مُڪاشفو 2

اِفسِس شھر رِي مَنڊلِي رَي نون خاص نياپو

پَڇي اُوئي مھنَي اِفسِس شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ جڪو آپرَي ݾاجَي ھاٿ ۾ ݾات تارا راکَي ھَي ھانَ ݾونَي را ݾات ڏِيئا راکڻ آݪَي شيون رَي بِچ ۾ بَي ھَي او اَي ڪَي ھَي ڪہ، ‏2 ”ھُون ٿارو ڪوم، ٿارِي محنت ھانَ ٿارو صبر اوݪکون ھون۔ مھنَي اَي ڀِي خبر ھَي ڪہ تُو بُڇڙَي مِنک نَي برداش ڪونھي ڪرتو جڪو آپرو آپنَي سنت ڪَي ھَي پڻ او ھَي ڪونھي ڪيونڪہ ٿَي اُوئون نَي پَرکيا ھانَ او ڪُوڙا نڪريا ھَي۔ ‏3 تُو صبر ڪرَي ھَي ھانَ مھارَي نون رَي ڪري ڏُک برداش ڪرتو رَي ھَي ھانَ تُو بي ھِمت ڪونھي ھويو۔ ‏4 پڻ مھنَي اِيئي بات رو ڏُک ھَي، ھمَي تُو پيل جھڙو پريم ڪونھي راکتو۔ ‏5 اِيئي رَي ڪري ياد راک ڪہ تُو پيل ڪھڙو ھتو۔ ھمَي تُو توبھون ڪري اَگي جھڙو ھو۔ جي تُو توبھون ڪونھي ڪرَي، تو ھُون آئين ھانَ ٿارَي ڏِيئا راکڻ آݪِي شئي نَي اُوئي جگھا ݾون ھٽائي ڇوڙين۔ ‏6 پڻ ٿَي ۾ ھيڪ خُوبِي ھَي ڪہ تُو ڀِي مھَي آݪِي ڪار اُوئون ڪومون ݾون نفرت ڪرَي ھَي جڪو نيڪولائوس نَي منڻ آݪا ڪرَي ھَي۔

‏7 ݾُڻڻ آݪو ݾمجَھي رو ڪہ پويتر آتما وِشواسي مَنڊليون ݾون ڪَي پڙيو ڪہ جڪو ڀِي بُڇڙائي نَي ھراشَي ھُون اُوئي نَي زندگِي رَي بَڻ رو ڦل کاوڻ ݾارُو ڏئين جڪو ايشوَر ڪڍي ݾُرگ ۾ ھَي۔“

سمُرنا شھر رِي مَنڊلِي رَي نون خاص نياپو

‏8 پَڇي اُوئي مھنَي سمُرنا شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ جڪو اول ھانَ آخر ھَي، جڪو مُوئو ھتو ھانَ ڀڙي جيتو ھويو ھَي، او اَي ڪَي ھَي ڪہ، ‏9 ”مھنَي ٿارَي ڏُکون ھانَ ٿارِي غريبي رِي خبر ھَي پڻ تُو وِشواس ۾ اَمير ھَي۔ جڪو ٿنَي بُرو ڀلو ڪَي ھَي ھُون اُوئون نَي ڀِي اوݪکون ھون، جڪو آپرو آپنَي يھُودي تو ڪَي ھَي پڻ او ھَي ڪونھي ڪيونڪہ او شيطون رِي مَنڊلِي را ھَي۔ ‏10 جڪو ڏُک ٿنَي برداش ڪرڻا ھَي اُوئون ݾون نِي ٻيئاج۔ جو، شيطون ٿون ۾ ڪئينڪہ مِنکون نَي جيل ۾ قيد ڪراشَي ڪہ ٿونرو آزمُوتو ھووَي ھانَ ٿي ڏَݾ ڏِن مُصيبت ۾ ريشو۔ جان ڏيوَڻ توڻي وفادار رَي، تو ھُون ٿنَي زندگِي رو تاج ڏئين۔

‏11 ݾُڻڻ آݪو ݾمجَھي رو ڪہ پويتر آتما وِشواسي مَنڊليون ݾون ڪَي پڙيو ڪہ جڪو ڀِي بُرائي نَي ھراشَي، تو او آتما ۾ ڪڏي ڀِي ڪونھي مرَي۔“

پرگُمن شھر رِي مَنڊلِي رَي نون خاص نياپو

‏12 پَڇي اُوئي مھنَي پرگُمن شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ جڪَي ڪڍي ٻي ڌارِي تيز تلوار ھَي او اَي ڪَي ھَي ڪہ، ‏13 ”مھنَي خبر ھَي ڪہ تُو اوٿ رَي ھَي جيٿ شيطون حڪُومت ڪرَي ھَي پڻ تو ڀِي تُو مھارَي نون تي پڪو رَي ھَي۔ ٿَي اُوئون ڏِنون ۾ ڀِي مھَي تي وِشواس راکڻ ݾون اِنڪار ڪونھي ڪيئو جڏي ٿون ۾ اِنتپاس ماريجو ھتو جڪو وفادارِي ݾون مھارِي گواھِي ڏيتو۔ اُوئي رو خُون ٿونرَي شھر ۾ اوٿ ھويو جيٿ شيطون ريتو۔ ‏14 پڻ مھنَي ڪئين باتون رو ڏُک ھَي ڪہ ٿَي ڪڍي ڪئينڪہ اھڙا مِنک ھَي جڪو ڪُوڙَي نبِي بلعام رَي ݾيکايوڙَي باتون تي بَي ھَي۔ بلعام بلق بادشاھ نَي ݾيکايو ڪہ او اِسرائيلي قوم نَي پاپ ڪرڻ رَي ݾارُو ڦيراوَي ڪہ او مُورتيون تي چاڙھيوڙَي شيون کاوَي ھانَ زنا ڪرَي۔ ‏15 اِيئي نمُونَي ٿارَي بِچ ۾ ڪئين اھڙا مِنک ھَي جڪو نيڪولائوس رَي ݾيکايوڙَي باتون تي بَي ھَي۔ ‏16 ھمَي تُو آپرَي پاپون ݾون توبھون ڪر۔ جي تُو اِيئون ڪونھي ڪرَي، تو ھُون ڇيڪو ٿَي ڪڍي آئين ھانَ آپرَي موڏَي آݪِي تلوار ݾون اُوئون ݾون جھيڙو ڪرين۔

