مُڪاشفو 15

آخري آفتون

پَڇي مھَي آڪاش تي ھيڪ ٻيجو موٽو ھانَ عجيب نِشون ڏيٺو يعني ݾات فريشتا جڪون ڪڍي ݾات آفتون ھتَي۔ اِيئون آفتون ݾون پَڇي ايشوَر رو ڪھر مِنکون تي ھٽي گيو۔

‏2 پَڇي مھَي شيشَي جھڙو ھيڪ چمڪيلو ݾمُوندر ڏيٺو جڪَي ۾ باݾڏي مِليوڙو ھتو۔ جڪَي مِنکون اُوئي جِنار، اُوئي رِي مُورتِي ھانَ نون رَي نمبر نَي ھرايو ھتو، اُوئون ݾجون نَي اُوئي شيشَي رَي ݾمُوندر رَي ڪپ تي اُڀوڙا ڏيٺا۔ اُوئون ݾجون ڪڍي ايشوَر را ڏينوڙا بربط ساز ھتا۔ ‏3 او ايشوَر رَي ٻونھَي مُوسيٰ رو ڀجن ھانَ گھيٽَي رَي بارَي ۾ ڀجن گائي ڪيتا ڪہ،

”اي پرميشوَر، تُو قُدرت آݪو ايشوَر ھَي۔

ٿارا ڪوم ڪِترا تو موٽا ھانَ عجيب ھَي۔

تُو ݾجَي قومون رو بادشاھ ھَي،

ٿارا مارگ ݾاچا ھانَ ݾِڌا ھَي۔

‏4 اي پرميشوَر، ڪُڻ ھَي جڪو ٿَي ݾون ڪونھي ٻيئاجَي؟

ھانَ ڪُڻ ھَي جڪو ٿارَي نون رِي بکوڻ ڪونھي ڪرَي؟

ڪيونڪہ رُگو تُوج پويتر ھَي

ھانَ ݾجَي قومون ٿَي ڪڍي آئي شيش نِماشَي،

ڪيونڪہ ٿارا اِنصاف را ڪوم ظاھر ھويا ھَي۔“

‏5 اِيئون باتون ݾون پَڇي مھَي ڏيٺو ڪہ آڪاش ۾ ايشوَر رو گھر يعني اُوئي ݾون مُلاقات ڪرڻ آݪَي تنٻُو رِي ݾجون ݾون پويتر جگھا کُلي گئِي ‏6 ھانَ اُوئي ۾ او ݾات فريشتا نڪريا جڪون ڪڍي ݾات آفتون ھتَي۔ اُوئون را ݾُوتِي گاڀا آڇا اُوجݪا ھانَ چمڪيلا ھتا ھانَ اُوئون رَي سينَي تي ݾونَي را پَٽا ٻاڌوڙا ھتا۔ ‏7 پَڇي اُوئون چارون جيوَو ۾ ھيڪَي اِيئون ݾات فريشتون نَي ݾونَي را ݾات پيالا ڏينا۔ اَي پيالا ھميشا ريوَڻ آݪَي ايشوَر رَي ڪھر ݾون ڀريوڙا ھتا۔ ‏8 پَڇي ايشوَر رَي گھر رِي ݾجون ݾون پويتر جگھا اُوئي رِي مھما ھانَ اُوئي رِي قُدرت رَي ڌُونئَي ݾون ڀريجي گئِي ھانَ جترِي توڻي ݾاتون فريشتون رَي ݾات آفتون ختم ڪونھي ھوئَي اُترِي توڻي ڪو ڀِي ايشوَر رَي گھر ۾ جائي ڪونھي ݾگھيو۔