21
Puang Allataala nnatoro'i to nanii lolong wai salu,susi toomi Ia nnatoro' penawanna raja.
2 Pada ssanga kalena to tau maruruh,
apa Puang Allataalara mparessa issi penawanna tolino.
3 La'bih Nakabudai Puang Allataala to makassing sola maruruh mangra'tah,
na ia to mpassompan karoba.
4 Ngkita majiong tau sola majao penawa,
napupalita togaja' sipa'na na iamo dosa.
5 Nang la buda assele'na to akkattana tomarajin,
apa la tangganna' to kaparalluanna to tosepah.
6 Te'da bua'na to kasugiran diala mpake timu pangnguraga,
madoi' ta'de susi rambu, na mebawa lako kamatean.
7 Nasessai kamaparranganna to togaja',
nasaba' cia'i maruruh mangra'tah.
8 Manglekko-lekko penawanna to tomajekkong,
apa ia to tote'da salana maruruh panggaukanna.
9 La'biranmo to torro jiong bala bola
na ia to sibola mesa' baine passipuran.
10 Ia to togaja' sipa'na madoang bangri mpugauk kagajatan,
te'da lalo mamasena lako padanna rupa tau.
11 Ia ke disessai to topangcapa',
menjaji pangpangngajah lako totangmapahangpa.
Ia ke diajahhii to tomacca,
la sapaissen-issenna.
12 Naissen ngasan Puang Allataala Tomaruruh mangra'tah to apa jaji llan bolana togaja' sipa'na,
Naparatuanni cilaka namasolang.
13 Ia to tomangmataru-taru lako sarrona tokaasi-asi,
te'da toda ia na la dipuinawa ke meta'da tulungngi.
14 Paka'pannii paraseng to tomabirih napaja mabirih,
ben bunii passede to tomagalli naradan kamagallianna.
15 Ia ke maruruhhi to pangra'tah, napumasannang tomakassing,
apa napumalaja' togaja' sipa'na.
16 Ia to tocia' mangpikkiri' mandalan
la mangnguju lako lino tomate.
17 La kakurangan to tompake sala ewananna mangmasannang-sannang,
na te'da nalasugih to tompaboro-boro doi'na.
18 Ia to togaja' sipa'na dipake lla'bak tomakassing,
na pangnguraga disessa ssulle tomaruruh.
19 La'biranmo to torro jio padang pallawangan
na ia to torro sola baine passipuran na salle galli.
20 Buda ewanan makeangga' llan bolana tomacca,
apa ia to tobattuk mpaboro-borori ewananna.
21 Inda-inda to mpangngattai kamakassingan sola kamamasean,
la manyaman na mabarakka' katuoanna sola ditaratte'.
22 Wa'ding to tomacca ntaloi kota to najagai surudadu liwa' barani na mawatang,
naro'pokanni to benteng kota to napattuan joo surudadu.
23 Ia to tote'da nasamangkadanna bang,
te'da namparatuan passalan kalena.
24 Ia to tomatampo na majao penawa disanga topacapa',
gaja ngkita majiong tau.
25 Ia to tomakuttu mate napatei kamadoanganna,
sanga cia'i mengkaja.
26 Pamula makale' ratu lako karuen ia manda napikkiri' to nakadoangngi,
apa ia to tomakassing te'da naanggeii mangpangben lako padanna rupa tau.
27 Gaja Nakaba'ci Puang Allataala to karobana togaja' sipa'na,
la'bih-la'bih ke denni akkatta gaja'na mpassompanni.
28 Te'da nadikatappa'i to pangnguraga ke messa'bii,
apa ia to tonnissen tonganni passabaranna to kara-kara dikatappa'i to kadanna.
29 Tomanglindo batu to togaja' sipa'na,
apa ia to tomaruruh penawanna naissen ia mbawa kalena.
30 Moi samatumbanna kamaccanna sola kamapahanganna na akkattana tolino,
te'da nakullei la ncau' Puang Allataala.
31 Moiraka naganna' to nyarang la dipake parari,
apa Puang Allataalara to mbenki' kapataloan.