‏17 ݾُڻڻ آݪو ݾمجَھي رو ڪہ پويتر آتما وِشواسي مَنڊليون ݾون ڪَي پڙيو، جڪو ڀِي بُرائي نَي ھراشَي، تو ھُون اُوئي نَي لِڪيوڙَي من نون رِي آڪاشِي ٻاٽِي ڏئين ھانَ اُوئي نَي ھيڪ آڇو پٿر ڀِي ڏئين۔ اُوئي پٿر تي ھيڪ نُوئو نون لِکيوڙو ھوشَي۔ اُوئي نون رِي رُگو اُوئي نَي خبر ھوشَي جڪَي نَي او پٿر ملشَي۔“

ٿواتيرا شھر رِي مَنڊلِي رَي نون خاص نياپو

‏18 پَڇي اُوئي مھنَي ٿواتيرا شھر رِي وِشواسي مَنڊلِي رَي فريشتَي نَي اَي لِکڻ رَي ݾارُو ڪھيو ڪہ ايشوَر رو ڏيڪرو جڪَي رَي اونکَي باݾڏي رِي جھاݪ آݪِي ڪار ھَي ھانَ جڪَي را پگ نِج پيتل جھڙا چمڪَي ھَي او اَي ڪَي ھَي ڪہ، ‏19 ”ھُون ٿارو ڪوم، ٿارو پريم، ٿارِي وفادارِي، ٿارِي شيوا ھانَ ٿارو صبر اوݪکون ھون۔ مھنَي اَي ڀِي خبر ھَي ڪہ ھمَي ٿارا ڪوم پيل ݾون وڌيڪ ھَي، ‏20 پڻ مھنَي اِيئي بات رو ڏُک ھَي ڪہ ٿَي اُوئي لُگائِي ايزبل نَي ڪونھي پاليو جڪو آپنَي نبيوڻِي ڪَي ھَي ھانَ مھارَي مِنکون نَي ݾيکائي گُھمراھ ڪرَي ھَي ڪہ او زنا ڪرَي ھانَ مُورتيون تي چاڙھيوڙَي شيون کاوَي۔ ‏21 مھَي اُوئي نَي پاپون ݾون توبھون ڪرڻ رو موقعيو ڏينو پڻ اُوئي رِي زنا ݾون توبھون ڪرڻ رِي مرضِي ڪونھي۔ ‏22 جو، ھُون اُوئي لُگائِي نَي بيمار ڪرين ڪہ او موچَي تي پڙِي رَي ھانَ جڪو اُوئي ݾون زنا ڪرَي ھَي جي او آپرَي پاپون ݾون توبھون ڪونھي ڪرَي، تو ھُون اُوئون تي تموم گھڻا ڏُک ميلين۔ ‏23 ھُون اُوئي لُگائِي را منڻ آݪا ماري ڇوڙين ڪہ ݾجَي وِشواسي مَنڊليون نَي خبر پڙَي ڪہ مھنَي اِنسون رِي ݾوچ ھانَ اُوئي رَي خواھشون رِي خبر ھَي ھانَ ھُونج اُوئون ۾ ھر ھيڪ نَي اُوئي رَي ڪومون رَي بدلَي سزا ڏئين۔

‏24 پڻ ھُون ٿواتيرا رِي وِشواسي مَنڊلِي رَي اھڙَي مِنکون تي ڪو ٻيجو وزن ڪونھي راکون جڪو اُوئي لُگائِي رَي ڪُوڙَي باتون تي ڪونھي بيتا ھانَ نَڪو شيطون رَي ڀيد نَي اوݪکتا۔ ‏25 پڻ ٿي مھارَي آوڻ توڻي اُوئون باتون تي پڪا رو جڪو مھَي ٿونَي ݾُڻائَي ھَي۔ ‏26 جڪو ڀِي بُرائي نَي ھراشَي ھانَ مھارَي ڪوم تي آخر توڻي بيتو ريشَي، تو ھُون اُوئي نَي قومون تي اِختياري ڏئين۔ ‏27 او لوھ رِي گيڏِي ݾون اُوئون تي حڪُومت ڪرشَي ھانَ مٽِي رَي ٺيڪرون آݪِي ڪار اُوئون را ٽُڪڙا ٽُڪڙا ڪري ڇوڙشَي۔ اُوئي نَي اوج اِختيار ملشَي جڪو مھنَي آپرَي پِتا ݾون مِليو ھَي۔ ‏28 ھُون اُوئي نَي ڀِي ݾاڪݪي رو تارو ڏئين۔

‏29 ݾُڻڻ آݪو ݾمجَھي رو ڪہ پويتر آتما وِشواسي مَنڊلِي نَي ڪِي ڪَي پڙيو۔“