مُڪاشفو 20

ھزار ݾال رِي بادشاھي

پَڇي مھَي ھيڪ فريشتو آڪاش ݾون ھيٺو اُترتو ڏيٺو۔ اُوئي رَي ھاٿ ۾ سزا رَي کڏَي رِي ڪُونچِي ھانَ ھيڪ موٽِي ݾونڪڙ ھتِي۔ ‏2 او موٽو ناگ يعني شرُوع آݪو ناگ جڪَي نَي شيطون جون اِبليس ڪَي ھَي، اُوئي نَي جھالي ھيڪ ھزار ݾال رَي ݾارُو ٻونڌي ڇوڙيو۔ ‏3 فريشتَي اُوئي نَي سزا رِي کڏ ۾ نوکيو ھانَ ٻاھر ݾون تاݪو لگايو۔ پَڇي او تاݪو ٺَپو ھڻي بند ڪري ڇوڙيو ڪہ جترِي توڻي ھزار ݾال پُورا نِي ھووَي اُترِي توڻي او ڀڙي قومون نَي گُھمراھ نِي ڪرَي۔ ھزار ݾال ݾون پَڇي ضرُور اُوئي نَي ٿوڙِي دير رَي ݾارُو کوليو جاشَي۔

‏4 پَڇي مھَي تخت ڏيٺا جڪَي تي مِنک ٻيٺا ھتا ھانَ اِيئون نَي اِنصاف ڪرڻ رَي ݾارُو اِختيار ڏينوڙو ھتو۔ مھَي او آتمائون ڀِي ڏيٺَي جڪون را ڪونڌا باڍيوڙا ھتا ڪيونڪہ اُوئون پرڀُو يسُوع رو پرچار ڪيئو ھتو ھانَ ايشوَر رو شاستر ݾُڻايو ھتو۔ اِيئون جِنار رِي ھانَ اُوئي رِي مُورتِي رِي پُوجا ڪونھي ڪِي ھتِي ھانَ نَڪو اُوئون رَي لِلاڙ جون ھاٿون تي اُوئي جِنار رو نِشون ھتو۔ ھمَي او ڀڙي جيتا ھويا ھانَ اُوئون ھيڪ ھزار ݾال توڻي مَسيح ڀيڙا بادشاھ ھوئي حڪُومت ڪِي۔ ‏5 جترِي توڻي اَي ھزار ݾال پُورا ڪونھي ھويا، تو باقي مُوئوڙا ڀِي جيتا ڪونھي ھويا۔ اَي مُوئوڙون رو پيلڪو گُھمرو جيتو ھوئڻ ھَي۔ ‏6 برڪت آݪا ھانَ ايشوَر را مِنک او ھَي جڪو مُوئوڙون رو پيلڪو گُھمرو جيتا ھوئڻ ۾ شامل ھَي۔ اِيئون تي ڀڙي موت رو ڪو ڀِي اِختيار ڪونھي ھَي پڻ اَي مِنک ايشوَر ھانَ مَسيح را شيواداري ھوئي ھزار ݾال توڻي اُوئي ڀيڙا بادشاھي ڪرشَي۔

شيطون رِي ھار

‏7 ھزار ݾال پُورا ھوئڻ ݾون پَڇي شيطون سزا رَي کڏ رِي قيد ݾون آزاد ھوشَي۔ ‏8 پَڇي او ݾجِي دُنيا ۾ بِکريوڙَي قومون يعني جوج ھانَ ماجوج نَي گُھمراھ ڪرشَي ھانَ اُوئون نَي جنگ رَي ݾارُو ڀيڙا ڪرشَي۔ بِڙھڻ آݪا اِترا تو ھوشَي ڪہ جترِي ݾمُوندر رَي ڪپ رِي بيݪُو ھووَي ھَي۔ ‏9 او ڌرتي تي بِکري جاشَي ھانَ ايشوَر رَي مِنکون ھانَ اُوئي ݾون پريم ڪرڻ آݪَي شھر رَي چوڌاري گھيرو ڪرشَي پڻ آڪاش ݾون باݾڏي برݾشَي ھانَ اُوئون نَي برباد ڪري ڇوڙشَي۔ ‏10 پَڇي اِيئون نَي گُھمراھ ڪرڻ آݪَي شيطون نَي باݾڏي ھانَ گندرف رَي اُوئي ڊنڍ ۾ نوکشَي جيٿ جِنار ھانَ ڪُوڙو نبِي پيل ݾون نوکيوڙا ھتا۔ اُوئي ڊنڍ ۾ او ڏِن رات پڻ ھميشا رَي ݾارُو عذاب ۾ ريشَي۔

آخري فيصلو

‏11 پَڇي مھَي ھيڪ موٽو آڇو تخت ڏيٺو ھانَ اُوئي نَي ڀِي ڏيٺو جڪو اُوئي تخت تي ٻيٺو ھتو۔ ڌرتي ھانَ آڪاش اُوئي آگھي ݾون ناݾي گيا ھانَ ڀڙي ڏيکيجا ڪونھي۔ ‏12 پَڇي مھَي نِنيا موٽا ݾجائِي مُوئوڙا مِنک تخت آگھي اُڀوڙا ڏيٺا ھانَ ڪِتاب کوليجا۔ پَڇي ھيڪ ٻيجو ڪِتاب کوليجو يعني زندگِي رو ڪِتاب۔ مرڻ آݪون جڪو ڀِي ڪوم ڪيئا ھتا، او اِيئون ڪِتابون ۾ لِکيوڙا ھتا ھانَ اُوئي تي اُوئون رو فيصلو ھويو۔ ‏13 پَڇي ݾمُوندر آپرا مُوئوڙا ڏينا۔ موت ھانَ مُوئوڙون رَي جگت ڀِي آپرا مُوئوڙا ڏينا۔ اِيئي نمُونَي ھر ھيڪ رو فيصلو اُوئي رَي ڪومون تي ھويو۔ ‏14 پَڇي موت ھانَ مُوئوڙون رَي جگت نَي باݾڏي رِي ڊنڍ ۾ نوکيا۔ اَي باݾڏي آݪِي ڊنڍ ٻيجِي موت ھَي۔ ‏15 جڪون را نون زندگِي رَي ڪِتاب ۾ ڪونھي ھتا اُوئون نَي ڀِي باݾڏي رِي ڊنڍ ۾ نوکيا۔