Daniel 9

Peta'da doangna Daniel

9:1–19

Ia tonna taun pamulanna nanii mangparenta Darius jio Babel, anakkana Ahasweros bati' to-Media, 2 den wattu na ia tee aku' Daniel mbacana' Sura' Allataala. Kupikkiri'i to kadan-Na PUANG Allataala lako Nabi Yeremia nakua, “Ia to kota Yerusalem nang la diancuru' pitungpulo taun masainna.”

3 Iamo joo kumentingngara massambajang meta'da lako Puang Allataala, kupuasa too sola mpake kaen karung, kucumadokko jao au, nasaba' kamasseanna penawangku'. 4 Mangngakuna' lako PUANG Allataala to kusompa, sanga ia to dosa kipugauk. Ia to passambajangku' susi tee, “Oo Puang Allataala Tomakuasa to kikalaja' kikasiri', tatta' Tapugauk to basse-Ta'. Tomamase-Ki' lako sininna tompakamoja'-Ki' na mpugauk parenta-Ta'. 5 Madosa tonganmokan sola tangmessipa' melo, mangpanggaukan salamokan, mangngewamokan na tangngiamo parenta-Ta' iarika atoran-Ta' kipugauk. 6 Te'da kituru'i to pangngajaranna to nabi pangjama-Ta' to mangka Tapattantu la mpangpeissenan pangpangngajah lako raja to mparentakan, lako tomangparentaki', lako tojoloki' sola lako sininna bangsaki'.

7 Oo Puang Allataala, Kita'mo Tomaruruh, apa ia tee kami' sipato'mokan masiri', kami' tee to jio mai Yehuda, to jio mai Yerusalem sola sininna bati'na to-Israel to Tapatitaleh lan lili'na lino, mambela sola mandoppi', nasaba' kipesakkannimi-Ki'. 8 Oo PUANG Allataala, sipato'mokan masiri' sola sininna rajaki', tomangparentaki' sola tojoloki', nasaba' madosamokan lako kale-Ta'. 9 Apa Kita'mo Puang Allataala to kisompa, to ndampangankan sola ngkamaseikan, moi na kinnewa parenta-Ta'. 10 Oo PUANG Allataala to kisompa, te'da kimangpesa'ding lako Kita'. Moi Tasuai to nabi la mparatu parenta-Ta' lako kami', apa te'da unapa kituru'i. 11 Napemboko'i ngasanmo sininna to-Israel to parenta-Ta', napessalai-Ki' na te'damo namadoang mpesa'dingngi-Ki'. Madosa ngasanmokan lako kale-Ta'. Iamo joo mangkamokan Taparatuan to pangsessa, susi to mangka diuki' lan sura'na Nabi Musa, pangjama-Ta'. 12 Najajimo susi to Tapau jolo la jaji lako kami' sola lako tomangparentaki'. La'bi disessamokan to-Yerusalem na ia to tau jio kota laen umbo-umbo nanii lan lili'na lino. 13 Sininna to mangrupa-rupa abala' diuki' lan sura'na Nabi Musa nakanna ngasanmokan, apa te'da unapa kimengkamase lako PUANG Allataala to kisompa, te'da kipaja mpugauk dosa na te'da too kipesa'dingngi pangngajah-Ta' to tongan. 14 Oo PUANG Allataala to kisompa, mangkamokan Taparatuan pangsessa, nasaba' maruruh-Ki' lan sininna panggaukan-Ta', apa te'da kimangpesa'ding.

