مُوسيٰ نبِي ݾون موٽو پرڀُو يسُوع
3
اي وِشواسيون، ٿي جڪو پويتر ڪري چُونڊيوڙا ھو ھانَ اُوئون مِنکون ۾ شامل ھو جڪون نَي ايشوَر ھيلو ڪيئو ھَي، يسُوع تي ڌھيون لگائو جڪَي نَي ايشوَر ميليو ھانَ ايشوَر رَي پُوجاريون رو ݾردار ھَي ھانَ جڪَي نَي آپي مِنکون رَي رُوبرو منون ھون۔ 2 او آپرَي چُونڊڻ آݪَي ايشوَر ݾون وفادار ھتو، جھڙَي نمُونَي مُوسيٰ ايشوَر رَي ݾجَي گھر يعني ݾجِي اِسرائيلي قوم ۾ آپرَي ڪوم ݾون وفادار ھتو۔ 3 پڻ يسُوع، مُوسيٰ ݾون وڌيڪ عِزت آݪو ݾمجھو گيو جھڙَي نمُونَي گھر ٺاوڻ آݪو اُوئي گھر ݾون وڌيڪ عِزت آݪو ھووَي ھَي۔ 4 ھر گھر رو ڪو نِي ڪو ٺاوڻ آݪو ھووَي ھَي پڻ جڪَي ھر ھيڪ شئي ٺائِي او ايشوَر ھَي۔ 5 مُوسيٰ تو ايشوَر رَي ݾجَي گھر ۾ شيوادار آݪِي ڪار وفادار رھيو ڪہ او ھوئڻ آݪَي باتون رِي گواھِي ڏَي۔ 6 پڻ مَسيح ايشوَر رو ڏيڪرو ھَي ھانَ اُوئي نَي اُوئي رَي گھر تي اِختيار ھَي، تو ڀِي او وفادار ھتو۔ آپي ايشوَر رو گھر ھون پڻ شرط اَي ھَي ڪہ آپي آپرِي دليرِي ھانَ اُميد تي پڇاڙِي توڻي پڪا رون جڪَي تي آپڻو بڏائو ھَي۔ايشوَر رَي مِنکون رَي ݾارُو آروم
7 جھڙَي نمُونَي پويتر آتما ڪَي ھَي ڪہ،
”جي آج ٿي ايشوَر رو آواز ݾُڻو،
8 تو آپرا من ڪاٺا نِي ڪريا،
جھڙَي نمُونَي آزمُوتَي رَي ڏِن
رڻ پَٽ ۾ بگاوت رَي ٽيم ڪيئا ھتا۔
9 ايشوَر اَي ڪَي ھَي ڪہ،
’ٿونرَي ٻاپ ڏاڏون مھنَي رڻ پَٽ ۾ آزمايو ھانَ پَرکيو
ھانَ چاليھ ݾالون توڻي مھارا ڪوم ڏيٺا۔
10 اِيئي رَي ڪري ھُون اُوئي پيڙھِي ݾون ڪاوڙيو ھانَ ڪھيو ڪہ،
”اِيئون را من ھميشا ڀٽڪيوڙا رَي ھَي
ھانَ اُوئون مھارو مارگ ڪونھي اوݪکيو۔“
11 اِيئي رَي ڪري مھَي ريݾ ۾ ݾونݾ ليئو ڪہ،
”او اُوئي مُلڪ ۾ جائي ڪونھي ݾگھَي،
جيٿ ھُون اُوئون نَي آروم ڏيئون تو۔“‘“
12 اي وِشواسيون، ھوشيار رھيا، اِيئون نِي ھووَي ڪہ ٿون ۾ ڪيرَي من ۾ بُڇڙا خيال آوَي ھانَ او وِشواس ڦِٽو ڪري، جيتَي ايشوَر ݾون ڦِري جاوَي۔ 13 جترِي توڻي ٿون ڪڍي موقعيو ھَي ٿي ھروز ھيڪَي ٻيجَي نَي ھدايت ڪرتا رو ڪہ ٿون ۾ ڪو ڀِي پاپ رَي دوکَي ۾ آئي، آپرو من ڪاٺو نِي ڪرَي۔ 14 ھمَي آپي مَسيح ۾ شامل ھويا ھون پڻ شرط اَي ھَي ڪہ جڪو وِشواس آپي پيل راکتا اُوئي تي پڇاڙِي توڻي پڪا رون۔
15 جون ڪھيوڙو ھَي ڪہ،
”جي آج ٿي ايشوَر رو آواز ݾُڻو،
تو آپرا من ڪاٺا نِي ڪريا
جھڙَي نمُونَي بگاوت رَي ٽيم ڪيئا ھتا۔“
16 او ڪُڻ ھتا جڪون ايشوَر رو آواز ݾُڻيو ھانَ بگاوت ڪِي؟ ڪِي او ݾجائِي او ڪونھي ھتا جڪو مُوسيٰ رِي اَگووڻِي ۾ مُلڪ مِصر ݾون نڪريا ھتا؟ 17 او ڪُڻ ھتا جڪون ݾون ايشوَر چاليھ ݾال ناراض ھتو؟ ڪِي اوج ڪونھي ھتا جڪون پاپ ڪيئا ھانَ جڪون را لاش رڻ پَٽ ۾ پڙيا رھيا؟ 18 او ڪُڻ ھتا جڪون رَي ڪري ايشوَر ݾونݾ لي ڪھيو ڪہ،
”او اُوئي مُلڪ ۾ جائي ڪونھي ݾگھَي
جيٿ ھُون اُوئون نَي آروم ڏيئون تو“؟
ڪِي اوج ڪونھي ھتا جڪون نافرمونِي ڪِي ھتِي۔
19 اِيئي نمُونَي آپون نَي خبر پڙَي ھَي ڪہ او وِشواس نِي راکڻ رَي ڪري اُوئي مُلڪ ۾ جائي ڪونھي ݾگھيا۔