آڪاش تي ايشوَر رِي بکوڻ
19
اِيئون باتون ݾون پَڇي مھَي آڪاش تي موٽَي ٽولَي جھڙَي زور رَي آواز نَي ايشوَر رِي بکوڻ ڪرتي ݾُڻيو ڪہ،”ھاليلُويا، مُگتي، مھما ھانَ قُدرت آپڻَي ايشوَر رِي ھَي
2 ڪيونڪہ او ݾچائي ھانَ اِنصاف ݾون فيصلو ڪرَي ھَي۔
ايشوَر اُوئي مشھُور ڀُونڏِي لُگائِي رو اِنصاف ڪيئو
جڪَي آپرَي زنا ݾون ڌرتي نَي خراب ڪِي ھتِي۔
ايشوَر اُوئي ݾون آپرَي شيوادارون رَي خُون رو بدلو ليئو ھَي۔“
3 پَڇي ٻيجو گُھمرو اُوئون ڪھيو ڪہ،
”ھاليلُويا، اِيئي بابل شھر رَي ٻَݪڻ رو ڌُونئو ھميشا اُٺتو ريشَي۔“
4 پَڇي چووِي اَگووڻون ھانَ چارون جيوَو کِري تخت تي ٻيٺوڙَي ايشوَر آگھي شيش نِمايا ھانَ ڪھيو ڪہ،
”آمين، ھاليلُويا۔“
5 پَڇي تخت ݾون اَي آواز ݾُڻڻ ۾ آيو ڪہ،
”اي ݾجَي نِنئي موٽون شيوادارون،
ٿي ݾجائِي جڪو اُوئي ݾون ٻيئاجو ھو، آپڻَي ايشوَر رِي بکوڻ ڪرو۔“
گھيٽَي رَي بيئان رِي دعوت
6 پَڇي مھَي ھيڪَي موٽَي لشڪر جھڙو آواز ݾُڻيو جڪو پوڻي رَي شور ھانَ باڏݪون رَي گرجڻ جھڙو ھتو جڪو اَي ڪيتو ڪہ،
”ھاليلُويا، ڪيونڪہ آپڻو پرميشوَر قُدرت آݪو ايشوَر بادشاھي ڪرَي ھَي۔
7 آئو آپي خُوشِي ڪرون، جشن ملھائُون
ھانَ اُوئي رَي نون رِي بکوڻ ڪرون،
ڪيونڪہ گھيٽَي رَي بيئان رو ٽيم آيو رو۔
اُوئي رِي لاڏِي آپرو آپنَي تيار ڪيئو ھَي۔
8 ايشوَر، اُوئي لاڏِي نَي چمڪيلا، آڇا اُوجݪا
ھانَ قيمتي ݾُوتِي گاڀا پيرڻ رو اِختيار ڏينو۔“
قيمتي ݾُوتِي گاڀون رو مطلب ھَي، ايشوَر رَي مِنکون رِي ݾچائي را ڪوم۔
9 اِيئي ݾون پَڇي فريشتَي مھنَي ڪھيو ڪہ، ”لِک، برڪت آݪا ھَي او جڪو گھيٽَي رَي بيئان ۾ اَڻايوڙا ھَي۔“ پَڇي اُوئي مھنَي ڪھيو ڪہ، ”اَي ايشوَر رَي ݾاچَي باتون ھَي۔“
10 پَڇي ھُون شيش نِماوڻ رَي ݾارُو اُوئي رَي پگون ۾ کِريو، تو اُوئي مھنَي ڪھيو ڪہ، ”خبردار، اِيئون نِي ڪر۔ ھُون ڀِي ٿَي جھڙو ھانَ ٿارَي اُوئون ڀايون جھڙو شيواداري ھون جڪو پرڀُو يسُوع رِي گواھِي ڏَي ھَي۔ تُو رُگو ايشوَر آگھي شيش نِما، ڪيونڪہ پرڀُو يسُوع رَي بارَي ۾ گواھِي ڏيوَڻ اگڪٿِي رو مقصد ھَي۔“
آڇَي گھوڙَي رو ݾَوار
