مُڪاشفو 3

سرديس شھر رِي مَنڊلِي رَي نون خاص نياپو

پَڇي اُوئي مھنَي سرديس شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ جڪَي ڪڍي ايشوَر رِي شيوا ڪرڻ آݪَي ݾات آتمائون ھانَ ݾات تارا ھَي او اَي ڪَي ھَي ڪہ، ”مھنَي ٿارَي ڪومون رِي خبر ھَي۔ تُو آپنَي جيتو ݾمجَھي ھَي پڻ ھَي ڪونھي۔ ‏2 جاگتو رَي ھانَ آپرو وِشواس پڪو راک ڪہ ٿارو وِشواس برباد ھوئڻ ݾون بچي جاوَي ڪيونڪہ مھَي ڏيٺو ھَي ڪہ ٿارو ڪو ڀِي ڪوم مھارَي ايشوَر رِي نظر ۾ پُورو ڪونھي۔ ‏3 اِيئي رَي ڪري ٿَي جڪو باتون ݾيکئَي ھتَي ھانَ جڪو ڪئين ٿَي ݾُڻيو ھتو او ياد راک ھانَ اُوئون تي پڪو رَي ھانَ توبھون ڪر۔ جي تُو جاگتو ڪونھي رَي، تو ھُون چور آݪِي ڪار اوچتو آئين ھانَ ٿنَي خبر ڀِي ڪونھي پڙَي ڪہ ھُون ڪڏي آئين۔

‏4 سرديس شھر رِي وِشواسي مَنڊلِي ۾ جڪو مِنک نيڪِي ݾون بَي ھَي، او آڇا گاڀا پيري مھَي ڀيڙا ھالشَي ڪيونڪہ او اِيئي لائق ھَي۔ ‏5 جڪو ڀِي بُرائي نَي ھراشَي، تو اُوئي نَي ڀِي آڇا گاڀا پيرايا جاشَي ھانَ ھُون اُوئي رو نون زندگِي رَي ڪِتاب ۾ ڪڏي ڀِي ڪونھي مِٽائُون پڻ آپرَي پِتا ھانَ اُوئي رَي فريشتون رَي رُوبرو ݾُڻائين ڪہ اَي مھارو ھَي۔

‏6 ݾُڻڻ آݪو ݾمجَھي رو ڪہ پويتر آتما وِشواسي مَنڊليون نَي ڪِي ڪَي پڙيو۔“

فِلدلفيا شھر رِي مَنڊلِي رَي نون خاص نياپو

‏7 پَڇي اُوئي مھنَي فِلدلفيا شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ جڪو پويتر ھستِي ھَي، جڪو ݾاچو ھَي ھانَ جڪَي ڪڍي دائُود رِي بادشاھي رَي ڪُونچَي ھَي، جي او در کولَي، تو ڪو ڀِي اُوئي نَي بند ڪري ڪونھي ݾگھتو پڻ جي بند ڪرَي، تو ڪو ڀِي اُوئي نَي کولي ڪونھي ݾگھتو او اَي ڪَي ھَي ڪہ، ‏8 ”مھنَي ٿارَي ڪومون رِي خبر ھَي۔ جو، مھَي ٿارَي ݾارُو ايشوَر رِي بادشاھي ۾ جاوڻ رو در کولي راکيو ھَي جڪَي نَي ڪو ڀِي بند ڪري ڪونھي ݾگھتو۔ ٿَي ۾ اترِي ھِمت ڪونھي، تو ڀِي تُو مھارَي باتون تي بيتو رَي ھَي ھانَ مھارَي نون رو اِنڪار ڪونھي ڪيئو۔ ‏9 جو، ھُون شيطون رِي مَنڊلِي رَي اُوئون مِنکون نَي ٿارَي حوالي ڪرين جڪو آپنَي يھُودي تو ڪَي ھَي پڻ ھَي ڪونھي پڻ او ڪُوڙ ٻولَي ھَي۔ جو، ھُون او مِنک ٿَي ڪڍي لي آئين ھانَ او ٿارَي پگون ۾ کِري ٿَي آگھي جُھڪشَي ھانَ اُوئون نَي خبر پڙشَي ڪہ ھُون ٿَي ݾون پريم ڪرون ھون۔ ‏10 تُو مھارَي باتون تي صبر ݾون بُوئو ھانَ تموم گھڻا ڏُک برداش ڪيئا، اِيئي رَي ڪري ھُون ٿنَي اُوئي ڏُک آݪَي آزمُوتَي ݾون بچائين جڪو پُورِي دُنيا تي آوڻ آݪو ھَي۔

