Pengkitanna Daniel ngkita bembala' sola beke
8:1–14
8
Ia tonna taun mangpentallunnamo Raja Belsyazar mangparenta, ia tee aku' Daniel, napakitan pole'na' pengkita Allataala. 2 Lan joo pengkita, jiona' benteng Susan jio propinsi Elam tana Persia. Ke'dehna' jio randan Sa'dan Ulai. 3 Ngkitana' mesa' bembala' muane ke'deh jio randan sa'dan. Malando tandukkuna dua, apa sala mesa' to la'bih malandopa, to mane' tuo. 4 Kukitai joo bembala' muane manglaga tama kalambunan, manglaga re', malaga sau'. La'bi mawatang na ia to olok-olok laen, moi mesa' te'da ngkullei nnewai, ba'tu la'pah jio mai kuasanna. Napugauk bang to apa nakadoangngi, na memmawatang.5 Mukkun unapa' ngkitai, na den mesa' beke muane kinjara' timba' bang lan mai kalambunan lliwa'i lino. Gaja lassi kinjara' arannai te'da narapa' to ajena do' litak. Na den tandukkuna mesa' matonggo tuo lan mai paralla' matanna. 6-7 Ia joo beke gaja birihhi nampake ngasan kamawatanganna male llagai joo bembala' dua tandukkuna to kukita jio randan sa'dan. Kukitai joo beke masa'ga' llagai joo bembala' arannai le'to duai to tandukkuna na te'damo nakullei mangngewa. Melentenni jiong litak joo bembala', nalullu'-lullu'i beke. Moi mesa' tau, te'da ngkullei mpasalama'i.
8 Ia joo beke muane la'bih memmawatang, apa ia tonna liwa'mo mawatang, le'toi joo tanduk matonggona. Na ia to nanii le'to joo tandukkuna, tuo pole'i to appa' tanduk makalaen-laen, to pada tingngo lako appa' sulapa'. 9 Tuo omi mesa' to tanduk biccu' jio mai sala mesa'na joo appa' tanduk, namenjaji gaja tonggo na ia to kuasanna maluah ratu sau' lo'na liu sola lako kadellekan, na moi lako Tana Kaminang Makassing, nakuasai too. 10 Samatonggo-tonggonai to tanduk mane' tuo, arannai ganna' to kamawatanganna nnewai to bintuin jao langi' sola surudadu jao suruga. Na den ba'tu pira-pira to napenca'bean do' litak nalese-lesei.a 11 Naewai to tongkapalai surudadu jao suruga, nata'tanni to tau mangkaroba keallo-keallo lako joo tongkapalai surudadu jao suruga. Nacarepai tooi to Bola Puang Allataala. 12 Kagajatanna to tanduk biccu' na te'damo tau mangkaroba keallo-keallo. Na ia to surudadunna Allataala disorongmo lako kuasanna joo tanduk biccu'. Susimi joo nakeassele' ngasan to apa napugauk.
13 Sitarruhna, kusa'dingngi to dua malaeka' sipangkada. Ia to mesa' malaeka' mekutana nakua, “Pirara masainna la jaji joo apa lan pengkita? Pirara masainna te'da na dipuinawa to karoba keallo-keallo nasaba' ia joo kagajatan mesolangan? Pirara masainna joo Bola Puang Allataala disorong lako kuasanna tanduk biccu' anna ia to surudadunna Allataala nalese-lese?” 14 Mebalii joo malaeka' mesa' nakua, “Ia joo, la jaji ke mangkai 2300 pangkaroba to dipugauk makale' na karuen 1150 allona. Mangkai joo too dipemaceroi pole'mi to Bola Puang Allataala.”
Malaeka' Jibrail mpamanassai battuananna joo pengkita
8:15–27
15 Ia tee aku' Daniel, tongkukitai joo pengkita, kupengkullei mpahangngi to battuananna, nata'pa ke'deh jio oloku' to mangrupa tau. 16 Denmi gamaranna tau kusa'ding metamba jio mai sambali'na Sa'dan Ulai, nakua, “Ee Jibrail, pauanni Daniel battuananna joo pengkitanna.”b 17 Jaji ratumi Jibrail jio to kunii ke'deh. Ia tonna mandoppi'mo liwa'mo' malaja', kusongka do' litak jio olona. Nakua lako aku', “Ee, tolinoko, apa nang la parallu muissen kumua ia joo pengkitammu iamo to la jaji ke la Kama'mi lino.” 18 Mukkun unapi malaeka' Jibrail mangkada, kulimpu. Apa natoena', napake'deh pole'na'.
19 Namangkada pole' Jibrail lako aku' nakua, “La kupauanko apa to la jaji ke la Kama'i lino, Napugaukki Allataala to kamabirisan la'da'na. 20 Ia joo mesa' bembala' muane mukita den tandukkuna dua, iamo to kadatuan Media sola Persia. 21 Ia to beke muane, iamo to kadatuan Yunani. Na ia to tanduk matonggo jio paralla' matanna, iamo to bungah rajana. 22 Ia joo appa' tanduk tuo pole' tonna mangka le'to joo tanduk jolona, battuananna ia joo kadatuan Yunani la menjaji appa' kadatuan. Apa moi mesa' te'da na la pada kamawatanganna to kadatuan Yunani jolona.”
23 Mpatarruhhi kadanna Jibrail nakua, “Ia na la cappa'mo to kadatuan mangparenta, buda tau la mpugauk panggaukan to liwa' gaja'. Na den pole' mesa' raja to gaja parrang namacca mangnguraga. 24 Na liwa' mawatang, apa tangngia kamawatanganna mesa. La nacappu'i ngasan sininna to tonnewai. Ia to apa nakadoangngi la keassele' ngasan. La nataloi to tomakuasa, na la nnancuru' too umma'-Na Allataala. 25 Gaja mangngakkalanni na nnuraga buda tau. Nnangga' majao bang kalena, liwa' matampo. Te'da napau-paui, na te'da nakalannai tau nata'pa nnancuru'i. Moi Allataala, Raja ngkuasai sininna raja, naewa too. Katampakanna ditaloi, apa tangngia tolino ntaloi. 26 Ia joo pengkita mpaui to pangkaroba keallo-keallo 2300 to dipugauk makale' na karuen, to mangkamoko dipauan, nang la jaji. Apa nang la mujagai melo tongan tuu pengkita, sanga gaja sainpa namane' jaji.”
27 Ia tongkumangka ngkitai joo pengkita, masakina' ba'tu pirang-pirang allo masainna. Mangkai joo too, mi'cokmo' kupugauk pole'i to nasuanna' raja. Apa masussa bangna' mpikkiri'i joo pengkita na te'da kupahangngi.