سنت يعقُوب رو خط
جَئي پرڀُو رِي
1
ايشوَر ھانَ پرڀُو يسُوع مَسيح رَي ٻونھَي يعقُوب رَي طرفون اُوئي ٻارھون اِسرائيلي قبيلون رَي وِشواسيون نَي جڪو پُورِي دُنيا ۾ جيٿ ڪيٿ رَي ھَي، جَئي پرڀُو رِي۔وِشواس ھانَ ايشوَر رِي ݾمجھ
2 اي پيارَي وِشواسيون، جڏي ٿون تي فرق فرق آزمُوتا آوَي، تو ٿي اِيئي ۾ خُوش ھويا۔ 3 ڪيونڪہ ٿونَي خبر ھَي ڪہ جڏي ٿونرو وِشواس پَرکيو جاوَي ھَي، تو ٿي صبر ڪرڻ ݾيکو ھو۔ 4 ھر ھيڪ بات ۾ صبر ڪرتا رو ڪہ ٿونرو وِشواس پڪو ھووَي ھانَ ٿي ڪامل ھوئي جائو ڪہ ٿون ۾ ڪَي ڀِي بات رِي گھٽتائِي نِي رَي۔ 5 پڻ جي ٿون ۾ ڪَي ۾ ݾمجھ رِي ڪَمِي ھووَي، تو او ايشوَر ݾون مونگَي ھانَ او اُوئي نَي ڏيشَي ڪيونڪہ او ݾجون نَي خُوشِي ݾون دِل کولي ڏَي ھَي۔ 6 وِشواس ݾون مونگو پڻ شَڪ نِي ڪرو، ڪيونڪہ شَڪ ڪرڻ آݪو ݾمُوندر رَي ڇوليون آݪِي ڪار ھووَي ھَي جڪو بائيرَي ۾ اِيئا اُوئا بَي ھَي۔ 7 اھڙو مِنک اَي نِي ݾمجَھي ڪہ پرميشوَر اُوئي نَي ڪئين ڏيشَي۔ 8 اھڙو مِنک ٻي ٻيڙيون تي ݾَوار ھَي ڪيونڪہ او آپرِي ڪَي ڀِي بات تي اُڀتو ڪونھي۔
غريبي ھانَ اَميري
9 جڪو وِشواسي غريب ھَي او اِيئي بات تي بڏائو ڪرَي ڪہ ايشوَر رِي نظر ۾ اُوئي رِي اھميت تموم گھڻِي ھَي۔ 10 پڻ جڪو وِشواسي اَمير ھَي او اِيئي بات تي بڏائو ڪرَي ڪہ ايشوَر اُوئي نَي نِموڻو ٺاھيو ھَي۔ دُنيا رو ڌن ھيڪ ڏِن گاݾ رَي گُلون آݪِي ڪار ختم ھوئي جاشَي۔ 11 جڏي ݾُورج نڪرَي ھَي، تو اُوئي رَي تيز تِڙڪَي ݾون گاݾ ݾُوڪَي ھَي ھانَ اُوئي را گُل ڇِڻَي ھَي ھانَ اُوئي رِي خُوبصُورتِي ختم ھووَي ھَي اِيئي نمُونَي اَمير ڀِي ڌن ڪمائي ڪمائي مري جاشَي۔
آزمُوتو
12 برڪت آݪو ھَي او جڪو آزمُوتا برداش ڪرَي ھَي ڪيونڪہ وِشواس ۾ پڪو ريوَڻ رَي ڪري اُوئي نَي زندگِي رو تاج ملشَي جڪَي رو واعدو ايشوَر آپرَي پريم ڪرڻ آݪون ݾون ڪيئو ھَي۔ 13 جڏي ٿَي تي آزمُوتو آوَي، تو اَي نِي ڪَي ڪہ ايشوَر مھنَي آزماوَي پڙيو ڪيونڪہ نَڪو ڪُڻ اُوئي نَي بُڇڙائي ݾون آزمائي ݾگھَي ھانَ نَڪو او ڪينَي آزماوَي ھَي۔ 14 پڻ ھر ھيڪ مِنک رِي بُڇڙِي خواھش اُوئي نَي آزمُوتَي ۾ ڦݾاوَي ھَي۔ 15 خواھش آپون ݾون پاپ ڪراوَي ھَي ھانَ جڏي پاپ بڌَي ھَي، تو موت آوَي ھَي۔
16 اي پيارَي وِشواسيون، دوکو نِي کائو۔ 17 ھر ھيڪ ݾُٺِي ھانَ ڪامل نعمت اُونچا ݾون يعني آپڻَي آڪاشِي پِتا ݾون آوَي ھَي۔ اُوئي اُجاݪَي رَي ݾارُو ݾُورج، چندر ھانَ تارا ٺاھيا جڪو بدليجتا رَي ھَي پڻ ايشوَر اِيئون آݪِي ڪار بدلجيتو ڪونھي۔ 18 اُوئي آپرِي مرضِي ݾون آپون نَي ݾچائي رَي شُٻڌ رَي وسيلَي نُوئو جنم ڏينو ڪہ اُوئي رَي ٺاھيوڙَي شيون ۾ آپون نَي ݾجون ݾون پيلڪو درجو ڏَي۔
ݾُڻڻ ھانَ عمل ڪرڻ
19 اي پيارَي وِشواسيون، اَي بات ياد راکو ڪہ ھر ھيڪ مِنک ݾُڻڻ ۾ تيز، ٻولڻ ۾ ڍيلو ھانَ ريݾ ۾ ٺاڍو رَي۔ 20 ڪيونڪہ ريݾ ڪرڻ ݾون اِنسون ايشوَر رِي نيڪ مرضِي پُورِي ڪونھي ڪري ݾگھتو۔ 21 اِيئي رَي ڪري ٿي ڪِنَي عادتون ھانَ بُڇڙا ڪوم ڪرڻ ڇوڙو ھانَ اُوئي وچن نَي نِرمل من ݾون قبُول ڪرو جڪو ٿونَي ݾُڻايوڙو ھَي ڪيونڪہ اوج ٿونرِي آتما نَي بچاوڻ رِي قُدرت راکَي ھَي۔
22 ٿي نِي رُگو ايشوَر رو شُٻڌ ݾُڻو پڻ اُوئي تي بيتا رو۔ جي ڪُڻ اِيئون ڪونھي ڪرتو، تو آپرو آپنَي دوکو ڏَي ھَي 23 ڪيونڪہ جڪو وچن ݾُڻَي ھَي پڻ اُوئي تي بيتو ڪونھي، تو او اُوئي مِنک آݪِي ڪار ھَي جڪو آريݾِي ۾ آپرو مونڏو جووَي ھَي 24 ھانَ جڏي او جوئي بُوئو جاوَي ھَي، تو ڇيڪو پونتري جاوَي ھَي ڪہ ھُون ڪھڙو ھتو۔
25 پڻ برڪت آݪو ھَي او جڪو اُوئي ڪامل شريعت تي بيتو رَي ھَي جڪو مِنکون نَي پاپ ھانَ موت ݾون آزاد ڪراوَي ھَي ڪيونڪہ او ݾُڻڻ ݾون پَڇي پونترتو ڪونھي پڻ اُوئي تي عمل ڀِي ڪرَي ھَي۔