سنت پطرس رو پيلڪو خط
جَئي پرڀُو رِي ھانَ پراٿنا
1
اَي خط مھَي پطرس رَي طرفون ھَي جڪو يسُوع مَسيح رو سنت ھون۔ ھُون ايشوَر رَي اُوئون چُونڊيوڙَي مِنکون نَي لِکون پڙيو جڪو پرديسيون آݪِي ڪار پينطُس، گِلتيا، ڪُپدڪيا، آسيا ھانَ بتُونيا صُوبون ۾ ھر جگھا رَي ھَي۔ 2 ايشوَر پِتا ٿونَي پيل ݾون اوݪکي پويتر آتما رَي وسيلَي آپرَي ݾارُو چُونڊيا ڪہ ٿي يسُوع مَسيح را وفادار ھوئو ھانَ اُوئي رَي لوئِي رَي ڇونٽون ݾون پويتر ھوئي جائو۔ٿون تي ھميشا ڪِرپا ھانَ ݾُک ھوتو رَي۔
ݾاچِي اُميد
3 آپڻَي پرڀُو يسُوع مَسيح رَي پِتا يعني ايشوَر رِي بڏائي ھووَي۔ اُوئي آپرِي تموم گھڻِي دايا ݾون آپون نَي نُوئو جنم ڏينو ھانَ يسُوع مَسيح نَي مُوئوڙون ݾون جيتو ڪري آپون نَي ھيڪ ݾاچِي اُميد ڏينِي 4 ڪہ آپي ھميشا بي عيب ھانَ گھٽ نِي ھوئڻ آݪِي وِراثت حاصل ڪرون جڪو آڪاش تي ٿونرَي ݾارُو راکيوڙِي ھَي۔ 5 ايشوَر اُتري توڻي ٿونرَي وِشواس رَي وسيلَي آپرِي قُدرت ݾون ٿونرِي رُکاݪِي راکتو ريشَي جترِي توڻي ٿونَي مُگتي نِي ملَي، او مُگتي جڪو جگت رِي پڇاڙِي ۾ مِلڻ آݪِي ھَي۔ 6 اِيئي بات رَي ݾارُو ٿي خُوشِي ملھائو ھو، بيشڪ ٿي ٿوڙِي دير رَي ݾارُو فرق فرق آزمُوتا ڏيکو ھو ھانَ ڏُکون ۾ ھو۔ 7 اِيئون آزمُوتون رو مقصد اَي ھَي ڪہ ٿونرو وِشواس ݾاچو ثابت ھووَي ڪيونڪہ جھڙَي نمُونَي باݾڏي ݾونَ نَي گاݪي نِج ٺاوَي ھَي اِيئج نمُونَي ٿونرو وِشواس ڀِي آزمايو جاوَي ھَي۔ ٿونرو وِشواس فانِي ݾونَي ݾون ڀِي وڌيڪ قيمتي ھَي، اِيئي رَي ڪري ايشوَر رِي مرضِي ھَي ڪہ يسُوع مَسيح رَي ڀڙي آوڻ آݪَي ڏِن ٿونرِي بکوڻ ھووَي ھانَ ٿونَي مرتبو ھانَ عِزت ملَي۔ 8 ٿون اُوئي نَي ڪڏي ڀِي ڪونھي ڏيٺو پڻ تو ڀِي اُوئي ݾون پريم راکو ھو۔ ٿي ھڻون ڀِي ڏيٺَي بِنا اُوئي تي وِشواس راکڻ ݾون اھڙِي خُوشِي ملھائو ھو جڪَي رو ݾُڻاوڻ ڏُکيو ھَي ھانَ او بکوڻ ݾون ڀريوڙِي ھَي۔ 9 پرڀُو يسُوع تي وِشواس راکڻ رَي ڪري ٿونَي مُگتي ملَي ھَي۔
10 نبيون اِيئي مُگتي رَي بارَي ۾ تموم گھڻِي تلاش ھانَ پُوڇا گاڇا ڪِي۔ اُوئون اگڪٿِي ڪري اُوئي ڪِرپا رَي بارَي ۾ ݾُڻايو جڪو ايشوَر ٿون تي ڪرڻ آݪو ھتو۔ 11 مَسيح رِي آتما جڪو اُوئون ۾ ھتِي، اُوئي اُوئون نَي ݾُڻايو ڪہ مَسيح ڏُک ڏيکشَي ھانَ اُوئي نَي تموم گھڻو مونَ مرتبو ملشَي۔ اُوئون اَي اوݪکڻ رِي ڪوشش ڪِي ڪہ او ٽيم ڪڏي ھانَ ڪيڪر آشَي؟ 12 ايشوَر اُوئون نبيون نَي ݾمجھايا ڪہ اَي اگڪٿِي اُوئون رَي ݾارُو نا، پڻ ٿونرَي ݾارُو ھَي۔ ھمَي اَي ٿونَي اُوئون ݾُڻايو جڪون آڪاش ݾون ميليوڙَي پويتر آتما رَي وسيلَي ٿونَي خُوشِي رِي خبر ݾُڻائِي۔ اَي اھڙَي حيرت آݪَي باتون ھَي ڪہ فريشتا ڀِي اَي جوئڻ رِي اُميد ۾ ھَي۔
