مَنڊلِي رَي اَگووڻون نَي ھدايت
5
ھُون اُوئون نَي ھدايت ڪرون ھون جڪو ٿون ۾ وِشواسي مَنڊلِي را اَگووڻ ھَي۔ ھُون ڀِي ٿون آݪِي ڪار اَگووڻ ھانَ مَسيح رَي ڏُکون رو گواھ ھون۔ ھُون ڀِي اُوئي مھما ۾ ڀيڙو ھوئين جڪو جگت تي ظاھر ھوئڻ آݪِي ھَي۔ ھُون ٿونَي مِنٿ ڪرون ھون ڪہ، 2 ٿي ايشوَر رِي اُوئي مَنڊلِي رِي ݾنڀال ھيڪَي ݾُٺَي ڌراڙ آݪِي ڪار ڪرو۔ ٿي اَي ڪوم مجبُورِي ݾون نا، پڻ خُوشِي ݾون ڪرو، نِي پَشون رَي لالچ ݾون پڻ پُورَي من ݾون ݾنڀال ڪرو، ڪيونڪہ ايشوَر رِي اَئيج مرضِي ھَي۔ 3 ايشوَر آپرِي مَنڊلِي ٿونرَي حوالي ڪِي ھَي اِيئي رَي ڪري اُوئي تي حُڪم نِي ھلائو پڻ ݾُٺو نمُونو ھوتا رو۔ 4 ڪيونڪہ جڏي موٽو ڌراڙ آشَي، تو او ٿونَي اھڙو مھما آݪو تاج ڏيشَي جڪو ھميشا توڻي ريشَي۔5 اي نوجوانون، ٿي ڀِي وِشواسي مَنڊلِي رَي اَگووڻون را وفادار رو۔ ٿي ھيڪَي ٻيجَي ݾون نِموڻا ھوئي شيوا رو ڪوم ڪرو، ڪيونڪہ شاستر ۾ لِکيوڙو ھَي ڪہ،
”ايشوَر مگرُور رَي خلاف ھَي،
پڻ نِموڻون تي ڪِرپا ڪرَي ھَي۔“
6 اِيئي رَي ڪري ٿي ايشوَر رَي قُدرت آݪَي ھاٿ ھيٺا نِموڻا ھوئي رو ڪہ او ٿونَي ٽيم تي ڪامياب ڪرَي۔ 7 ٿي آپرو ݾجو فِڪر ايشوَر تي ڇوڙو ڪيونڪہ اُوئي نَي ٿونرو فِڪر ھَي۔
8 ٿي ھوشيار ھانَ جاگتا رو ڪيونڪہ ٿونرو دُشمن يعني شيطون ٿونرو وِشواس مِٽاوڻ رَي ݾارُو اِيئي نمُونَي تلاش ۾ ھَي جھڙَي نمُونَي گرجڻ آݪو شينھن آپرَي شِڪار رِي تلاش ۾ رَي ھَي۔ 9 اِيئي رَي ڪري ٿي وِشواس ۾ پڪا رو ھانَ اُوئي رو مُقابلو ڪرو۔ ٿونَي خبر ھَي ڪہ ٿونرا وِشواسي ڀائي پُورِي دُنيا ۾ اِيئي نمُونَي ڏُک ھانَ مُصيبتون برداش ڪرَي پڙيا۔ 10 ھمَي ڪِرپا ڪرڻ آݪو ايشوَر، جڪَي ٿونَي مَسيح را ھوئڻ رَي ڪري آپرِي مھما ۾ ھميشا رَي ݾارُو اَڻايا ھَي، اوج ٿونَي ڪئينڪہ ڏِنون را ڏُک برداش ڪرڻ ݾون پَڇي ڪامل، وِشواس ۾ پڪا ھانَ مضبُوط ڪرشَي۔ 11 اُوئي رِي بادشاھي شرُوع ݾون لي آخر توڻي ھوتِي رَي۔ آمين۔
آخري جَئي پرڀُو رِي
12 ھُون اَي خط سِلوانُس رَي ھاٿون لِکائُون پڙيو جڪو مَسيح ۾ مھارو وفادار ڀائي ھَي۔ ھُون اِيئي خط ۾ ٿونَي خاص باتون لِکون پڙيو ھانَ ٿونَي ھدايت ڪري اَي گواھِي ڏيئون پڙيو ڪہ ايشوَر رِي ݾاچِي ڪِرپا اَئيج ھَي۔ ٿي اِيئي تي پڪا رو۔ 13 بابل شھر رِي وِشواسي مَنڊلِي آݪا جڪون نَي ايشوَر چُونڊيا ھَي، اَي ٿونَي جَئي پرڀُو رِي ڪَي ھَي ھانَ مرقس ڀِي جڪو مھارَي ڏيڪرَي آݪِي ڪار ھَي، ٿونَي جَئي پرڀُو رِي ڪَي ھَي۔ 14 ھيڪَي ٻيجَي ݾون ڀايون آݪِي ڪار مِلتا رو۔ ٿي ݾجائِي جڪو مَسيح ۾ ھيڪ ھو، ايشوَر ٿونَي ݾاجا ݾُورا راکَي۔