ايشوَر رِي مرضِي تي بيوَڻ
4
جھڙَي نمُونَي مَسيح ݾَرير ۾ ڏُک ڏيٺا، تو ٿي ڀِي اُوئي آݪِي ڪار ڏُک برداش ڪرڻ رَي ݾارُو تيار رو ڪيونڪہ جڪو ڀِي مَسيح رَي ݾارُو ݾَرير ۾ ڏُک ڏيکَي ھَي، تو او پاپ ڪرڻ ڦِٽا ڪرَي ھَي۔ 2 او آپرِي باقي زندگِي ۾ جِسموني خواھش تي نا، پڻ ايشوَر رِي مرضِي تي بَي ھَي۔ 3 وِشواس راکڻ ݾون پيل ٿي ٻيجَي قومون جھڙا ھتا جڪو ايشوَر را اِنڪاري ھتا، ڪيونڪہ پيل ٿون ۾ عياشِي، بُڇڙَي خواھشون، شراب پيئڻ، ناچ رنگ، نشو ھانَ مُورتيون رِي پُوجا ڪرڻ، اَي تموم گھڻو ھتو۔ 4 ھمَي ٻيجَي قومون حيرون ھَي ڪہ ٿي اِيئي بُڇڙَي ڪومون ۾ اُوئون رو ݾاٿ ڪونھي ڏيتا، اِيئي رَي ڪري او ٿونرَي خلاف باتون ڪرَي ھَي۔ 5 پڻ او ايشوَر نَي حِساب ڏيشَي جڪو جيتون ھانَ مُوئوڙون رو اِنصاف ڪرڻ رَي ݾارُو تيار ھَي۔ 6 مُوئوڙون نَي ڀِي اِيئي رَي ڪري خُوشِي رِي خبر ݾُڻائِي ھتِي ڪہ ݾَرير ݾون اُوئون رو فيصلو اِيئوج ھووَي، جون اِنسون رو ھووَي ھَي ھانَ او آتما ݾون اِيئوج جيتا رَي، جون ايشوَر جيتو ھَي۔ايشوَر ۾ ھيڪَي ٻيجَي رِي مدد
7 ھر ھيڪ شئي ڇيڪِي مِٽڻ آݪِي ھَي اِيئي رَي ڪري ٿي ھوشيار رو ھانَ پراٿنا رَي ݾارُو تيار رو۔ 8 ݾجون ݾون خاص بات اَي ھَي ڪہ ٿي ھيڪَي ٻيجَي ݾون پريم راکو ڪيونڪہ پريم ݾون ݾجائِي پاپ ڍڪيجَي ھَي۔ 9 خُوشِي ݾون ھيڪَي ٻيجَي رِي ميموڻِي ڪرو۔ 10 ھر ھيڪ مِنک آپرِي نعمت تي جڪو ايشوَر اُوئي نَي ڏينِي ھَي، آپرِي ذميوارِي ݾون ھيڪَي ٻيجَي رِي شيوا ڪرَي۔ 11 جڏي ڪو مِنک پرچار ڪرَي، تو اِيئون پرچار ڪرَي جھڙَي نمُونَي او ايشوَر رَي باتون ݾُڻاوَي ھَي۔ جي ڪو شيواداري ھووَي، تو اُوئي طاقت ݾون پرچار ڪرَي جڪو ايشوَر اُوئي نَي ڏينِي ھَي ڪہ ھر ھيڪ بات ۾ يسُوع مَسيح رَي وسيلَي ايشوَر رِي مھما ڏيکيجَي۔ مھما ھانَ بادشاھي شرُوع ݾون لي ھميشا توڻي ايشوَر رِي ھوتِي رَي۔ آمين۔
مَسيح رَي ݾارُو ڏُک ڏيکڻ
12 اي پيارَي ڀايون، جڪو مُصيبت رو باݾڏي ٿون تي آزمُوتَي آݪِي ڪار ٻَݪيو ھَي، اُوئي رَي ݾارُو اَي ݾوچي حيرون نِي ھوئو ڪہ مھون تي اَي ڪھڙا ڏُک آيا ھَي، 13 پڻ خُوشَي ملھائو ڪہ ٿي مَسيح رَي ڏُکون ۾ شامل ھويا ھو ڪيونڪہ ٿي اُوئي ٽيم موٽَي ݾون موٽِي خُوشِي ملھاشو جڏي مَسيح مونَ مرتبَي ݾون آشَي۔ 14 جي مَسيح رَي نون رَي ڪري ٿونرِي بي عِزتي ھووَي ھَي، تو ٿي برڪت آݪا ھو ڪيونڪہ ٿون تي ايشوَر رِي مھما آݪِي آتما ھووَي ھَي۔ 15 جي ٿون ۾ ڪَي تي ڏُک آوَي، تو او ڏُک اِيئي رَي ڪري نِي آوَي ڪہ، ڪو خُونِي، چور، بُڇڙو جون ٻيجون رَي ڪوم ۾ ٽونگ اَڙاوڻ آݪو ھووَي۔ 16 جي ڪَي مِنک تي اِيئي رَي ڪري ڏُک آوَي ڪہ او مَسيح رو ھَي، تو او شرماوَي نِي، پڻ اُوئي رَي نون رَي ڪري ايشوَر رِي بکوڻ ڪرَي۔
17 ڪيونڪہ ھمَي او ٽيم آيو رو ڪہ پيل ايشوَر رَي پريوار يعني آپون ݾون عدالت شرُوع ھووَي، تو پَڇي اُوئون رو ڪھڙو حال ھوشَي جڪو مَسيح رَي بارَي ۾ ايشوَر رِي خُوشِي رِي خبر نَي ڪونھي منتا؟ 18 جون شاستر ۾ لِکيوڙو ھَي ڪہ،
”جڏي نيڪ مِنک نَي مُشڪل ݾون مُگتي ملشَي،
تو پَڇي ايشوَر رَي اِنڪاري ھانَ پاپيون رو ڪِي ھوشَي؟“
19 اِيئي رَي ڪري جڪو ايشوَر رِي مرضِي تي ڏُک برداش ڪرَي ھَي، او نيڪِي ڪرَي ھانَ آپرِي زندگِي وفادار ھانَ پيدا ڪرڻ آݪَي ايشوَر رَي حوالي ڪرَي۔