لُگائِي ھانَ موٽو ناگ
12
پَڇي آڪاش تي ھيڪ تموم موٽو عجيب نِشون ڏيکيجو۔ ھيڪ لُگائِي ڏيکيجِي جڪَي را گاڀا ݾُورج ھتا۔ اُوئي رَي پگون ھيٺا چندر ھانَ اُوئي رَي ماٿَي تي ٻارھَي تارون رو تاج ھتو۔ 2 او لُگائِي اُميد ݾون ھتِي ھانَ ٻاݪ جِڻڻ رو ٽيم نيڙو ھتو اِيئي رَي ڪري او ݾُورون ۾ روتِي پڙِي۔3 پَڇي آڪاش ݾون ھيڪ ٻيجو نِشون ڏيکيجو۔ او راتَي رنگ رو موٽو ناگ ھتو۔ اُوئي را ݾات ماٿا ھانَ ڏَݾ ݾِينگ ھتا۔ اُوئي رَي ھر ھيڪ ݾِينگ تي ھيڪ تاج ھتو۔ 4 اُوئي آپرَي پُوڇ ݾون آڪاش رَي تارون رو تيجو حِصو ڌرتي تي نوکيو۔ پَڇي او موٽو ناگ اُوئي اُميدگار لُگائِي ݾومھو جائي اُڀو ڪہ جڏي او ٻاݪ جِڻَي، تو اُوئي رو ٻاݪ کائي ڇوڙَي۔ 5 اُوئي لُگائِي ھيڪ ڏيڪرو جِڻيو جڪو لوھ رِي گيڏِي ݾون ݾجَي قومون تي بادشاھي ڪرشَي پڻ اُوئي رو ٻاݪ ايشوَر ھانَ اُوئي رَي تخت تي پُگايو۔ 6 او لُگائِي اُوئي رڻ پَٽ ڏيݾا ناٺِي جيٿ ايشوَر رَي طرفون اُوئي رَي ݾارُو ھيڪ جگھا تيار ھتِي ڪہ ھيڪ ھزار ٻي ݾئو سٺ ڏِنون توڻي اُوئي رِي ݾنڀال ڪِي جاوَي۔
شيطون نَي ڌرتي تي نوکڻ
7 پَڇي آڪاش تي جنگ ھوئِي۔ فريشتون رو ݾردار ميڪائيل ھانَ اُوئي را فريشتا موٽَي ناگ ݾون بِڙھڻ رَي ݾارُو نڪريا۔ موٽو ناگ ھانَ اُوئي را فريشتا ميڪائيل ھانَ اُوئي رَي فريشتون ݾون بِڙھتا رھيا۔ 8 پڻ جيتي ڪونھي ݾگھيا ھانَ اِيئي نمُونَي آڪاش تي اُوئون رَي ݾارُو ڪو ڀِي جگھا ڪونھي رئِي۔ 9 اُوئي موٽَي ناگ نَي ڌرتي تي نوکيو، اَي اوج پِروڻو ناگ ھَي جڪَي نَي شيطون جون اِبليس ڪَي ھَي ھانَ جڪو ݾجِي دُنيا نَي گُھمراھ ڪرَي ھَي، اُوئي نَي اُوئي رَي فريشتون ݾُوڌو ھيٺا ڌرتي تي نوکيو۔
10 پَڇي مھَي آڪاش ݾون موٽو آواز ݾُڻيو جڪو اَي ڪيتو پڙيو ڪہ،
”ھمَي آپڻَي ايشوَر رِي مُگتي، قُدرت ھانَ بادشاھي آئِي ھَي
ھانَ ھمَي اُوئي رَي مَسيح نَي اِختيار مِليو ھَي،
ڪيونڪہ آپڻَي وِشواسيون تي الزوم لگاوڻ آݪو
جڪو ايشوَر آگھي اُوئون تي ڏِن رات الزوم لگاوتو
او ڌرتي تي نوکيجو ھَي۔
11 وِشواسيون گھيٽَي رَي لوئِي ھانَ آپرِي گواھِي ݾون اُوئي نَي ھرايو ھَي۔
اُوئون آپرِي زندگِي رِي ڪو ڀِي پرواھ ڪونھي ڪِي
پڻ مرڻ رَي ݾارُو تيار ھتا۔
12 اِيئي رَي ڪري اي آڪاشون ھانَ اِيئون ۾ ريوَڻ آݪون،
ٿي خُوشِي ملھائو
پڻ اي ڌرتي ھانَ ݾمُوندر،
ٿون تي اَفسوس۔
شيطون تموم گھڻِي ريݾ ۾ ٿون ڪڍي آيو ھَي
ڪيونڪہ اُوئي نَي خبر ھَي ڪہ،
اُوئي ڪڍي ٽيم ٿوڙو بچو ھَي۔“
13 جڏي موٽَي ناگ ڏيٺو ڪہ او ڌرتي تي نوکيجو ھَي، تو او اُوئي لُگائِي نَي تنگ ڪرڻ لاگو جڪَي ڏيڪرو جِڻيو ھتو۔ 14 اُوئي لُگائِي نَي باز آݪِي ڪار ٻي پونکَي ڏينَي ڪہ او اُڏي رڻ پَٽ ۾ پُگَي، اوٿ ݾاڍِي تين ݾال توڻي اُوئي موٽَي ناگ ݾون بچي رَي ھانَ اُوئي رِي ݾنڀال ڪِي جاوَي۔ 15 پَڇي اُوئي لُگائِي رو اوٿ پُگڻ ݾون پَڇي موٽَي ناگ آپرَي موڏَي ݾون دريا آݪِي ڪار پوڻي کوليو ڪہ اُوئي ݾون اُوئي لُگائِي نَي لوڙھي لي جاوَي۔ 16 پڻ ڌرتي اُوئي لُگائِي رِي مدد ڪِي ھانَ آپرو مونڏو کولي او ݾجو پوڻي پيئي ڇوڙيو جڪو موٽَي ناگ آپرَي موڏَي ݾون ڪاڍيو ھتو۔ 17 پَڇي موٽَي ناگ نَي لُگائِي تي ريݾ آئِي ھانَ او اُوئي رَي باقي اولاد ݾون جنگ ڪرڻ گيو جڪو ايشوَر رَي حُڪم تي بَي ھَي ھانَ يسُوع رِي گواھِي ڏيتا رَي ھَي۔ 18 [اِيئي ݾون پَڇي او ناگ ݾمُوندر رَي ڪپ تي جائي اُڀو۔]