massompa mpatikollok-Na'.b 22 Nang te'da Kukabudai to karoba ditunu pu'puh ba'tu kande mipassompan lako Aku'. Cia' too-Na' ntarimai to patuoanmi simaloppok to mipangkaroban menjaji pangkaroba kasikalinoan.c 23 Soro'ii tuu kelong passompamu to metaruan. Cia'-Na' ssa'ding pangcu'bekanmu. 24 Apa iara to kamarurusan sola kameloan la mipugauk tarruh lako tokaasi-asi, susi wai sa'dan lolong tarruh.
25 Ee, umma'-Ku' Israel! Ia tommilingkai padang pallawangan patangpulo taunna te'dara mipassompan karoba digere' ba'tu mpassompan kande lako Aku'. 26 Apa ia too, misompai to tau-tau disanga Sakut to misanga rajami sola bintuin Kewan to mikita dewata. Ia to tau-tau panggaraganmi, la mibawa 27 ke Kupali' kamu' la'bih mambela na kota Damsyik.” Susimi joo kadan-Na PUANG Allataala to disanga Allataala Tomakuasa.d