Amos 1

Sura' Nabi

Amos

Iamo tee to kadan-Na Puang Allataala to naparatu Nabi Amos, mesa' tomangrewa bembala' to tojio mai kota Tekoa. Ia tonna mangparenta to Raja Uzia jio tana Yehuda, na Raja Yerobeam anakkana Yoas mangparenta jio tana Israel, ntarimai pengkita jio mai Puang Allataala to Nabi Amos, apa to la jaji lako to-Israel. Duang taun mangkanna tee pengkita lako Amos, naden nino.

2 Nakua Nabi Amos:

Menggalugu to gamaran-Na PUANG Allataala

jio mai Yerusalem jao Buntu Sion

arannai memmakase to reu jio padang to dinii mangrewa bembala'

ratu de' Buntu Karmel.

Pangsessana Puang Allataala lako buda bangsa

1:3–2:3

Pangsessa lako to-Siria

1:3-5

3 Mangkada-I PUANG Allataala Nakua, “Ia to to-Damsyik pembuda bangmo mpugauk kagajatan, iamo joo nang la Kusessai. Nasaba' gaja maparrang ssessa to-Gilead napandasa-dasa tonganni susi pare dilullu'. 4 Iamo joo Kulassumpunni to istanana Benhadad, to pura istanana Raja Hazael. 5 Ia to salli' babangan kota Damsyik la Kusolangan, na ia to tau jio Lombok Awen sola tomangparenta jio Bet-Eden la dilanynya'i ngasan. Na ia to to-Siria la dipali' lako tana Kir.” Susimi joo kadan-Na PUANG Allataala.

Pangsessa lako to-Filistin

1:6-8

6 Mangkada-I PUANG Allataala Nakua, “Ia to to-Gaza pembuda bangmo mpugauk kagajatan, iamo joo nang la Kusessai. Nasaba' ia tonna mangka mangrari to to-Gaza na patalo, ia to tonatalo jio mai pira-pira kampong nabalukki lako to-Edom napukaunanni. 7 Iamo joo Kulassumpunni to kota Gaza, nacappu' to bentengna. 8 La Kupatei ngasan to tau sola tomangparentana to torro jio kota Asdod na Askelon. Kusessa tooi to to-Ekron, arannai mate ngasan to to-Filistin.” Susimi joo kadan-Na PUANG Allataala.

Pangsessa lako to-Tirus

1:9-10

9 Mangkada-I PUANG Allataala Nakua, “Ia to to-Tirus pembuda bangmo mpugauk kagajatan, iamo joo nang la Kusessai. Nasaba' tangnaingaranmi to bassena kumua te'da na la siewali sola kampong laen na ia tonna mangka rrarii na patalo, ia to tonatalo jio mai pira-pira kampong nabalukki lako to-Edom napukaunanni. 10 Iamo joo Kulassumpunni to kota Tirus, nacappu' to bentengna.”

Pangsessa lako to-Edom

1:11-12

11 Mangkada-I PUANG Allataala Nakua, “Ia to to-Edom, pembuda bangmo mpugauk kagajatan, iamo joo nang la Kusessai. Te'da napaja ssessai to to-Israel, na sile'tona bang una. Naula' pa'dangngi, na nakaba'ci tarruh ratu lako matena. 12 Iamo joo Kulassumpunni to kota Teman, na mangngulala' to api nacappu'ii to benteng jio Bozra.”

Pangsessa lako to-Amon

1:13-15

13 Mangkada una-Pi PUANG Allataala, Nakua, “Ia to to-Amon pembuda bangmo mpugauk kagajatan, iamo joo, nang la Kusessai. Nasaba' ia tonna mangrari la mpemaluahhi kaparentanna, gaja buda to to-Gilead napatei, moi to baine keba'tang naballakki to ba'tangna. 14 Iamo joo Kulassumpunni to kota Raba, nacappu' to bentengna. Ia joo wattu la disa'ding to oni kasirarian susi angin bara' na simetamba-tamban to tau. 15 Na ia to rajana to-Amon, nang la dipali' sola tomapangka'na.” Susimi joo kadan-Na PUANG Allataala.