11
Ia tonna anu' mangka toomo' jio sa'dena ntulungngi, kupamawatangngi, iamo tonna taun pamulanna nanii mangparenta Raja Darius to-Media.’
Kadatuan Mesir na kadatuan Siria
11:2–45
2 Mpatarruhhi kadanna joo malaeka' mangrupa tau lako aku' Daniel nakua, ‘Ia to la kupauanko nang la jaji. La den unapa tallu raja la mangparenta jio Persia, namane' den raja mangpennappa' to la'bih sugih na ia joo raja tallu jolona, na ia ke memmawatangmi sanga kasugiranna la rrasimi sininna bangsa nnewa kadatuan Yunani.
3 La den pole'pa mesa' raja liwa' mawatang la mparenta kadatuan gaja luah, na mpupangngelohna bang elohna. 4 Apa te'da namasain mangparenta joo raja natitawa appa' joo kadatuanna, situru' appa' sulapa'. Na ia to raja ssullei tangngiamo bati'na, na te'damo nasusi kamawatanganna. Saba' titawami joo kadatuan naparentai tolaen.
5 Ia to raja lo'na liu ba'tu Raja Mesir la memmawatang. Apa den sala mesa'na to pangbaraninna la'bih mawatang na rajana, na la mparenta kadatuan la'bih maluah pole'pa. 6 Ba'tu pirang-pirang taun mangkanna joo ia joo raja kadatuan lo'na liu mpadenni kasibassean sola raja kadatuan jajanna liu. La napasibalii to anakkana baine sola raja kadatuan jajanna liu. Apa ia joo kakuasan te'da namasain, na te'da napatarruhhi bati'na nasaba' dipateii joo baine sola muanena na anakkana, moi to kaunanna male ssolanni dipatei too. 7 Te'da namasain mangkanna joo la den unapa mesa' tau to rapunna joo anakkana datu baine mangka dipatei la menjaji raja lo' kadatuan Mesir ssullei ambe'na. La nararii to kadatuan jajanna liu nataloi, natamaii to bentengna. 8 Ia to tau-tau dewata to dikabua' jio mai tambaga dipalolloh sola parewanan makeangga' jio mai salaka sola bulawan narampa la nabawa lako tana Mesir. Mangkai joo too la den ba'tu pirang-pirang taun te'da nararii to kadatuan jajanna liu. 9 Mangkai joo too malei sau' to raja jajanna liu la mentama kadatuan lo'na liu, apa pole boko'i.
10 Ia to anakkana muane raja kadatuan jajanna liu la mpasadia buda surudadu la male rrarii to kadatuan lo'na liu. Sala mesa'na joo anakkana ssolan surudadu susi wai saba' budanna. Ia tee mangpenduanna male rrarii natamai to bentengna ewalinna. 11 Gaja birihhi joo raja lo'na liu, na ia kalena la male sola surudadunna sirari raja jajanna liu. Na moi la'bih buda surudadunna to raja jajanna liu apa nang la nataloi. 12 Majao penawami, sanga pataloi na gaja buda surudadu napatei. Apa moi nasusi joo, te'da namasain to kakuasanna.
13 Mangpenduannami to raja jajanna liu mpasadia buda surudadu, la'bih budapa na ia tonna jolona. Ia ke wattunnamo malemi mangrari mbawa surudadu kamban sola buda parewa dipake mangrari. 14 Ia joo wattu buda tau la nnewa raja lo'na liu, na den ba'tu pira-pira tomasa'ga' jio mai bangsamu to-Yahudi la nnewa too, nasaba' mangkai ngkita pengkita, apa te'da assele'na to tau. 15 La ratu to raja jajanna liu ntombon litak jio sa'de benteng la naola, ntamai joo kota. Te'damo nakullei mangngewa to surudadu kadatuan lo'na liu, moi na den to surudadu macca na mawatang to mangka dipilei. 16 Ia to raja jajanna liu la mpupangngeloh bang elohna mangpugauk, na moi mesa' tau te'da nnewai. Natorroi to Tana Kaminang Makassinga nawa'ding nnancuru'i. 17 Namane' mpasadia sininna surudadunna la rrarii to kadatuan lo'na liu, dikua anna kuasai ngasanni. Namane' mpaden kasibassean, napasibali anakkana baine sola rajana kadatuan lo'na liu, apa ia joo akkattana te'da najaji. 18 Mangkai joo too, la male omi rrarii to bangsa torro jio randan tasik, na buda to nataloi. Apa den mesa' kapala surudadu to la nta'tan panggaukan gaja' to napugauk. La napabalahhi lako kalena to panggaukan gaja'na. 19 Ia joo raja jajanna liu la polemi tama benteng kadatuanna, apa la ditaloii na anggemi curitanna.
20 La nasullei mesa' raja to la ssua taunna la mparuku tau rrempun sima, la napangrangnganan kasugiran kadatuan. Te'da namasain na la dipatei joo raja, te'da namate lan kamabirisan ba'tu lan kasirarian.’
