مُڪاشفو 21

نُوئو آڪاش ھانَ نُوئِي ڌرتي

پَڇي مھَي ھيڪ نُوئو آڪاش ھانَ ھيڪ نُوئِي ڌرتي ڏيٺِي ڪيونڪہ پيلڪو آڪاش ھانَ پيلڪِي ڌرتي ختم ھوئي گيا ھتا ھانَ ݾمُوندر ڀِي ڪونھي ھتو۔ ‏2 پَڇي مھَي نُوئو يروشلم آڪاش ݾون اُترتَي ڏيٺو۔ اَي پويتر شھر لاڏِي آݪِي ڪار ايشوَر رَي طرفون اُترتو پڙيو۔ اَي لاڏِي آپرَي لاڏَي رَي ݾارُو تيار ھانَ ݾينگاريوڙِي ھتِي۔ ‏3 پَڇي مھَي تخت ݾون ھيڪ زور ݾون آواز ݾُڻيو ڪہ،”ھمَي ايشوَر رو گھر مِنکون رَي بِچ ۾ ھَي۔ او اِنسون ڀيڙو ريشَي ھانَ او اِيئي را مِنک ھوشَي۔ ايشوَر آپ اُوئون ڀيڙو ريشَي ھانَ اُوئون رو ايشوَر ھوشَي۔ ‏4 او اُوئون رَي اونکيون را ݾجائِي اَنݾُو لُوئي آڇا ڪرشَي۔ ھمَي نَڪو موت رَي، نَڪو ماتم، نَڪو روئڻ ھانَ نَڪو ڏُک، ڪيونڪہ پِروڻَي شيون جاوتَي رئَي۔“

‏5 جڪو تخت تي ٻيٺو ھتو اُوئي ڪھيو ڪہ،”ھمَي ھُون ھر ھيڪ شئي نُوئِي ڪرون پڙيو۔“ اُوئي مھنَي اَي ڀِي ڪھيو ڪہ،”اَي لِک ڪيونڪہ اَي باتون ݾاچَي ھَي ھانَ ڀروسَي جھڙَي ھَي۔“ ‏6 پَڇي اُوئي ڪھيو ڪہ،”اَي باتون پُورَي ھوئَي رَي۔ ھُون الفا ھانَ اُميگا ھون۔ ھُون اول ھانَ آخر ھون۔ جڪو ڀِي تِرݾيو ھَي ھُون اُوئي نَي زندگِي رِي ندِي ݾون مُکت ۾ پوڻي پياڙين۔ ‏7 جڪو ڀِي بُرائي نَي ھراشَي او اِيئي ݾجَي شيون رو بارݾ ھوشَي۔ ھُون اُوئي رو ايشوَر ھوئين ھانَ او مھارو ڏيڪرو ھوشَي۔ ‏8 پڻ ٻيئاجڻ آݪون، بِنا وِشواس آݪون، بُڇڙون، خُونيون، زناڪارون، جادُوگرون، مُورتَي پُوجا ڪرڻ آݪون ھانَ ݾجون ڪُوڙون رَي ݾارُو باݾڏي ھانَ گندرف ݾون ٻَݪڻ آݪِي کڏ ھَي۔ اَي ٻيجِي موت ھَي۔“