15 Oo Puang Allataala to kisompa, mangka toomo Tapangpekitan to kakuasan-Ta' mpasun umma'-Ta' lan mai tana Mesir, iamo joo na dipakala'bih to sangan-Ta' ratu lako tee allo. Madosa tonganmokan sola tangmessipa' melo. 16 Oo Puang Allataala, dampangankan situru' kamarurusan-Ta', danggi'mo nakannai kamabirisan-Ta' to kota-Ta' Yerusalem jao buntu mala'bih-Ta'. Nasaba' ia to tau torro jio mengguririkkina kota Yerusalem te'damo naangga'i to umma'-Ta', sola kota-Ta' sanga dosaki' sola kasalanna tojoloki'. 17 Oo Allataala to kisompa, pesa'dingngimi tee peta'danku', barakka'ii tee Bola-Ta' mangka ancuru' dikua na Kita' to dipakala'bih. 18 Oo Allataala to kusompa, pesa'dingngimi peta'danku', kitai kumua mapa'dikmokan na ancuru'mo to kota-Ta'. Meta'dakan mati' Puang, tangngiara sanga kamarurusanki', apa sitonganna sanga kamamasean-Ta'. 19 Oo Puang Allataala to kusompa, pesa'dingngii tee peta'danku', parinawamokan, Tadampangankan. Ia ke wa'dingngi Tapupenjajimi silalona to peta'danku', dikua na Kita' to dipakala'bih, sanga ia to Yerusalem kota-Ta', na ia to kami' umma'-Ta' to Tapileimo.”

Pebalinna Malaeka' Jibrail

9:20–27

20 Massambajang unapa' nnakui dosaku' sola dosa-dosana bangsaku' Israel, meta'da lako PUANG Allataala to kusompa dikua na melo pole' to Bola Puang Allataala jio Yerusalem. 21 Ia tongkumassambajang unapa, ngkita omo' malaeka' Jibrail to mangka kukita ba'tu piran lan pengkitangku', mentia' mangnguju lako aku'. Ia joo wattu mangkaroba soloh allomi to tau. 22 Napamanassai Jibrail lako aku' nakua, “Ee Daniel, ia tee aku' ratuna' mpapahangngiko joo apa napau jolo Nabi Yeremia tonna anu'. 23 Ia tommumangpamulamo massambajang meta'da lako Puang Allataala, Napebaliimoko, kuratu mpauanko, sanga to-Napakamoja' tonganko Puang Allataala. Iamo joo na la mupesa'dingngi meloi kupauan ngasanko battuananna joo pengkita.

24 Napattantumo Puang Allataala pitungpulo manglokkon pitung taun la nanii mpasalama' bangsamu sola kota mala'bih Yerusalem na anggei dosa na nta'dei kasalan. Sininna dosa la didampangan na dipugauk tarruh to katonganan te'da anggena. La jaji tongan to pengkita sola apa to mangka napau jolo nabi tonna anu' na ia to Bola Puang Allataala la dicerak pole'.

25 Ingaran meloi kumua mangpamula dipasun to parenta la mpemeloi pole' kota Yerusalem sanggenna ratu to to-Napilei Puang Allataala la mangparenta, den pitu manglokkon pitung taun na pitu manglokkon annanpulona dua taunna. La digaraga pole'i to lalan jio Yerusalem na la dibenteng mengguririk tooi, apa kamaparrisan la'da' joo wattu. 26 Ia tonna cappa'namo joo wattu la dipateii joo mesa' tau mangka Napilei Puang Allataala mangparenta, moi na te'da lalo salana. Ratumi mesa' raja to gaja lapuh sola surudadunna la ssolangan kota Yerusalem sola Bola Puang Allataala, apa la matei nasaba' wai saba', na ratu lako ke la kama'mi lino la den kasirarian sola kaancurusan susi to mangka Napattantu Puang Allataala. 27 Ia joo raja nggaraga basse mabanda' lako tau buda pitung taun masainna. Ia tonna mattangnganmo joo wattu tangnaeloranni to karoba sola passompan dipugauk. Na den to liwa' mecarepan to disanga ‘Kagajatan to mesolangan’ la dipatama Bola Puang Allataala, na la lan tarruh, angge lako wattu to Napattantu Puang Allataala nanii lanynya'ii joo raja.”