21 Mpatarruhhi kadanna joo malaeka' mangrupa tau nakua, ‘La den pole' raja la mparenta kadatuan jajanna liu, mesa' tau to te'da na diangga' to tangsipato' menjaji raja, apa te'da nadikalannai naratu kalasi, narampai to kadatuanna. 22 Sininna to surudadu ratu nnewai, moi to raja mangka nasibassean la nalanynyasan ngasan. 23 Natengkai to basse mane' mangka napaden sola bangsa laen, nasaba' kalasii. Samawatang-watangna moi na ci'di'ra tau nasolan. 24 Tangdikalannai natamaii to padang kaminang malompo lan joo kadatuanna, namane' rrampai to ewanan. Mangkai joo too natawa-tawai lako taunna to ewanan narampa. Mpugauk panggaukan to te'dapa napugaukki tojolona. Mangngattai la ngkuasai pira-pira to benteng, apa ci'di'ra wattunna.
25 Napangpekitanni to kamawatanganna sola kabaranianna la nnewai to raja lo'na liu nampake surudadu gaja buda, na moi nasadia too to raja lo'na liu rrarii sola surudadu buda na mawatang, apa te'da nakullei patalo, nasaba' tau lan bang una kadatuanna to nnewai. 26 Tomangpakainga'na bang una raja to nnewai. Buda to surudadunna la dipatei na dilanynyasan. 27 La cumadokkoi joo raja sola dua nakumande, apa gaja' akkattana sola dua na siuraga. Te'da najaji joo akkattana, nasaba' te'dapa nadete'i wattunna to Napattantu Puang Allataala. 28 La pole re' kampongna raja jajanna liu mbawa ewanan buda to mangka narampa. Den akkattana la nnancuru'i to agamanna umma'-Na Puang Allataala. La mpugauk bang apa nakabudai namane' pole re' kampongna.
29 Ia to wattu pura Napattantu Puang Allataala la male pole' rrarii to kadatuan lo'na liu, apa ia to assele'na te'da nasusi tonna male jolo. 30 Saba' la ratui jio mai Siprus to to-Roma sola kappala'na rrarii, na memmalaja'. Gaja birihhi nalapole nnancuru' agamanna umma'-Na Puang Allataala. Napesa'dingngi to pangpakainga'na to tote'da pole'mo namatappa' lako Puang Allataala.
31 La nasuai to surudadunna la ncarepai Bola Puang Allataala ba'tu bentengna la nta'dei to pangkaroba to dipugauk keallo-keallo napake'dehhi to apa mecarepan to disanga “Kagajatan to mesolangan”.b 32 Nauragai raja to tote'damo nampugauk atoran agama nasedei namadoang mbalii. Apa ia to totatta' matappa' lako Allataala to nasompa la barani nnewai.
33 Den tau to nnampui kamaccan la mpangpangngajaran kameloan na buda tau mapahang, apa te'da namasain. Ba'tu pira-pira joo tomacca la dipatei lan kapararian ba'tu nakande api na den too to dirampo' na ditarungku. 34 Mukkun bang unapa to tomacca dipatei na den tontulungngi apa ci'di'ra. Den too buda tau madoang nasolan apa naanggai'-gai'ra, sanga denri apa nakadoangngi. 35 Ba'tu pira-pira to tomacca mangpangngajah melo la dipatei, apa ia joo menjaji pecoba lako umma'-Na Puang Allataala namacero te'da caccana ratu lako Kama'na lino, iamo wattu to mangka Napattantu Puang Allataala.
36 Napugauk bang raja kadatuan jajanna liu to apa nakadoangngi. Namenjaji matampo, nnangga' kalena la'bih mala'bih na ia to sininna dewata. La'bi-la'bih liwa' ncapa' Allataala Tomakuasa. La jaji ngasan susi to nakadoangngi arannai naperasai to kamabirisan-Na Puang Allataala. Nasaba' ia to mangka Napattantu Puang Allataala nang la jaji.c 37 Ia joo raja matampo, te'da lalo naangga'i to dewata nasompa tojolona, moi to dewata nasompa baine, ba'tu dewata laen. Nasaba' nnangga'i kalena la'bih makuasa na ia to sininna dewata. 38 La ssompai dewata benteng to te'da lalopa napugaukki tojolona. La napassompanni to bulawan, salaka, paramata na ewanan laen to makeangga', lako joo dewata benteng. 39 Pangtulungan joo dewata tokabaru nasompa nawa'ding rrarii to benteng mawatang. Ia to tonnakui joo dewata, la diben kaditarattesan la'da'. La naeloranni to tau menjaji ngkuasai buda tau, nadiben toopa sarona mangrupa tana.
40 Ia tonna mangkatampakanna joo wattu, la nararii Raja Mesir. Namane' la mangpabalahhi to raja jajanna liu mpake bendi kapararian, surudadu makkanyarang, na den too buda kappala'na. Ia to surudadunna liwa' buda la ssamboi buda kampong susi bangmi wai saba'. 41 Moi to Tana Kaminang Makassing la natamai too na mangpulo sa'bu tau napatei. Apa ia to to-Edom, to-Moab sola ia to tongkapalai to-Amon la salama'. 42 La ngkuasaimi buda kadatuan, moi to kadatuan Mesir nakuasai too. 43 La narampai to ewananna to-Mesir, susinna bulawan na salaka sola to ewananna makeangga'. La undi to to-Libia na to-Etiopia nturu'i. 44 Apa den kareba tangmelo jio mai kadellekan sola jaja mai la mpasabakanni, arannai raja jajanna liu gaja birih na la male mangrari la ncappu'i tau liwa' buda. 45 Na la mpake'dehhi tendana to gaja kassing jio paralla'na Tasik Tangnga na buntu maballo to nanii Bola Puang Allataala. Apa la matei. Na moi mesa' tau, te'da ngkullei ntulungngi.’