نُوئو يروشلم

‏9 پَڇي اُوئون ݾات فريشتون ۾ جڪون ڪڍي ݾات آفتون ݾون ڀريوڙا ݾات پيالا ھتا، ھيڪَي مھَي ڪڍي آئي ڪھيو ڪہ،”آ، ھُون ٿنَي لاڏَي يعني گھيٽَي رِي لُگائِي بتائُون۔“ ‏10 او مھنَي پويتر آتما رِي طاقت ݾون کڻي ھيڪَي موٽَي ھانَ اُونچَي جبل تي لي گيو۔ اوٿ اُوئي مھنَي پويتر شھر يعني نُوئو يروشلم، ايشوَر رَي طرفون آڪاش ݾون اُترتَي بتايو۔ ‏11 اُوئي ۾ ايشوَر رو اُجاݪو ھتو۔ او شھر قيمتي پٿر آݪِي ڪار چمڪتو پڙيو يعني يشب پٿر آݪِي ڪار جڪو شيشَي جھڙو صاف ھووَي ھَي۔ ‏12 اُوئي شھر رِي موٽِي ھانَ اُونچِي ڀيت ھتِي جڪَي را ٻارھَي در ھتا ھانَ ھر ھيڪ در تي ھيڪ فريشتو اُڀوڙو ھتو۔ اُوئون ٻارھون درون تي اِسرائيلي قوم رَي ٻارھون قبيلون را نون لِکيوڙا ھتا۔ ‏13 تين در اُوگوڻَي پاݾَي، تين اُتر، تين ڏکڻ ھانَ تين در آٿوڻَي ڏيݾا ھتا۔ ‏14 اُوئي شھر رِي ڀيت را ٻارھَي بُنياد ھتا جڪون تي گھيٽَي رَي ٻارھَي سنتون را نون لِکيوڙا ھتا۔ ‏15 او فريشتو جڪو مھنَي ڪيتو پڙيو، اُوئي ڪڍي ݾونَي رو گز ھتو ڪہ او اُوئي شھر، اُوئي را در ھانَ اُوئي رَي ڀيتون ماپَي۔ ‏16 جڏي فريشتَي اُوئي شھر نَي گز ݾون ماپيو، تو او چوڌاري ھيڪ جھڙو ھتو۔ او لونٻو ھانَ ويڪرو ھيڪ جِترو ھتو۔ او چووِي ݾئو ڪِلو ميٽر لونٻو، ويڪرو ھانَ اُونچو ھتو۔ ‏17 فريشتَي او ڀيت ماپِي، تو او ݾاٺ ميٽر ويڪرِي ھتِي۔ اَي ماپ اُوئي ݾونَ رَي گز تي ليئوڙِي ھتِي۔ ‏18 اُوئي شھر رِي ڀيت يشب پٿر رِي ٺاھيوڙِي ھتِي ھانَ او شھر نِج ݾونَي رو ٺاھيوڙو ھتو ھانَ شيشَي جھڙو صاف ھتو۔ ‏19 شھر رِي ڀيت را بُنياد ھر نمُونَي رَي قيمتي پٿرون ݾون ݾجايوڙا ھتا۔ پيلڪو بُنياد يشب رو، ٻيجو نيلم رو، تيجو عقيق رو، چوٿو زمرد رو، ‏20 پونچوون سُليموني پٿر رو، ڇھُون لال رو، ݾاتوون زبرجد رو، آٺوون فيروزَي رو، نائون پُکراج رو، ڏھون يمني رو، اِگيارون زرقُون رو ھانَ ٻارھون ياقُوت رو۔ ‏21 شھر را ٻارھَي در، ٻارھَي موتي ھتا۔ ھر ھيڪ در ھيڪَي موتي رو ٺاھيوڙو ھتو۔ شھر رو مارگ نِج ݾونَي رو ٺاھيوڙو ھتو ھانَ شيشَي جھڙو صاف ھتو۔

‏22 مھَي اُوئي شھر ۾ ڪو ڀِي ايشوَر رو گھر ڪونھي ڏيٺو ڪيونڪہ پرميشوَر قُدرت آݪو ايشوَر ھانَ گھيٽو اوٿ ھتا۔ ‏23 اُوئي شھر نَي اُجاݪَي رَي ݾارُو ݾُورج جون چندر رِي ضرُورت ڪونھي ڪيونڪہ او شھر ايشوَر رَي مھما آݪَي اُجاݪَي ݾون چمڪَي پڙيو ھانَ گھيٽو اُوئي شھر رو ڏِيئو ھَي۔ ‏24 قومون اُوئي رَي اُجاݪَي ۾ بيشَي ھانَ ڌرتي را بادشاھ آپرَي مونَ مرتبَي رِي ملڪيت اُوئي ۾ لي آشَي۔ ‏25 اُوئي شھر را در ڪڏي ڀِي بند ڪونھي ھووَي ڪيونڪہ اوٿ ڪڏي ڀِي رات ڪونھي ھووَي۔ ‏26 مِنک قومون رو مونَ مرتبو ھانَ ملڪيت اُوئي ۾ لي آشَي۔ ‏27 پڻ ڪو ڀِي پليت شئي جون پليت مِنک اُوئي ۾ جائي ڪونھي ݾگھَي ھانَ نَڪو اھڙو مِنک جائي ݾگھَي جڪو بُرائي ڪرَي ھَي جون ڪُوڙ ٻولَي ھَي۔ رُگو اوج مِنک اُوئي شھر ۾ جاشَي جڪون را نون گھيٽَي رَي زندگِي رَي ڪِتاب ۾ لِکيوڙا ھَي۔