پرڀُو يسُوع رو ڀڙي آوڻ
3
اي پيارَي ڀايون، ھُون ٿونَي اَي ٻيجو خط لِکون پڙيو۔ مھَي ٻيئون خطون ۾ تموم گھڻَي باتون ياد ڏيرائي ٿونرا من صاف ڪرڻ رِي ڪوشش ڪِي ھَي۔ 2 مھارِي مرضِي ھَي ڪہ ٿي او ݾجَي باتون ياد راکو جڪو پويتر نبيون تموم گھڻو اَگي ڪيئَي ھتَي ھانَ او حُڪم ڀِي ياد راکو جڪو آپڻَي پرڀُو ھانَ مُگتي داتا رو پرچار ڪرڻ آݪون ٿونَي ݾُڻائَي ھَي۔3 ݾجون ݾون پيل اَي بات ݾمجھو ڪہ آخري ڏِنون ۾ اھڙا مِنک آشَي جڪو ݾچائي تي ھاݾا ڪرشَي ھانَ جِسموني خواھشون تي بيشَي۔ 4 او ڪشَي ڪہ، ”پرڀُو يسُوع ڪيٿ ھَي جڪَي آوڻ رو واعدو ڪيئو ھتو؟ ڪيونڪہ آپڻا ٻاپ ڏاڏا تو مري گيا ھانَ جگت ٺھيجڻ ݾون لي آج توڻي ݾجو ڪئين اِيئون رو اِيئون ھَي۔“
5 او اَي جوڻ ڪري پونتريا ڪہ ايشوَر آپرَي حُڪم ݾون آڪاش ٺاھيا ھانَ اُوئي پوڻي نَي ھيڪِي جگھا تي ڀيڙو ڪري ڌرتي ڀِي ظاھر ڪِي۔ 6 ݾاگي پوڻي رِي ٻوڏ ݾون اُوئي زمونَي را مِنک ٻُوڏي مُوئا۔ 7 ايشوَر آپرَي اِيئي حُڪم ݾون آڪاش ھانَ ڌرتي نَي باݾڏي رَي ݾارُو راکيا ھَي، جڏي ايشوَر رو اِنڪار ڪرڻ آݪون رِي عدالت ھوشَي، تو او ڀِي ٻَݪي راک ھوئي جاشَي۔
8 اي پيارَي ڀايون، اَي بات ياد راکو ڪہ پرميشوَر رَي ݾارُو ھيڪ ڏِن، ھزار ݾال رَي برابر ھَي ھانَ ھزار ݾال، ھيڪَي ڏِن رَي برابر ھَي۔ 9 پرميشوَر آپرو واعدو پُورو ڪرڻ ۾ دير ڪونھي ڪرتو، جھڙَي نمُونَي ڪئينڪہ مِنک دير ݾمجَھي ھَي، پڻ ايشوَر ٿونرَي ݾارُو صبر ڪرَي ھَي ڪيونڪہ اُوئي رِي مرضِي ڪونھي ڪہ ڪو ڀِي ھميشا رِي موت مرَي پڻ مرضِي ھَي ڪہ ݾجائِي توبھون ڪرَي۔
10 پرڀُو رو ڏِن اِيئون آشَي جڪَي رِي ڪينَي ڀِي خبر ڪونھي پڙَي۔ اُوئي ڏِن آڪاش تموم گھڻَي گوڙ ݾون ختم ھوئي جاشَي، آڪاشِي شيون پَگھريجي برباد ھوئي جاشَي۔ ڌرتي ھانَ اُوئي تي ھوئڻ آݪا ڪوم ڀِي پرميشوَر رِي عدالت ۾ حاضر ڪيئا جاشَي۔ 11 جڏي اَي ݾجَي شيون اِيئي نمُونَي مِٽي جاشَي، تو پَڇي ٿونَي ڪھڙا ھوئڻ کپَي؟ ٿونَي کپَي ڪہ ٿي پويتر ھانَ ايشوَر نَي منڻ آݪا ھوئو۔ 12 ايشوَر رَي اُوئي آوڻ آݪَي ڏِن رَي اِنتظار ۾ رو ڪہ او ڏِن ڇيڪو آوَي جڏي آڪاش ٻَݪي برباد ھوئي جاشَي ھانَ آڪاشِي شيون باݾڏي رِي گرمي ݾون پَگھريجي جاشَي۔ 13 پڻ آپي اُوئي نُوئَي آڪاش ھانَ نُوئِي ڌرتي رَي اِنتظار ۾ ھون جڪَي رو واعدو اُوئي ڪيئو ھتو ھانَ جيٿ ھميشا نيڪِي ھوشَي۔
14 اي پيارَي ڀايون، ڪيونڪہ ٿي اِيئي اِنتظار ۾ رو ھو اِيئي رَي ڪري ٿونرِي ايشوَر ݾون صُلح ھووَي ھانَ ٿي اُوئي ݾومھا بي عيب ھانَ بي ڏوھي ھوئڻ رِي ڪوشش ڪرو۔ 15 ياد راکو، پرميشوَر اِيئي رَي ڪري صبر ڪرَي ھَي ڪہ مِنکون نَي مُگتي مِلڻ رو موقعيو ملَي۔ آپڻَي پيارَي ڀائي پولُوس نَي ڀِي ايشوَر رِي ڏينوڙِي ݾمجھ ݾون ٿونَي آپرَي خطون ۾ اَئيج باتون لِکئَي ھتَي۔ 16 اُوئون ۾ ڪئين باتون اھڙَي ھَي جڪون رو ݾمجھڻ ڏُکيو ھَي۔ بِنا ݾمجھ آݪا ھانَ گھٽ وِشواس آݪا اِيئون باتون نَي اِيئون بِگاڙَي ھَي جھڙَي نمُونَي او شاستر رَي ٻيجَي باتون بِگاڙَي ھَي۔ اِيئي نمُونَي او آپنَي ھميشا رِي موت رِي سزا ڏَي ھَي۔
17 مھارَي پيارَي ڀايون، ھُون ٿونَي ٽيم ݾون پيل اَي باتون ݾُڻائُون پڙيو۔ اِيئي رَي ڪري ھوشيار رو ڪہ ڪيٿ اِيئون نِي ھووَي ڪہ ايشوَر رو اِنڪار ڪرڻ آݪون رِي غلط ݾوچ ٿونَي ݾاچَي مارگ ݾون ڀُلاوَي ھانَ ٿي آپرو وِشواس ڦِٽو ڪرو۔ 18 اِيئي رَي بدلَي آپڻَي پرڀُو ھانَ مُگتي داتا يسُوع مَسيح رِي ڪِرپا ھانَ ݾمجھ ۾ بڌتا جائو۔ اُوئي رِي بکوڻ ھڻون ݾون لي ھميشا توڻي ھوتِي رَي۔ آمين۔