مُڪاشفو 10

فريشتو ھانَ نِنيو طُومار

پَڇي مھَي ھيڪ ٻيجو طاقت آݪو فريشتو آڪاش ݾون اُترتَي ڏيٺو جڪَي رَي چوڌاري باڏݪ ئِي باڏݪ ھتا ھانَ اُوئي رَي ماٿَي تي ڏونگڙو ھتو ھانَ اُوئي رو مونڏو ݾُورج آݪِي ڪار ھتو ھانَ اُوئي را پگ باݾڏي رَي ٿونڀون جھڙا ھتا۔ ‏2 اُوئي رَي ھاٿ ۾ ھيڪ نِنيو طُومار ھتو جڪو کُليوڙو ھتو۔ اُوئي آپرو ݾاجو پگ ݾمُوندر تي راکيو ھانَ کاٻو ڌرتي تي راکيو۔ ‏3 پَڇي اُوئي زور ݾون رَڙ ڪِي جھڙو ڪو شينھن گوڙ ڪرتو ھووَي۔ جڏي اُوئي گوڙ ڪيئو، تو گرجڻ آݪا ݾات آواز ݾُڻڻ ۾ آيا۔ ‏4 جڏي گرجڻ آݪا او ݾات آواز ݾُڻڻ ۾ آيا، تو مھَي اُوئون رَي باتون لِکڻ رو ݾوچو پڻ آڪاش ݾون اَي آواز آيو ڪہ،”گرجڻ آݪا ݾات آواز راز ۾ راک ھانَ نِي لِک۔“

‏5 جڪَي فريشتَي نَي مھَي ݾمُوندر ھانَ ڌرتي تي اُڀوڙو ڏيٺو اُوئي آپرو ݾاجو ھاٿ آڪاش ڏيݾا ڪيئو ‏6 ھانَ ايشوَر رو ݾونݾ ليئو جڪو ھميشا جيتو ھَي ھانَ جڪَي آڪاش، ڌرتي، ݾمُوندر ھانَ جڪو ڪئين اُوئون ۾ ھَي، او ݾجائِي ٺاھيا۔ فريشتَي ݾونݾ لي ڪھيو ڪہ،”ھمَي آگھي دير ڪونھي ھووَي۔ ‏7 پڻ جڏي ݾاتوون فريشتو نَر ݾِينگو بجاشَي، تو ايشوَر رو ڀيد پُورو ھوشَي جڪو اُوئي آپرَي شيوادارون يعني نبيون نَي ݾُڻايو ھتو۔“

‏8 جڪو آواز مھَي آڪاش ݾون ݾُڻيو ھتو اُوئي ڀڙي مھنَي ڪھيو ڪہ،”جا ھانَ کُليوڙو طُومار اُوئي فريشتَي رَي ھاٿ ݾون لَي جڪو ݾمُوندر ھانَ ڌرتي تي اُڀو ھَي۔“

‏9 پَڇي ھُون اُوئي فريشتَي ڪڍي گيو ھانَ اُوئي نَي ڪھيو ڪہ،”اَي نِنيو طُومار مھنَي ڏي۔“ اُوئي مھنَي ڪھيو ڪہ،”اَي لَي ھانَ کا۔ اَي ٿارو پيٽ کارو ڪرشَي پڻ ٿارو مونڏو ماکِي آݪِي ڪار ميٺو ڪرشَي۔“

‏10 پَڇي مھَي او نِنيو طُومار اُوئي فريشتَي رَي ھاٿ ݾون ليئو ھانَ کاڌو۔ او مھارَي موڏَي نَي ماکِي آݪِي ڪار ميٺو لاگو پڻ جڏي مھَي او کاڌو، تو پيٽ ۾ کارو لاگو۔ ‏11 پَڇي مھنَي ݾُڻايو ڪہ،”ٿارَي ݾارُو ضرُوري ھَي ڪہ تُو تموم گھڻَي قبيلون، قومون، تموم گھڻَي ٻولَي ٻولڻ آݪون ھانَ بادشاھون رَي بارَي ۾ ڀڙي اگڪٿَي ڪرَي۔“