‏11 ھُون ڇيڪو آوڻ آݪو ھون۔ تُو جڪو مھَي تي وِشواس راکَي ھَي اُوئي تي پڪو رَي ڪہ ڪو ڀِي ٿَي ݾون ٿارو تاج کوݾَي نِي۔ ‏12 جڪو ڀِي بُرائي نَي ھراشَي، تو ھُون اُوئي نَي ايشوَر رَي گھر رو ھيڪ اھڙو ٿونڀو ٺائين جڪو اوٿ ھميشا توڻي ريشَي۔ ھُون آپرَي ايشوَر رو نون ھانَ آپرَي ايشوَر رَي شھر يعني آڪاش ݾون اُترڻ آݪَي نُوئَي يروشلم رو نون ھانَ آپرو نُوئو نون اُوئي تي لِکين۔

‏13 ݾُڻڻ آݪو ݾمجَھي رو ڪہ پويتر آتما وِشواسي مَنڊليون نَي ڪِي ڪَي پڙيو۔“

لوديڪيا شھر رِي مَنڊلِي رَي نون خاص نياپو

‏14 پَڇي اُوئي مھنَي لوديڪيا شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ يسُوع مَسيح جڪو آمين، وفادار، ݾاچو گواھ ھَي ھانَ جڪَي رَي وسيلَي ايشوَر جگت رَي ݾجَي شيون ٺاھئَي ھانَ او اَي ڪَي ھَي ڪہ، ‏15 ”ھُون ٿارا ڪوم اوݪکون ھون ڪہ تُو نَڪو ٺاڍو ھَي ھانَ نَڪو تُو گرم ھَي۔ ڀلو ھتو ڪہ جون تُو ٺاڍو ھوئون تو، جون گرم۔ ‏16 ڪيونڪہ تُو نَڪو گرم ھَي ھانَ نَڪو تُو ٺاڍو ھَي پڻ گھٽ گرم ھَي اِيئي رَي ڪري ھُون ٿنَي ٿُوڪ آݪِي ڪار آپرَي موڏَي ݾون ڪاڍي اُڇلائي ڇوڙين۔ ‏17 تُو ڪَي ھَي ھُون اَمير ھون ھانَ مھَي تموم گھڻو ڌن ڀيڙو ڪيئو ھَي ھانَ مھنَي ڪَي ڀِي شئي رِي ضرُورت ڪونھي۔ پڻ ٿنَي اَي خبر ڪونھي ڪہ حقيقت ۾ تُو نِڀاگو، دايا رَي لائق، غريب، اونڌو ھانَ اُگھاڙو ھَي۔ ‏18 اِيئي رَي ڪري ھُون ٿنَي صلاح ڏيئون ھون ڪہ تُو مھَي ݾون باݾڏي ݾون نِج ڪيئوڙو ݾونو مول لَي ڪہ تُو اَمير ھوئي جاوَي۔ مھَي ݾون آڇو لِباس لَي ھانَ پير ڪہ تُو اُگھاڙو نِي ڏيکيجَي ھانَ اونکيون رَي ݾارُو ݾُرمو لَي ڪہ تُو ڏيکَي۔ ‏19 جڪَي ݾون ھُون پريم ڪرون ھون اُوئون ݾجون نَي ھُون سزا ڏي تربيت ڪرون ھون۔ اِيئي رَي ڪري ھمَي تُو ݾُڌري جا ھانَ آپرَي پاپون ݾون توبھون ڪر۔

‏20 جو، ھُون در ڪڍي اُڀو در کڙڪائُون پڙيو۔ جي ڪُڻ مھارو آواز ݾُڻي در کولشَي، تو ھُون اُوئي ڪڍي اَندر آئين ھانَ اُوئي ڀيڙو ٻاٽِي کائين ھانَ او مھَي ڀيڙو۔ ‏21 جڪو ڀِي بُرائي نَي ھراشَي، اُوئي نَي ھُون آپ ڀيڙو آپرَي تخت تي ٻيݾاڙين، جھڙَي نمُونَي ھُون ڀِي شيطون نَي ھرائي آپرَي پِتا ڀيڙو اُوئي رَي تخت تي ٻيٺو ھون۔

‏22 ݾُڻڻ آݪو ݾمجَھي رو ڪہ پويتر آتما وِشواسي مَنڊليون نَي ڪِي ڪَي پڙيو۔“