پرميشوَر رو پُوجاري مَلڪ صدق
7
اَي اوج مَلڪ صدق ھَي جڪو ساليم شھر رو بادشاھ ھانَ پرميشوَر رو پُوجاري ھتو۔ جڏي اڀراھيم چار بادشاھ ماري پاڇو آوتو پڙيو، تو مَلڪ صدق اُوئي رو اِستقبال ڪيئو ھانَ اُوئي رَي ݾارُو ايشوَر ݾون برڪت مونگِي۔ 2 اڀراھيم اُوئي نَي کوݾيوڙَي شيون ۾ ڏھون حِصو ڏينو۔ مَلڪ صدق آپرَي نون تي ”ݾچائي رو بادشاھ“ ھانَ ساليم رو بادشاھ يعني ”صُلح رو بادشاھ“ ھَي۔ 3 اُوئي رَي ما ٻاپ رِي ھانَ پيڙھِي رِي ڪو ڀِي خبر ڪونھي۔ نَڪو اُوئي رِي زندگِي رِي شرُوعات رِي خبر ھَي ھانَ نَڪو پڇاڙِي رِي۔ اِيئي نمُونَي او ايشوَر رَي ڏيڪرَي آݪِي ڪار ھميشا رَي ݾارُو ايشوَر رو پُوجاري رَي ھَي۔4 اِيئي رَي ڪري ھمَي ڌھيون لگائو ڪہ او ڪِترو تو مھانَ ھتو ڪہ آپڻَي ڏاڏَي اڀراھيم اُوئي نَي کوݾيوڙَي شيون رو ڏھون حِصو ڏينو۔ 5 لاوِي را پيڙھِي آݪا، جڪو ايشوَر را پُوجاري ھووَي ھَي اُوئون نَي شريعت تي اَي حُڪم مِليو ڪہ آپرِي قوم اِسرائيل ݾون ڏھون حِصو لَي۔ لاوِي قبيلو ڀِي اڀراھيم رِي پيڙھِي ݾون ھَي۔ 6 پڻ مَلڪ صدق لاوِي رِي پيڙھِي ݾون ڪونھي ھتو، تو ڀِي اُوئي اڀراھيم ݾون ڏھون حِصو لي اُوئي نَي برڪت ڏينِي جڪَي ݾون واعدا ڪيئوڙا ھتا۔ 7 اِيئي ۾ ڪو ڀِي شَڪ ڪونھي ڪہ برڪت ڏيوَڻ آݪو برڪت ليوَڻ آݪَي ݾون موٽو ھَي۔ 8 لاوِي جڪو ڏھون حِصو لَي ھَي او فانِي اِنسون ھَي پڻ مَلڪ صدق رَي بارَي ۾ شاستر گواھِي ڏَي ھَي ڪہ او جيتو ھَي۔ 9 اِيئي رَي ڪري آپي ڪئي ݾگھون ھون ڪہ لاوِي جڪو ڏھون حِصو لَي ھَي اُوئون ڀِي اڀراھيم رَي وسيلَي ڏھون حِصو ڏينو۔ 10 ڪيونڪہ اڀراھيم ڀِي لاوِي قبيلَي رو ڏاڏو ھَي پڻ لاوِي اَڃون توڻي جايو ڪونھي ھتو، اِيئي رَي ڪري اڀراھيم لاوِي رَي طرفون مَلڪ صدق نَي ڏھون حِصو ڏينو۔
ايشوَر رو پُوجاري پرڀُو يسُوع
11 جڏي ايشوَر آپرِي شريعت ڏينِي، تو اُوئي اِسرائيلي قوم ݾون آپرا پُوجاري ھوئڻ رَي ݾارُو لاوِي قبيلَي را ھانَ ھارُون رِي پيڙھِي نَي چُونڊيو۔ اِيئي رَي ڪري جي لاوِي قبيلَي رَي پُوجاريون رَي وسيلَي ايشوَر رو مقصد پُورو ھوئي ݾگھتو، تو پَڇي ٻيجَي پُوجاري رِي آوڻ رِي ڪھڙِي ضرُورت ھتِي جڪو ايشوَر رَي پُوجاريون رَي پيلڪَي ݾردار ھارُون آݪِي ڪار نا، پڻ مَلڪ صدق آݪِي ڪار ھَي؟ 12 جڏي پُوجاري رو طريقو بدليجَي ھَي، تو ضرُوري ھَي ڪہ اُوئي رِي شريعت ڀِي بدليجَي۔ 13 اَي بات اِيئي ݾون ظاھر ھَي ڪہ آپڻو پرڀُو، جڪَي رَي بارَي ۾ اَي باتون ھَي ڪہ او لاوِي قبيلَي رو ڪونھي، پڻ ٻيجَي قبيلَي رو ھتو جڪَي ۾ ڪَي ڀِي ايشوَر رو پُوجاري ھوئي ٻَليدون رِي جگھا تي شيوا ڪونھي ڪِي۔ 14 ھاوي، آپڻو پرڀُو يھُودا رَي قبيلَي رو ھتو۔ اِيئي قبيلَي رَي بارَي ۾ مُوسيٰ ڪڏي ڀِي ڪونھي ڪھيو ڪہ او ايشوَر رَي پُوجاريون رو ڪوم ڪرشَي۔