پويتر زندگِي گُذارڻ
13 اِيئي رَي ڪري ٿي ݾمجھداري ݾون ڪوم ڪرو ھانَ آپرَي من ݾون اِيئي بات تي پُورِي اُميد راکو ڪہ جڏي يسُوع مَسيح ڀڙي آشَي، تو ايشوَر ٿون تي ڪِرپا ڪرشَي۔ 14 ٿي ايشوَر را وفادار اولاد ھو اِيئي رَي ڪري اُوئي بُڇڙَي خواھشون تي نِي بو، جھڙَي نمُونَي ٿي پيل بيتا، جڏي ٿونَي ݾچائي رِي خبر ڪونھي ھتِي۔ 15 اِيئي رَي بدلَي ٿونَي اِيئي نمُونَي پويتر زندگِي گُذارڻ کپَي جھڙَي نمُونَي آپڻو ھيلو ڪرڻ آݪو ايشوَر پويتر ھَي۔ 16 ڪيونڪہ ايشوَر شاستر ۾ ڪَي ھَي ڪہ،
”ٿي پويتر ھوئو،
ڪيونڪہ ھُون پويتر ھون۔“
17 ايشوَر، جڪَي نَي ٿي آپرو پِتا ڪئي پراٿنا ڪرو ھو، او ڪيرو ڀِي پاݾو ڪونھي ليتو پڻ ھر ھيڪ رو اِنصاف ݾون فيصلو ڪرَي ھَي۔ اِيئي نمُونَي جترِي توڻي ٿي اِيئي جگت ۾ مُسافر ھو، ايشوَر ݾون وفادار ھوئي بيتا رو۔ 18 ٿونَي خبر ھَي ڪہ ٿونرا ٻاپ ڏاڏا خراب ھلت چلت تي بيتا ھانَ ٿي ڀِي بيتا، اُوئي ݾون ٿونرِي مُگتي ݾونَي، چوندِي جھڙَي فانِي شيون ݾون ڪونھي ھوئِي 19 پڻ بي عيب ھانَ بي داگ گھيٽَي يعني مَسيح رَي قيمتي لوئِي ݾون ھوئِي ھَي۔ 20 او جگت ٺاوڻ ݾون پيل چُونڊيوڙو ھَي پڻ اِيئي آخري زمونَي ۾ ٿونرَي ڪري اِنسونِي رُوپ ۾ آيو۔ 21 اُوئي رَي وسيلَي ٿون ايشوَر تي وِشواس راکيو ھَي، جڪَي اُوئي نَي مُوئوڙون ݾون جيتو ڪري مونَ مرتبو ڏينو ڪہ ٿونرو وِشواس ھانَ اُميد ايشوَر تي ھووَي۔
22 ھمَي ايشوَر رَي باتون ݾاچَي منڻ ݾون ٿونرا من آڇا اُوجݪا ھويا ھَي ڪہ وِشواسي ڀايون ݾون ݾاچو پريم ڪري ݾگھو، اِيئي رَي ڪري ھمَي ٿي ݾاچَي من ݾون ھيڪَي ٻيجَي ݾون پريم راکو۔ 23 ٿون فانِي اِنسون ݾون نا، پڻ ايشوَر رَي شُٻڌ رَي وسيلَي نُوئو جنم ليئو ھَي جڪو نِي مِٽڻ آݪو، جيتو ھانَ ھميشا ريوَڻ آݪو ھَي۔ 24 جون يسعياھ رَي شاستر ۾ لِکيوڙو ھَي ڪہ،
”ھر ھيڪ اِنسون گاݾ آݪِي ڪار ھَي،
ھانَ اُوئي رو ݾجو مونَ مرتبو گاݾ رَي گُل آݪِي ڪار ھَي۔
گاݾ ݾُوڪي جاوَي ھَي
ھانَ گُل ٽُوٽَي ھَي۔
25 پڻ پرميشوَر رَي باتون ھميشا ريوَڻ آݪَي ھَي۔“
اَي باتون اوج خُوشِي رِي خبر ھَي جڪو ٿونَي ݾُڻايوڙِي ھَي۔