La nasessa Puang Allataala to baine to-Samaria to ewanan lino mandamo nakacirinnai
4:1-3
4
Pesa'dingii, ee kamu' baine to-Samaria, to makuttu na siloppokan susi sapin Basan. Misessa to tokaasi-asi, mipakario-rio to toparallu ditulung, misua to muanemi mpasadia pangngiso' melangoan mimangngiso' sola mpesannangngi kalemi. 2 Iamo joo, Namangka massapah PUANG Allataala, mpau kale-Na Nakua, “Sitonganna te'damo namasain nadete'i wattunna midirui' ngasan mpake bassi pekabe' susi ke mangpekan bale. 3 La dipembuangan simesa'-mesa' kamu' lan mai kota, dipannola jio alla' tembo' midirui' mangnguju lako Buntu Hermon.” Susimi joo kadan-Na PUANG Allataala.Cia'i to to-Israel mengkatoba' lako Puang Allataala
4:4-13
4 Mangkada om-I Puang Allataala Nakua, “Ee to-Israel, malemo kamu' lako ngenan passompan jio kota Betel mipugauk kagajatan jio. Male too kamu' lako kota Gilgal, mipugauk kagajatan, mipassompan karoba ke makale' oi, mibawai tawa sangpulona to assele'mi ke ganna' omi tallung allo. 5 Mpangkaroban kamu' roti, menjaji tanda kurru sumanga'mi lako Aku', mibawa toopa passompan canning atimmi dikua napuji kamu' tau, nasaba' susimi joo to mikabudai.” Susimi joo kadan-Na PUANG Allataala.
6 Mangkada-I Puang Allataala Nakua, “Aku'mo to mparatu karorian la'da' lan sininna kotami, apa cia' bang unapa kamu' balik lako Aku'.” Susimi joo kadan-Na PUANG Allataala. 7 Mpatarruhh-I kadan-Na Puang Allataala Nakua, “Aku' too to tangparatu uran tonna gaja mparallui wai to tanananmi. Kupauran jio mesa' kota, nate'da jio kota laen. Nauranni to mesa' bara'bah, namakase to bara'bah laen. 8 Bo'jo'mi to tau male nnangah wai jio mai mesa' kota lako kota laen, apa te'da naganna' napasauan wakkena. Na moi na susimo joo, te'da unapa mibalik lako Aku'.” Susimi joo kadan-Na PUANG Allataala.
9 Mangkada-I Puang Allataala Nakua, “Mangka-Mo' mparatu allo malussu na simalajuan to tananan, mpaden too-Na' ulli' to ngkande tanananmi sola anggoro' lan bara'bahmi. Na ia to garonto' ara sola garonto' zaitunmi, cappu' nakande batik. Apa moi nasusi joo, te'da unapa mibalik lako Aku'.” Susimi joo kadan-Na PUANG Allataala.
10 Mangkada-I Puang Allataala Nakua, “Mangka-Mo' mpakannai kamu' saki mematean, susi to Kupakannan to-Mesir. Matei lan kapararian to tomalolle'mi, na ia to nyarang napake dirampai. Na ia to minii mangtenda ponno bau tomate, naliwa' gaja bau. Apa moi nasusi joo, te'da unapa mibalik lako Aku'.” Susimi joo kadan-Na PUANG Allataala.
11 Mangkada-I Puang Allataala Nakua, “Mangkamo kamu' pira' Kulanynya'i susi tong-Kulanynya'i to to-Sodom na to-Gomora sola kotana. Na ia to tuo unapa lan alla'mi susimira to tampak kaju nasesa api to diala lan mai dapoh. Na moi nasusimo joo, te'da unapa mibalik lako Aku'.” Susimi joo kadan-Na PUANG Allataala.a 12 Mangkada-I Puang Allataala Nakua, “Ee to-Israel, susimi joo to pangsessa-Ku'. Jaji sadia kamu' mperasaii joo pangsessa.”
13 Puang Allataala to mpaden buntu sola angin.
Napangpeissenanni lako tolinoto to akkatta-Na.
Ia mpadenni to allo na bongi,
Nalumingka jao buntunna lino.
PUANG Allataala Tomakuasa
iamo sangan-Na.