11 پَڇي مھَي آڪاش نَي کُليوڙو ڏيٺو ھانَ مھنَي ھيڪ آڇو گھوڙو ڏيکيجڻ ۾ آيو۔ جڪو اُوئي گھوڙَي رو ݾَوار ھَي او وفادار ھانَ ݾاچو ھَي ڪيونڪہ او ݾچائي ݾون عدالت ھانَ جنگ ڪرَي ھَي۔ 12 اُوئي رَي اونکَي باݾڏي رَي جھاݪ جھڙَي ھَي ھانَ اُوئي رَي ماٿَي تي تموم گھڻا تاج ھَي۔ اُوئي تي ھيڪ نون لِکيوڙو ھَي جڪَي رِي اِيئي ݾون ٽاݪ ڪينَي ڀِي خبر ڪونھي ھَي۔ 13 اُوئي را اھڙا گاڀا پيريوڙا ھَي جڪو لوئِي ݾون ڀريجوڙا ھَي۔ اُوئي رو نون ”ايشوَر رو شُٻڌ“ ھَي۔ 14 آڪاشِي فوج آڇَي گھوڙون تي ݾَوار ھوئي اُوئي لاري بيتِي پڙِي۔ اُوئون را آڇا، صاف ھانَ قيمتي ݾُوتِي گاڀا پيريوڙا ھتا۔ 15 اُوئي رَي موڏَي ݾون ھيڪ تيز تلوار نڪرَي ھَي جڪَي ݾون او قومون نَي مارشَي۔ او لوھ رِي گيڏِي ݾون اُوئون تي حڪُومت ڪرشَي۔ او اُوئون نَي قُدرت آݪَي ايشوَر رِي تموم گھڻِي ريݾ آݪَي انگُورون رو رس ڪاڍڻ آݪَي ھود ۾ لتاڙشَي۔ 16 اُوئي رِي ݾاٿݪ رَي نيڙو جُبَي تي اَي نون لِکيوڙو ھَي ڪہ، ”بادشاھون رو بادشاھ، پرڀُوئون رو پرڀُو۔“
17 پَڇي مھَي ھيڪ فريشتو ݾُورج ماٿَي اُڀوڙو ڏيٺو۔ اُوئي آڪاش تي اُڏڻ آݪَي ݾجَي پکيون نَي زور ݾون ڪھيو ڪہ، ”آئو ھانَ ايشوَر رِي موٽِي دعوت ۾ شامل ھوئي 18 بادشاھون، فوجي ݾردارون، طاقت آݪون، گھوڙون ھانَ اُوئون رَي ݾَوارون ھانَ ݾجَي مِنکون رو موݾ کائو، بيشڪ او آزاد ھووَي جون غُلوم، نِنيا ھووَي جون موٽا۔“
19 پَڇي مھَي اُوئي جِنار، ڌرتي رَي بادشاھ ھانَ اُوئون رِي فوج ڏيٺِي جڪو اُوئي آڇَي گھوڙَي تي ݾَوار ھتِي ھانَ اُوئي رِي فوج ݾون جنگ ڪرڻ رَي ݾارُو ڀيڙا ھويا ھتا۔ 20 پَڇي اُوئي جِنار ھانَ اُوئي ڀيڙو ڪُوڙَي نبِي نَي ڀِي جھاليو جڪَي اُوئي جِنار آگھي پرچا بتايا ھتا۔ اِيئون پرچون ݾون اُوئي اُوئون مِنکون نَي گُھمراھ ڪيئا ھتا جڪون رَي لِلاڙ ھانَ ھاٿون تي اُوئي جِنار رو نِشون ھتو ھانَ جڪو اُوئي جِنار رِي مُورتِي آگھي جُھڪيا ھتا۔ اُوئون ٻيئون نَي گندرف ݾون ٻَݪڻ آݪَي باݾڏي رِي ڊنڍ ۾ جيتا اُڇلايا۔ 21 جڪو فوجي بچا ھتا اُوئون نَي اُوئي تلوار ݾون ماريا جڪو گھوڙَي رَي ݾَوار رَي موڏَي ݾون نڪرتِي ھانَ ݾجَي پکيون اُوئون رو موݾ ڍئو ڪري کاڌو۔