La Kama'mi lino
12:1–13
12
Mangkada pole'i joo malaeka' mangrupa tau, nakua, ‘Ia ke la Kama'mi lino, la ratui Mikhael sala mesa'na kapala malaeka' ntulung bangsamu. Na ia joo wattu na la den kamaparrisan la'da'. Te'dapa naden kamaparrisan susi joo, mangpamula den bangsa ratu lako joo wattu. Apa la salama' bangsamu to diuki'mo sanganna lan Sura' Katuoan.a 2 Buda to tomatemo la tuo pole'. Den to totuo pole'mo, la tuo te'da anggena, na den too to la disessa te'da anggena.b 3 Ia to tomacca la nnampa' kamala'biran susi arrang jao langi' ba'tu susi bintuin to mangngarrang tarruh te'da cappa'na.’4 Mangkada omi joo malaeka' mangrupa tau nakua, ‘Ee Daniel, anna meloi tee sura', mutatta' njagaii ratu lako Kama'na lino. Buda tau male lako male jio mai madoang nnissenni, dikua nakerangngan to kapaissenanna.’c
5 Mangkai joo too, ia tee aku' Daniel ngkita dua malaeka' laen ke'deh naalla'i sa'dan. Mesa' jio randan inde'na liu, na mesa' jio randan sambali'na. 6 Kukita unapi to malaeka' mangrupa tau jaoanna sa'dan to kukita ba'tu piran. Mekutanami sala mesa'na joo malaeka' ke'deh jio randan sa'dan lako joo malaeka' mangrupa tau nakua, ‘Pirara masainna la jaji joo kamaparrisan la'da' te'da susinna?’ 7 Ia joo malaeka' mangrupa tau, nnangka' dua limanna de' langi' na massapah jio olo-Na Puang Allataala to tuo te'da anggena, nakua, ‘La jaji tallung taun sitangnga masainna. Ianna mangkamo diancuru' to kamawatanganna umma'-Na Puang Allataala, mane'ri dianggei joo apa jaji.’d
8 Ia tee aku' Daniel, kusa'ding ngasan to kada napau malaeka', apa te'da kupahangngi apa battuananna joo nasanga. Jaji kukutanaii kukua, ‘Iye' puang, apara la jaji ke cappa'mi joo kajajian la'da'?’ 9 Mebalii joo malaeka' nakua, ‘Danggi' mumalaja' Daniel, nasaba' ia tee kadan-Na Puang Allataala la dianna melo na dijagai ratu lako Kama'na lino. 10 Buda tau la diuji kamatapparanna, namacero te'da caccana. Apa ia to togaja', tatta'i ia gaja'. Te'da na la mpahangngi joo tau to akkatta-Na Puang Allataala. Apa ia to tomacca mangpangngajaran kameloan la mapahang.e 11 Mangpamula tonna dita'dei to pangkaroba to dipugauk keallo-keallo nadipake'deh to apa liwa' mecarepan to disanga “Kagajatan to mesolangan” lan Bola Puang Allataala, la den 1290 allona.f 12 La maupa' to tau tatta' matappa' na sabbara' arannai la mbulewanni to wattu 1335 allona. 13 Apa iko Daniel, tatta' bangko matappa' te'da anggena, la mateko, apa la tuo pole'ko mutarima pahala jio ahera'.’ ”