22
La'bi keangga' to dipau melo sanganta', na ia to nnampui buda ewanan,la'bih keangga' to ditaratte' na ia to diben bulawan sola pera'.
2 Den napadan tokaasi-asi na tosugih,
pada Puang Allataala mpadenni.
3 Ia to tomelo akkalanna, napessalai ke denni abala' nakita,
apa ia to totangmapahangpa, tarruh bang arannai macilaka.
4 Ia to naduppa to tongkalaja' ngkasiri' Puang Allataala na mpamajiong penawa
iamo to kasugiran, kadianggasan na katuoan manyaman.
5 Den bangmo sura sola poja jio lalan naola to tomajekkong,
iammu madoang salama', danggi' mumale sola.
6 Ajahhii to tomalolle' tuo messipa' melo llan katuoanna,
dikua naratu lako matuanna da'tan messipa' melo.
7 Nakuasai tosugih to tokaasi-asi,
Napukaunanni tomangpeindan to todipaindanni.
8 La nnampa' abala' to tompugauk bang kamajekkongan,
nate'damo kuasanna la mpandasa tau.
9 Nabarakka'i Puang Allataala to tomalaboh,
sanga mbenni kande tokaasi-asi.
10 Ula'ii to topangcapa', napaja to kasisakkan,
nate'damo tosipura iarika tosipasala melako.
11 La napusoba' raja to tongkabudai maruruh penawa,
namalamma kadanna.
12 Napatangjajii Puang Allataala to pangpakenanna tomajekkong,
Nanii njagai dikua nada'tan dipugauk to kapaissenan tongan.
13 Nakabudairi torro bang jio bola to tomakuttu, namangkada nakua,
“Den singa jio salean, iamo dau ke napateina' jio tangnga lalan.”
14 Butung garuang gaja dalan to timunna baine sala kedo,
na to-Nakagalli Puang Allataala la polloh do'.
15 Nang batenamo to pea mangpanggaukan tobango',
apa wa'ding dipangngajahhi perambi napaja.
16 Inda-inda to mpandasa tokaasi-asi to nnangaran saro kalena,
ba'tu mben paraseng lako tosugih,
nang la kaasi-asii undinna.
Tallung pulo kada bulawanna tomacca
17 Patanan rampa'i talingammu,
la kuajahhiko pangpangngajahna to tomacca!
Parinawa meloi tee kapaissenanku'.
18 La masannangko, ke mupallan penawai tee kuajaranko,
sanga ia ke susiko joo, sadiamo la mupaumira.
19 Kuajahhiko too,
nasaba' madoangna' dikua mumatappa' lako Puang Allataala.
20 Tallung pulo tee pangpangngajah mangka kuukiranko,
to nanii kapaissenan sola pangpakainga',
21 to la nnajahhiko pangpangngajah tongan na dikatappa'i
na ia ke nakutanaiko to tossuako la tongan pebalimmu.
–1–
22 Danggi' murampa apanna tokaasi-asi,
sanga mukua, “La naapara'?”
Danggi' mupandasai jio pangra'tasan kara-kara.
23 Nasaba' la Napangkadananni Puang Allataala,
Napateii to torrampai tokaasi-asi.
–2–
24 Danggi' lalo sisoba' to tomadoi' bang mabirih
ba'tu danggi' siama' to tosalle galli.
25 Iamo dau ke muturu'i to sipa'na,
na te'damo mukullei lla'paran kalemu susi poja nnattako.
–3–
26 Danggi' mupangngakuii to la mbajaran indanna tau laen.
27 Iamo dau ke te'da mukullei mbajahhi,
moi katindoanmu dialai toomoko.
–4–
28 Danggi' lalo mupalelei to katonan padang
to mangka napattantu tojolomu.
–5–
29 Denmoraka mukitai to tomacca njama jamanna?
La dipupangjama llan istanana raja to tosusi joo,
te'da namangjama jio bolana tobiasa.