15 اَي بات اَڃون ڀِي چِٽِي ھووَي ھَي ڪہ جڏي مَلڪ صدق آݪِي ڪار ھيڪ ٻيجو ايشوَر رو پُوجاري پَڌرو ھويو۔ 16 او دُنياوِي شريعت تي نا، پڻ نِي مِٽڻ آݪِي زندگِي رِي قُدرت تي ايشوَر رو پُوجاري راکيجو۔ 17 اُوئي رَي بارَي ۾ شاستر اَي گواھِي ڏَي ھَي ڪہ،
”تُو مَلڪ صدق آݪِي ڪار
ھميشا رو ايشوَر رو پُوجاري ھَي۔“
18 اِيئي نمُونَي ايشوَر، پُوجاري ھوئڻ رَي ݾارُو پيلڪو حُڪم ختم ڪيئو جڪو ڪمزور ھانَ بِنا فائدَي آݪو ھتو۔ 19 ڪيونڪہ شريعت ڪَي ڀِي بات نَي پُورو ڪري ڪونھي ݾگھِي، اِيئي رَي ڪري ايشوَر اُوئي رَي بدلَي آپون نَي اَڃون ڀِي ݾُٺِي اُميد ڏينِي جڪَي ݾون آپي ايشوَر رَي نيڙا جائي ݾگھون ھون۔
20 اَي نُوئو طريقو ايشوَر رَي ݾونݾ ݾون ٺھيو۔ لاوِيون نَي پُوجاري راکڻ رَي ݾارُو ايشوَر ݾونݾ ڪونھي ليئو۔ 21 ايشوَر، پرڀُو يسُوع نَي آپرو پُوجاري راکي آپ ݾونݾ ليئو جون شاستر ۾ لِکيوڙو ھَي ڪہ،
”پرميشوَر ݾونݾ ليئو ھَي
اُوئي ݾون او ڦِرَي ڪونھي
ڪہ تُو ھميشا رو ايشوَر رو پُوجاري ھَي۔“
22 اِيئي نمُونَي يسُوع اِيئي ݾونݾ رَي ڪري نُوئَي ھانَ اَڃون ڀِي ݾُٺَي وچن رو ذومن ھويو۔
23 اِيئي ݾون ٽاݪ اَي ڀِي فرق ھَي ڪہ موت لاوِي پُوجاريون نَي پڪا ريوَڻ ڪونھي ڏينا اِيئي رَي ڪري اُوئون ۾ تموم گھڻا پُوجاري راکيا جاوتا۔ 24 پڻ پرڀُو يسُوع ھميشا رو ايشوَر رو پُوجاري ھَي ڪيونڪہ او ھميشا جيتو ھَي۔ 25 اِيئي رَي ڪري جڪو اُوئي رَي وسيلَي ايشوَر ڪڍي آوَي ھَي اُوئون نَي او ھميشا رِي مُگتي ڏَي ھَي ڪيونڪہ او ھميشا جيتو ھَي ھانَ اُوئون رِي پارت ڪرتو رَي ھَي۔
26 آپون نَي اھڙَي ايشوَر رَي پُوجاريون رَي ݾردار رِي ضرُورت ھتِي جڪو پويتر، بي ڏوھي، بي عيب، پاپون ݾون اݪگو ھانَ آڪاش ݾون ڀِي اُونچو ڪيئوڙو ھووَي۔ 27 او ٻيجَي ايشوَر رَي پُوجاريون رَي ݾردار آݪِي ڪار اِيئي بات رو مُحتاج نِي ھووَي ڪہ ھروز پيل آپرَي پاپون رو ھانَ پَڇي قوم رَي پاپون رَي ݾارُو ٻَليدون ڏَي ڪيونڪہ اُوئي مِنکون رَي پاپون رَي ݾارُو ھيڪ گُھمرو ھميشا رو ٻَليدون ڏينو۔ 28 شريعت، تو اُوئون مِنکون نَي ايشوَر رَي پُوجاريون را ݾردار راکَي ھَي جڪو ڪمزور ھَي پڻ او ݾونݾ جڪو شريعت ݾون پَڇي ليئوڙو ھَي، او اُوئي ڏيڪرَي نَي ايشوَر رَي پُوجاريون رو ݾردار راکَي ھَي جڪو ھميشا رَي ݾارُو ڪامل ڪيئوڙو ھَي۔